Yeremia 1 - Ebibulia 2001

¹ Ekitabo eki bigambo ebyagambirwe Yeremia eya Hilikia, omoiho omu bakuhani b'ekigo kya Anatoti omu nsi ya Benjamini.

² Omukama akagambira Yeremia omu makiro ga Yosia eya Amoni, Yosia omukama wa Yuda, omu mwaka gwa 13 aliire engoma.

³ Omukama ashuba agambira Yeremia omu makiro ga Yehoyakimu eya Yosia, omukama wa Yuda, kulemwa kugoba aha nzindo y'omwaka gwa 11 Zedekia agiire aha ngoma, Zedekia eya Yosia, omukama wa Yuda. Mwaka ogwo omu mwezi gwa katanu nirwo abantu ba Yerusalemu batwetwe endore.

Okwetwa kwa Yeremia

⁴ Omukama akangambira ati,

⁵ “Nkakumanya otakatwetwe nda, kandi nkakuronka otakazairwe, nkakuronda k'oba murangi w'amahanga.”

⁶ Aho nirwo nagambire nti, “Waitu, Mukama Ruhanga! Leba tindikumanya kugamba; kuba ndi muto.”

⁷ Kyonkai Omukama angambira ati, “Otagamba oti, ‘Ndi muto,’ aha rw'okuba bona abo ndakutumaho orabagobaho, n'ebyo ndakuragira byona orabigamba.

⁸ Otabatina, ndi hamoi naiwe kukurokora. Alikugamba n'inye Omukama.”

⁹ Aho Omukama aimukya omukono ankwata aha munwa, angambira ati, “Leba, ebyo oragamba nabikuha.

¹⁰ Kir'eki nakutaho k'ogambira amahanga n'engoma; kunyukura, kwita okamaraho; kwombeka okabyara.”

Yeremia nabonekerwa elya kabili

¹¹ Omukama ambaza ati, “Yeremia nobonaki?” Muhorora nti, “Nimbona enkoni y'omuti gw'omulozi.”

¹² Ahanyuma angambira ati, “Okwo wabona nikwo, nanye ndindiliire ekigambo kyange kukigobesheleza.”

¹³ Omukama ashuba ambaza ati, “Nobonaki?” Muhorora nti, “Nimbona enyungu eli aha kyoto netabura, elebire kwema bikara.”

¹⁴ Nikwo wenene kungambira ati, “Akabi nikaija kuruga bikara kakabunda abantu bona omu nsi.

¹⁵ Kuba leba ninyija kweta enganda zona omu ngoma za bikara ya Yerusalemu n'aha boma zayo zona obuzingora, n'obuzingora bw'ebigo byona bya Yuda.

¹⁶ Eihanga lyange ndalibonabonyia, mbature entambara zabo kuba banshengire. Obunuma nibabwoteza baruhanga abandi, nibafukamira ebihuuku ebyo bonene bekoleire.

¹⁷ Kyonkai iwe oyekome ogume; oyeyememu obagambire byona ebyo ndikukuragira. Otakubatina. K'orabatina tinkuhe bumanzi bwa kubemelera mu maisho.

¹⁸ Olebe, inye kir'eki nakushusa ekigo ky'eboma, nyomyo y'ekyoma, nkuta z'omulinga, orashanise ensi yona, n'abakama ba Yuda n'abatwazi bayo, abakuhani bayo n'abanyansi bona.

¹⁹ Na bonene barakurashanisa, kyonkai tibakusinge; ahakuba inye ndi hamoi naiwe kukurokora. Alikugamba n'inye Omukama.”