Yakobo 3 - Ebibulia 2001

Orulimi n'akabi karwo

¹ Barumuna bange, abangi omuli inywe mutaligonza kuba begesa, aha rw'okuba nimumanya okwo ichwe abegesa tuliramurwa eiramu elilikukira ely'abandi.

² Nobona ichwena tushobya omuli bingi. Kyonkai k'omuntu aba atashobize mu migambire ogwo aba ali mugorogoki, nashobora kugelera n'omubiligwe gwona.

³ Orwo tuteka ebyoma omu kanwa k'efarasi kazituhulira, tuba tuzigeleire emibili yazo yona.

⁴ Kwakwo muraleba n'emeli. N'orwo ziba zihango mara zitwarwa omuyaga ogw'amani, zihaburwa akabaho kake muno zigiire mbali omubugi alikuzolekeza.

⁵ N'orulimi narwo nikwo ruli; rwonene ruba kagingo kake akekuza omu bintu bihango. Muraleba okwo ekibira kimarwaho akaliro kake n'orwo kyakuba kili kihango kitai!

⁶ Orulimi narwo ruba muliro. Orulimi ruba nsi mbi omu ngingo zaitu, rutera omubili gwona eibara libi, rwokya ebitondwa byona, kandi narwo rushuba rwokibwa omuliro gw'eirai lyona.

⁷ Nimumanya okwo engeli zona z'ebigunju, n'ebinyonyi, n'ebyekurura, n'enfuru, nibishobora kworoorwa mara byoroorwa abantu.

⁸ Kyonkai taliho muntu yakworoora rulimi, omubisha atageleerwa, rwijwire esumu nyamwita.

⁹ Nirwo tukoza kusingiza Omukama mara Isheichwe, rwonene rwonene tuba nirwo tukeenesa abantu abatonzirwe omu mishusire ya Ruhanga.

¹⁰ Akanwa konene konene karugwamu okusingiza n'okukeena. Barumuna bange, ebi tikwo bilikuragirwa kuba.

¹¹ Enchuro yakutabukwamu amaizi agarungi n'agalikushalira?

¹² Barumuna bange inywe! Omuti gw'omutini gwakuraba ezeituni, anga omuzabibu kuraba etini? Nikwo n'amaizi g'omwonyu gatakurugwamu maizi garungi.

¹³ Okwo muli n'ohai omumanyi anga omushobokerwa? Akoze oburorabwe oburungi kwoleka ebikorwabye omu bwetohya n'obumanyi.

¹⁴ Kyonkai kamuragyaho mukagira ekiisho ekishaguliraine n'okweyenda, muleke kwesiima n'okugamba ebishuba nimuhakanisa amazima.

¹⁵ Obumanyi obu tibwo bulinya oburuga mw'iguru. Obu bw'omu nsi, bw'obunyama mara bwinamu orwango.

¹⁶ Mbali hali ekiisho n'okweyenda, niho haba omwaga n'ensika.

¹⁷ Kyonkai obumanyi oburuga oruguru ekya mbere buba burungi, kandi bw'emilembe, bw'obuchulezi, bw'entwaza nungi, bwina obuganyizi bungi mara burugwamu ebirungi, tibulengeshanyia kandi tibugiramu ka bugobya.

¹⁸ Abantu abagonza emilembe nibo babiba embibo omu milembe, omwo hakaija hakarugwamu ebiraba by'obugorogoki.