Yeremia 2 - Ebibulia 2001

Omukama nashogashogya Isiraeli

¹ Omukama akangambira ati,

² “Ogende ogambire Yerusalemu ehulire, oti, ‘Inye ninyijuka okwo omu busigazi bwawe wabaga mwesigwa, okyali mugore wangonzaga, n'omw'irungu, omu nsi etabibwamu mbibo, wangumagaho.

³ Iwe Isiraeli wabaga wange inye nyenkai, omw'igesha lyange n'iwe nagesire mbere. Kandi bona abakushasize, nkababonabonyia. Alikugamba n'inye Omukama.’ ”

Obufu bw'abagurusi ba Isiraeli

⁴ Hulira ekigambo ky'Omukama inywe baijukuru ba Yakobo, inywe nganda za Isiraeli.

⁵ Omukama nababaza ati, “Bashwenkurw'inywe kugya kunjemera bakambonaho kabiki, kujanga bakekoza ebya katozi?

⁶ Tibabalize kugira bati, ‘Alihai Omukama ayatwihire Misiri, ayaturabize omw'irungu, omw'ishwa n'omu binyanga, omu nsi y'emparamata n'omu mwilima elindindi, ensi etarabwamu muntu, etaturwamu n'omoi?’

⁷ Inywe, inye nkabaleta omu nsi eyeza, kulya ebiraba byamwo, n'ebirungi byamwo ebindi. Kyonkai kamwagobiremu mwahagaza ensi yange eyo nabahaire.

⁸ Abakuhani tibabalize mbali Omukama ali, n'abegesa b'Amateka tibanyetaireho. Abatwazi banfakalira, kandi abarangi bagamba ebya Baali, bafukamira n'ebihuuku ebitaina mugasho.”

Omukama nakena Isiraeli

⁹ “Kityo inye, Omukama nkyakwatangaine na inywe, mara na baijukuru banyu ndikwatangana nabo.

¹⁰ Mushabuke enyanja mugobe aha kizinga kya Sipuro mulebe; mugire owo mwatuma Kedari, mushobokerwe; mulebe nk'ekyab'eki kirabaireyo.

¹¹ Taliho ihanga lirahindwire baruhanga balyo; nangu balikaba batali baruhangakwo. Kyonkai eihanga lyange likandugaho inye Ruhanga ayabahaire ekitinwa, bagya aha baruhanga abatabagashe.

¹² Mbwenu iwe iguru, eki kikutangaze, otine muno, oshoberwe; inye alikugamba n'inye Omukama.

¹³ Aha rw'okuba eihanga lyange likozire amahano gabili: Bampoiremu inye enchuro y'amaizi g'oburora, balima amaziba agabo, amaziba agalikubaruka agataina kwikarwamu maizi.”

Obutesigwa bwa Isiraeli

¹⁴ “Isi Isiraeli aba mwiru? Omuntu arabaire mwiru omwabo? Mbwenu kubaki ababisha nibamuhigiliza?

¹⁵ Nibasinda nk'entare aha rw'enshonga ya Yerusalemu, nibasinda muno. Ensiye bagiisire omwebuura, ebigobye babisiga amatongo, tibinamu bantu.

¹⁶ Kandi n'aba Memfisi na Tahapanesi bamwasire ekihorahore.

¹⁷ Isiraeli, ebi obyeleteire, kuba Omukama Ruhanga wawe atura akwebembeire omunagiireho.

¹⁸ Mbwenu k'olikugya Misiri kunywa amaizi ahali Naili, nogasirwaki? Anga nogasirwaki k'olikugya Asiria kunywa amaizi ahali Efurati?

¹⁹ Orabonabona aha rw'entambara zawe; kandi ekikunnagisizeho nokizira. Olebe mara omanye okwo okuruga aha Mukama Ruhanga wawe zili naku ezibi. Inye Omukama w'amahe n'inye ndikugamba: Tolikuntina.”

Isiraeli neyanga kufukamira Omukama

²⁰ Omukama nagamba ati, “Isiraeli, kwema onyangire ni irai; okagamba n'okwo otankolere. Okaburwa obwesigwa, wata kufukamira baruhanga aha nshozi n'aha bigabiro n'okusiyanirayo.

²¹ Inye nkakubyara nk'omuzabibu ogurungi muno, waruga omu mpambo enungige. Mbwenu obaireki kuhinduka okaba muzabibukibira, omuzabibu ogubi?

²² N'orwo wakwoga esabundi eina maniki, ekibara eky'obufu bwawe bwakutaireho nkyakibona. Alikugamba n'inye Omukama Ruhanga.

²³ Wakugamba otai okwo otahagaire, n'okwo ebihuuku bya Baali otalikubifukamira? Olebe ebyo wakozire omu ruhanga, obyekomye. Noshusha engamia nto elikushamanga negonza kwema

²⁴ netera oku n'oku. Oli nk'endogobeishwa enkazi omw'irungu elikwesaimura neyenda kwema, obunyama bugili kubi. Taliho ndogobe nshaija ey'okugihiiga ekalemesibwa. Orwo bili biro byayo endogobe ezishaija nizigihiga nizigibona.

²⁵ Oyelinde okugenda otajwete nkaito, n'okugenda oina eiliho. Kyonkai kandi nogamba okwo ebyafire byafire, kuba wagondize baruhanga abanyamahanga, n'okwo nibo orata kufukamira.”

Isiraeli ebone ekibonabonyio

²⁶ “Okwo bakwata omushuma akashonara, nikwo nainywe Abaisiraeli mulishonara, inywe, abakama banyu, abatwazi banyu, abakuhani banyu n'abarangi banyu

²⁷ abagambira omuti bati, ‘Oli tata,’ n'eibare bati, ‘N'iwe mawe,’ kuba bampoiremu, tibakindimu. Kyonkai k'enaku zilikubatanga bagira bati, ‘Oije otujune!’

²⁸ Mbwenu baruhanga bawe abo wakozire bali nkahai? Kabaraba nibashobora kukurokora omu naku, baije. Iwe Yuda, baruhanga bawe obungi nibaigana ebigo byawe.”

²⁹ “Kubaki nimunyeboroboitera? Manya inywena munshengire; alikugamba n'inye Omukama.

³⁰ Mbahaire ekibonabonyio byabura nshai, timulikwechura. Mushusire entare erumbire, abarangi banyu mwabaisa embanda.

³¹ Inywe Baisiraeli muhulire ebyo ndikubagambira. Isi Isiraeli ngishusiire eirungu anga ensi ey'omwilima elindindi? Mbwenu kubaki, inywe bantu bange nimugamba okwo mutangarukeho, kuba nimwemalira?

³² Nimugira muti omwisiki yakwebwa eby'okwelengya, n'omugore ayebwa ekijwarokye eky'obugenyi bw'obushwere? Kandi eihanga lyange linyebirwe ebiro bingi muno.”

³³ “Akabuya k'okuhiga abagenda niko oinako. Nangu n'abakazi babi obegesize emize yawe.

³⁴ N'abaanaku nyakatetere obaisire, okwo buzima tobashangire nibatema nju ya muntu, nangu n'obwamba bwabo bukwete aha myendo yawe! Mara na honene aho

³⁵ okyayeyeta nyakatetere, nogamba okwo nalekeire kukutamwa. Mbwenu orwo olikwetonga okwo ofakaire, naija kukubonabonyia.

³⁶ Oyegoire kugya aha baruhanga ab'amahanga! Nk'okwo Asiria yakugoire nikwo na Misiri erakugora.

³⁷ Noija kuruga Misiri oyetwekire emikono, oshonaire. Inye Omukama, ab'olikwesiga tindikubenda, kandi tibaina kyo barakugasha.”