Yeremia 19 - Ebibulia 2001

Oruleeba orwatikire

¹ Omukama akangambira, “Ogende ogure oruleeba rw'omubumbi, oshube ogendeho n'abagurusi n'abakuhani abakuru,

² murabe omu Kihigi ky'Enguhyo mugye omu Ruhanga rwa Benihinomu, obe nimwo ogambira ebigambo ebyo nakugambira.

³ Ogambe oti, ‘Inywe bakama ba Yuda, n'abantu ba Yerusalemu, muhulire ekigambo ky'Omukama. Omukama w'amahe, Ruhanga wa Isiraeli, nagamba ngu muraleba: Ensi egi naija kugiteza enaku, buli omoi arahulira enaku ezo amatwi gamwane.

⁴ Abantu bamuhoiremu, ensi egi bagihagaza orwo bagyoteiremu obunuma, nibabwotera baruhanga abandi, abo bonene batalikumanya, nangu na baish'enkurubo n'abakama ba Yuda tibabamanyaga. Kandi omu nsi omu baisiremu abantu bangi abataina ntambara.

⁵ Bayombekeramu Baali alutare z'okumutambiliraho abaana babo ebitambo by'okwokibwa ebyo ntabaragiire, nangu n'okubitekeleza tinkabitekelezaga.

⁶ Mbwenu, inye Omukama mbagambire: Ebiro bilija orwo omwanya ogu bataligweta Tofeti, anga Ruhanga rwa Benihinomu, shana balirweta Ruhanga rw'Elyasiro.

⁷ Kandi omu mwanya ogwo nimwo nditabangulira entegeka z'aba Yuda n'aba Yerusalemu, abantu bamwo mbaise omu ndashana, baitwe ababisha babo ababahiga. Emitumbi yabo ndigiha amahungu n'ebikaaka bigilye.

⁸ Ekigo eki ndikitamisa muno, abantu balikishobokerwa, buli omoi alikirabamu alitina muno, atangare aha rw'enshonga y'emikambukire yakyo yona.

⁹ Ababisha balibunda ekigo ekyo, baite n'abakilimu. Okubundwa kw'ekigo kuliba kw'amani, abaliba bali omwo balyangane, balye n'abaana babo.’ ”

¹⁰ Aho Omukama angambira ati, “Kwata oruleba oruli omu maisho g'abo wabaire ogenzire nabo

¹¹ obagambire okwo Omukama w'amahe yagambire ati, ‘Eihanga eli n'ekigo eki ninyija kubaita, bashushe oruleba oru orwayatika orutakurandwa. Abantu baliziika abafu babo omuli Tofeti, kuba ahandi hona obuziiko buliba butakizokayo.

¹² Ekigo eki n'abantu bamwo ndibashusa Tofeti.

¹³ Amaju ga Yerusalemu n'amaju g'abakama ba Yuda, nangu n'amaju gona ago bayoteire obunuma aha nshwi zago nibabwotera enyanyinyi, bakagisheshaho edivai nibagitambira baruhanga abandi, amaju ago gona galihagara nka Tofeti.’ ”

¹⁴ Aho nduga Tofeti, mbali Omukama yabaire antumire kugira ekyo nagambayo. Ngenda nyemelera omuli nyarubuga ya Rwensinga, ngambira abantu bona

¹⁵ okwo Omukama w'amahe, Ruhanga wa Isiraeli yagambire ati, “Leba, ekigo eki na buli kigo ekikyataine ninyija kukibonabonyia omu ngeli zona ezo nagambire. Mwina eijegu, timulikukunda kuhulira byo ndikugamba.”