Yeremia 18 - Ebibulia 2001

Yeremia omw'omubumbi

¹ Omukama akangambira inye Yeremia ati,

² “Oimuke osongoke ogye omw'omubumbi, mwonene omwo ndagira ebyo nakugambira.”

³ Kityo nsongoka ngya omw'omubumbi, nshanga nabumbisa eigurudumulye.

⁴ Kayabaga nabumba ekikwato kikamufera omu byara, akibumbamu ekikwato ekindi ekyo yabonaga kyamushemelera.

⁵ Omukama angambira ati,

⁶ “Leba, Inywe bantu ba Isiraeli, inye tinakubagira nk'okwo omubumbi ogu yagira eibumba? Alikubaza n'inye Omukama. Nk'okwo omubumbi aina obushobora aha ibumba, nikwo nanye nyina obushobora ahali inywe, Baisiraeli.

⁷ Akanya kona kona kanakugamba kurandura eihanga anga engoma, anga nkagamba kubikambura nkabisilikya!

⁸ K'eihanga elyo nakuba ngambire lyakweshubaho, aho ekyo nakuba ngambire kulikora nakukileka.

⁹ Kandi rwona rwona orwo nakugamba okwo ndataho eihanga anga engoma kushuba nkagiramira,

¹⁰ ahanyuma ekampemukira, ekaburwa kuhulira ekyo ngambire, aho ebirungi ebyo nakushangwa ngendeleire kugikolera nakubileka.

¹¹ Mbwenu aha rw'ekyo ogambire aba Yuda n'aba Yerusalemu oti, ‘Ogwo n'Omukama ngu muramanya, nagonza kubakora kubi, naija kubabonesa enaku. Buli omoi alekere kufakara, ayeshubeho.’

¹² Kyonkai bonene nibaija kukushubamu bati, ‘Ebyo wagamba obushai! Ichwe nitwija kwekolera ebyaitu, buli omoi naija kugumirana, akore okwo alikwenda.’ ”

Abantu nibanga Omukama

¹³ Aha rw'ekyo Omukama nagamba ati, “Mubaze omu mahanga ka haraba haliho arahuliire ekyab'eki. Abaisiraeli bakozire eihano lihango muno.

¹⁴ Enyazi z'amabanga ga Sirioni omuli Lebanoni zirahoirweho eseluji? Enchuro etabuka omu mabanga eyoma? Isi emigera y'amaizi g'omunena kwoma?

¹⁵ Kandi abantu bange banyebirwe, nibotera ebihuuku obunuma. Basitaire baruga omu mihanda yabo eya karai, bashuba omu mihanda ey'emparo, nyaihanda bagisiga.

¹⁶ Ensi yabo bagitamisize muno, netinisa kubi, ebiro byona taliho muntu aligigonza. Alikugirabamu wena nagenda obutini bumuli kubi, nachunda omutwe.

¹⁷ Abantu bange abo ndabatamagya orwo barabona ababisha babo, nk'okwo echuchu etuntumurwa omuyaga gw'oburugaizoba. Orwo ekibundo kirabagwera timbajune; ndabatera enkinya.”

Abantu nibenda kwita Yeremia

¹⁸ Ahanyuma abantu bagamba bati, “Mwije tunyomere Yeremia, kuba abakuhani tibalikwija kulekera kutwegesa Mateka. Abamanyi baragendelera kutuhanulira, n'abarangi tibalekeire kutugambira. Mwije tumuchwelerere, ebyo alikugamba tutabihuliliza n'akake.”

¹⁹ Waitu Mukama bampuliire, bahulire okutaka kwange.

²⁰ Omuntu arakozire ebirungi akarongorwa ebibi? Kandi mbwenu bonene bandimiire ekina kankigwamu. Singa oijuke okwo nayemeleire omu mabona gawe kubatelera omushango, k'obagarulira.

²¹ Aha rw'ekyo abaana babo obateze eifa, bagwe aha mbanda, abakazi babo babe ntumbwa, mara baferwe n'abaana. Abashaija endwara ebaite, kandi abasigazi bagwe omu ndashana.

²² Obasindikire abanyagi babanyage kibandagara, tubahulire nibachura omu maka gabo! Kuba bandimiire ekina kankigwamu bakankwata, bantega n'emitego kunkwata amaguru.

²³ Kyonkai iwe waitu Mukama, okunyoma kwabo kwona kunyita n'okumanya. Entambara yabo egi otagibagarulira. N'obufu bwabo otabwebwa. Obasilikye bachweke omu maisho, obaite okyabanigaliire.