Yeremia 22 - Ebibulia 2001

Yeremia nagambira ab'oruganda rwa Yuda

¹ Omukama akangambira ati, “Osongoke ogye omw'omukama wa Yuda omugambire oti,

² ‘Iwe mukama wa Yuda, aikaliire enketo ya Daudi, n'abaramata bawe, n'abantu bona aba Yerusalemu, muhulire okwo Omukama alikugamba.’

³ Nagira ati, ‘Mube bantu b'amazima mara abagorogoki, kandi omunyagwa mumukize omu mikono y'alikumubonesa enaku. Mutaboyera mugenyi anga kumutera. Kandi enfuuzi n'entumbwa mutabakoraho kantu, handiki kwita abataina ntambara mu nsi egi.

⁴ Kuba mazima ebyo ndikugamba kamurabihikya, abakama abaikaliire enketo ya Daudi baraikaraga nibaraba nyarulembo z'ekikaare eki bakubiire amagali n'efarasi; bonene, n'abaramata babo, n'abantu babo.

⁵ Kyonkai kamutahikize ebyo ndikubagambira, n'inyerahira inye nyenene Omukama, okwo oruganda oru rurasigara amatongo.

⁶ Nkugambire iwe ruganda rw'omukama wa Yuda, onshusira Gileadi n'akatwetwe ka Lebanoni. Kyonkai kandi ninyija kukuhindura irungu, obe kigo ekitaturwamu bantu.

⁷ Ndakutekatekera ab'okukusilikya, buli omoi n'ebikwatobye, emielezi yawe enungi muno bagiteme, baginage omu muliro.’ ”

⁸ “Amahanga gangi gararabaga aha kigo eki, buli muntu abaze mutahiwe ati, ‘Ekigo ekihango eki Omukama akakituraki?’

⁹ Barahororaga bati, ‘Aha rw'okuba bakebwa endagano y'Omukama Ruhanga wabo, bata kufukamira baruhanga abandi, baba nibo bakolera.’ ”

Ekigambo kya Yeremia ahali Yoahazi

¹⁰ Inywe bantu ba Yuda muleke kuchulira Omukama Yosia, mutamutongya. Shana muchulire muno omutabani, Yoahazi, kuba nibaija kumutwara mara taligaruka. Ensi y'obuzarwabwe taligibona rundi.

¹¹ N'omukama Yoahazi wenene ogwo mutabani wa Yosia, ayamusikiire omu ngoma ya Yuda akashuba akagenda, namugambaho ati, “Taligaruka mu nsi egi.

¹² Mbali bamutwete endore niyo aligwa; ensi egi talishuba kugibona.”

Ekigambo kya Yeremia ahali Yehoyakimu

¹³ “Yagwerwa omuntu akwata ebyo ayaka banu akaba nibyo ayombekesa enjuye, egorofaye akagyombekesa ebitali bya bwesigwa. Yakagwamu omuntu akoza abantu kushai atabahaire mperwa zabo.

¹⁴ Arabona agamba ati, ‘Ninyija kwombeka enju rutontoma, egorofa ey'ebiyumba ebihango,’ akagitamu amadirisha ag'ebiraka eby'embaho z'emielezi, akagasiiga erangi elikutukura.”

¹⁵ “Notekeleza oti okwembekesa emielezi, otalikwenda kukirwa muntu, nikwo kurakuhindura mukama? Isho kayalyaga akanywa, kikamutanga okuba muntu w'amazima omugorogoki? Mara tikwo yagizire omuraro gurungi?

¹⁶ Abaanaku n'abakene yabaramuraga kurungi mara bigendage. Mara okwo tikwo kumanya inye Omukama?

¹⁷ Iwe amaisho agawe n'omutima ogwawe nibirurukira eitunga ely'okulyomejanyia. Noitira abantu bushai, kubatera n'okubabonesa enaku.”

¹⁸ Aha rw'ekyo Omukama nagamba ahali Yehoyakimu eya Yosia omukama wa Yuda, ati, “Batalimuchulira nibagira bati, ‘Mwana wa tata! Eibare!’ Anga kumuchulira nibagamba bati, ‘Rugaba rwange! Mukama wange!’

¹⁹ Baramukurura bamunage enjai ya Yerusalemu, bamuziike nk'endogobe.”

Ebiliba ahali Yerusalemu

²⁰ Inywe aba Yerusalemu mugye Lebanoni mugambe muno, mwatanguke omuli Bashani, mutemu omuranga mwemire Abarimu; kuba abagonzibwa banyu basilika.

²¹ Orwo mwabaire mutungire nkabagambira, kyonkai mwayanga bwanga kuhulira. Okutahulira byombagambira gutura guba muze gwanyu kwema karai.

²² Abatwazi banyu baratuntumurwa omuyaga, abanyu babatware endore. Ahonu mwije muhemuke mugyeho mushonare aha rw'enshonga y'amafu ganyu ago mwakozire.

²³ Inywe aba Lebanoni, abatura mugoijagiire omu mielezi, obushasi bw'amani burabakwata mukunge, obushasi nk'obw'omu alikurumwa.

Ruhanga naramura Koniya

²⁴ Omukama nagamba ati, “N'inyerahira nti: Iwe Koniya eya Yehoyakimu, omukama wa Yuda, n'orwo wakubaire oli mpeta yange ey'omuhuri nkujwete aha mukono gwa bulyo, nakukunyubwiremu

²⁵ nkunaga omu mikono y'abalikwenda kukwita, nkunagira ab'otina, nangu nkunagira Nebukadineza omukama wa Babiloni n'Abakalidayo.

²⁶ Iwe na nyoko kikuzara ninyija kubajugunya mbaanage omu nsi endijo etali ya buzarwa bwanyu, mara kuli niyo muligwa.

²⁷ Mulyegomba kugaruka omu nsi egi, kyonkai timuligigarukamu.”

²⁸ Ogu n'iwe Koniya owo bagaya nk'enyungu eyatikire, ekikwato eky'omuntu atafaho? Kubaki Ruhanga anamujunjumya n'abaanabe namunaga omu nsi eyo batamanya?

²⁹ Iwe nsi, nsi, nsi iwe! Hulira ekigambo ky'Omukama!

³⁰ Omukama wenene nagamba ati, “Omuntu ogu mumuhandike omu bantu enchweke, omuntu atalibona burora obugoshokire; enshonga omu baanabe talimu alishobora kwikalira nketo ya Daudi, akagaruka kutwara engoma ya Yuda.”