Yeremia 16 - Ebibulia 2001

Ekibonabonyio kya Isiraeli

¹ Omukama akangambira ati,

² “Otalishwera mukazi, kandi otalizara baana omu nsi nk'egi.

³ Kuba inye Omukama ninyija kukugambira ebiliba aha baana n'abazaire babo omu nsi egi.

⁴ Balitwa endwara mbi muno. Tibalibachulira n'okubaziika chei. Balishusha amasha aha itaka. Balitwa enjara bagwe aha mbanda, emitumbi yabo eliibwe amahungu n'ebikaaka.

⁵ Kuba leba, inye Omukama ninkugambira: Otalitaha mu nju eyo batekiremu ekibi; otalichulira bafire. Enshonga abantu aba tinkibaha milembe, tinkibagilira kisha nangu n'okubaganyira chei.

⁶ Omu nsi egi abake n'abahango barafa. Kyonkai tibabachulire kurakuuza anga kubamoisheza ishoke, n'okubaziika chei.

⁷ Taliho alitwalira muferwa kyakulya kumushumbusha, anga kumuha kyakunywa kumushumbusha aha rw'okuferwa ishe anga nyina.

⁸ Otalitaha mu nju mbali obugenyi buli, okashuntama omwo kulya anga kunywa.

⁹ Kuba inye, Omukama w'amahe, Ruhanga wa Isiraeli, kankugambire: Omu nsi omu naija kuchwamu ebyera n'amashemelerwa, kishwera n'omugore tibakihulirwa. Ebyo murabyebonera n'amaisho ganyu mukyarora.”

¹⁰ “Abantu aba orwo orabagambira ebigambo ebi, bakakubaza bati, ‘Kubaki Omukama nagamba okwo enaku ezi zona ezihango ziti zilikwija kututera? Tufakaireki? Omukama Ruhanga waitu, ntambaraki eyo tumukoleire?’

¹¹ Iwe obashubiremu oti, ‘Aha rw'okuba Omukama nagamba okwo batat'enkurw'ichwe bamushengire, bakekwata baruhanga abandi bakaba nibo bakolera n'okubafukamira, bamugomera, bachwa Amatekage.

¹² Kandi lero inywe mwashagaho batat'enkurw'ichwe. Okwo muli buli omoi aina eijegu, timukikunda kumuhulira.

¹³ Aha rw'ekyo ndabakurumura omu nsi mbaanage omu nsi eyo mutamanya, na bashwenkurw'inywe tibagimanyaga. Omwo mube nimwo mukolera baruhanga kiro na mushana; tindikwija kubashasira.’ ”

Okwo Abaisiraeli baliruga omu buzahe

¹⁴ Omukama nagamba ati, “Obukiro bulija orwo omuntu atalinahira ati, ‘Obuso bw'Omukama ayaihire Isiraeli Misiri!’

¹⁵ Balinahira bati, ‘Obuso bw'Omukama ayaihire Isiraeli omu nsi ya bikara n'omu nsi zona mbali yabaire abaanaganagiire.’ Enshonga ndibagarura omu nsi yabo eyo nahaire baish'enkurubo. Alikugamba n'inye Omukama.”

Ekibonabonyio ekilikwija

¹⁶ Omukama nagamba ati, “Leba ninyija kutuma abajubi bangi baije bajube abantu aba. Ahanyuma ndatuma abahigi babahige buli ibanga na buli rushozi n'omu mpako z'amabare.

¹⁷ Ebyo balikukora byona nimbibona. Taliho kyontalikubona, nangu n'amafu gabo ngalebire.

¹⁸ Ndabaabonabonyia muno aha rw'entambara zabo n'amafu gabo aha rw'okuhagaza ensi yange nibafukamira ebihuuku by'obujanga ebilikushusha emitumbi y'abafu. Ensi yange bagijwize ebihagaro byabo.”

Yeremia nashaba aha Mukama n'obwesige

¹⁹ Waitu Mukama n'iwe mani gange, boma yange; n'iwe oba bwirukiro bwange ntangirwe. Amahanga galiruga omu nsi zona gaije ahali iwe nigagamba gati, “Batat'enkurw'ichwe tibagiraga kantu shana baruhanga abatali ba mazima, abataina mugasho!

²⁰ Omuntu yakwekolera baruhanga? Baruhanga nk'aba, baruhanga abatabayo!”

²¹ Omukama nagamba ati, “Lebanu ndamanyisa amahanga obushobora bwange m'amani gange; bamanye okwo mba Mukama.”