Yeremia 10 - Ebibulia 2001

Ruhanga nakira ebihuuku

¹ Inywe ab'oruganda rwa Isiraeli muhulire ekyo Omukama alikubagambira.

² Omukama wenene nagamba ati, “Muleke kurondora emichwo y'amahanga, anga kuhahanisibwa eby'okutiinisa ebyo mulikubona aha iguru orwo byahahanisa amahanga ago.

³ Manyasi emichwo y'abanyamahanga tegira mbali eyemeleire. Batema omuti omu kibira omubuya agubaiza endyamiti.

⁴ Ekiti ekyo, abantu bakisiiga efeza n'ezahabu, bashuba bakikomesa emishumare, egyo bagiteza enyondo ngu kitakwechunda.

⁵ Ebihuuku byabo ebyo nikyo kimoi n'amatiiti omu ndimiro y'emyongo, agatagamba. Tibitambuka shana babishuture. Mutabitina, kuba tibina kukora kabi kona kona. Kandi n'akarungi ako byakukora tikaliho.”

⁶ Waitu Mukama, ow'okushusha iwe taliho. Oba mukuru, n'eibara lyawe liba likuru mara ly'amani.

⁷ Mbwenu iwe Mukama w'amahanga, ni muntuki ow'okubura kutina iwe! Manya okutinwa okusaine, aha rw'okuba omu bamanyi bona omu mahanga, n'omu ngoma zona ez'amahanga ago, taliho muntu akushusha.

⁸ Bona bafera mara bafano. Ebihuuku by'emiti byakubegesaki?

⁹ Ebihuuku byabo bisiigire efeza ya Tarishishi, n'ezahabu ya Ufazi. Ababuya n'abahesi b'ezahabu nibo bakora omulimo ogwo gwona. Ebihuuku ebyo babijweka emyendo ya zambarau, na yonene erukirwe abantu.

¹⁰ Kyonkai Omukama n'iwe aba Ruhanga ow'amazima. N'iwe Ruhanga asingire, Omukama nyakumelera. Orwo anigara ensi etengeta yona, kandi amahanga tigaina kwemera kinigakye.

¹¹ Mbwenu mubagambire muti, “Baruhanga abatatonzire iguru na nsi, barachweka omu nsi yona.”

Oruhoya rw'okusingiza Ruhanga

¹² Ruhanga n'iwe yatonzire ensi omu bushoborabwe, omu bumanyibwe yagitonda; omu magezige yatonda eiguru.

¹³ K'ahanga, amaizi omw'iguru gahinda, n'iwe aimukya oruho omu nsi yona rukarugwamu ebichwi. N'iwe ataishura endabyo enjura ekagwa, n'iwe aihya omuyaga omu sitoa za wenene.

¹⁴ Ebyo buli muntu k'abileba, ayemanya okwo ali mufera atalikushobokerwa. Buli muhesi w'ezahabu k'aleba ebihuukubye akwatwa enshoni; aha rw'okuba ebishushanibye ebyo by'ebishuba, mara tibigira mwoyo.

¹⁵ Tibina mugasho, okubikora kwebeiya! Akanya kabyo k'ekibonabonyio kakaligoba bilihwaho.

¹⁶ Kyonkai Ruhanga wa Yakobo talikushusha bihuuku ebyo, kuba wenene n'iwe yatonzire ebintu byona. Kandi n'iwe yaronkire Isiraeli kuba eihangalye nyabwe. Nangu n'eibaralye aba Mukama w'amahe.

Obuzahe obulikwija

¹⁷ Mukome ebyanyu inywe abatura babunzirwe omubisha.

¹⁸ Kuba Omukama nagamba ati, “Kanya aka, abatura omu nsi naija kubabingamu, mbabonese enaku, bakahulire.”

¹⁹ Aho nirwo aba Yerusalemu bachuzire bati, “Twahutara tutai! Engoga zaitu tizakukira. Tubaire nitumanya turayegumisiliza!”

²⁰ Amahema gaitu bagakambwire, emiguha yago yona bagigutagutura. Abaana baitu bona batusigireho, titukinabo, tibakiliho, titukina ba kushuba kutushanshurulira mahema gaitu, n'okututeramu epazia.

²¹ Kuba abashumba babaire bafera, tibalikwehanuza aha Mukama. Ekyo nikyo batalikugoshokera, n'obuhyo bwabo bwona bw'entaama bwenaganagiire.

²² Muhulire enkuru eyo balikugamba! Omubisha yaruga bikara n'amani gangi kusilikya ebigo bya Yuda, bikaba buturo bw'emiha!

²³ Waitu Mukama, nimanya okwo hatabayo muntu amanya ndekeleroye, taliho muntu aina bushobora bwa kugelera burorabwe.

²⁴ Mbwenu waitu Mukama, otuhane, kyonkai otuhane nobalira; otatuhanisa kiniga kutusilikya.

²⁵ Singa onigaliire muno amahanga agatakumanya, abantu abatakufukamira, enshonga baisire abantu bawe babamaraho n'ensi yabo bagisiga amatongo.