Ruti 2 - Ebibulia 2001

Ruti omu musiri gwa Boazi

¹ Naomi akaba aina omunyaruganda wa iba, omushaija mutungi, w'eihiga lya Elimeleki, eibaralye ni Boazi.

² Aho Ruti Omumoabukazi agambira Naomi ati, “Ngye omu musiri nkenguze ebikumba by'eshayiri mpondeire aranyikiliza kugira ntyo.” Naomi amuhorora ati, “Iroko mwana wange.”

³ Kityo aimukya agenda, akenguza omu musiri ahondeire abagesi. Aija agobera ekichweka ky'omusiri gwa Boazi ayabaire ali w'eihiga lya Elimeleki.

⁴ Aho Boazi aruga Betelehemu, agambira abagesi ati, “Omukama abe nainywe.” Bahorora bati, “Omukama akutunge omugisha.”

⁵ Aho Boazi abaza omwiru ayabaire nalebelera abagesi ati, “Omukazi ogu w'ohai?”

⁶ Omwiru ayabaire nalebelera abagesi amuhorora ati, “Mumoabukazi, aizire na Naomi barugire Moabu.

⁷ Agambire ati, ‘Ninkutagiliza nkenguze ebikumba omu miganda mpondeire abagesi.’ Kityo yaija, ayemire bwankya karai kugoba mwaha, obuzira kwikyaho n'akati.”

⁸ Aho Boazi agambira Ruti ati, “Mwana wange huliliza! Otagenda kukenguza mu musiri gundi, handiki kusigaho ogu. Oikare haihi n'abazana bange.

⁹ Amaisho gaikare aha musiri ogwo balikugesha, obahondeire. Abasigazi nabaragira kutakukoraho. Kandi k'orakwatwa eiliho ogye aha bikwato onywe amaizi ag'abasigazi bataha.”

¹⁰ Aho Ruti ajumara ahansi, agambira Boazi ati, “Nakuganja ntai iwe kunfaho oti, okwo inye ndi munyamahangakazi?”

¹¹ Kyonkai Boazi amuhorora ati, “Bamanyisize byona ebyo wakoleire nyokozara kwema baro afire, n'okwo osigireho sho na nyoko n'ensi y'obuzarwa bwawe, okaija omu bantu ab'obaire otalikumanya.

¹² Omukama akurongolere eby'okozire. Omukama Ruhanga wa Isiraeli ow'ohungiire omu mikonoye akutunge erongoro egobire.”

¹³ Nirwo Ruti yagambire ati, “Mukama wange, wangilira ekisha kingi. Wamaramara omuzana wawe wamugambira n'obufura, n'orwo inye ntali muzana wawe.”

¹⁴ Akanya k'okulya kakagobire Boazi agambira Ruti ati, “Ija aha olye akakulya, mara okoze ekibege omu divai.” Kityo Ruti ashuntama aha rubaju rw'abagesi, Boazi amuheleza eshayiri ebabwire; alya aiguta, endijo agisigaho.

¹⁵ Orwo yaimukire kukenguza Boazi aragira abasigazibe ati, “Mumuleke akenguze nangu n'omu miganda, mutakumurwanisa.

¹⁶ N'emiganda endijo mugimusikulire omu biba, mugimusigireho akenguzemu, mutakumurotokera.”

¹⁷ Kityo Ruti akenguza omu musiri ogwo kugoba bwaigoro. Aho atera eyo yakenguza aihyamu nk'ekilo emoi y'eshayiri.

¹⁸ Ataha nayo omu kigo. Ayoleka nyinazara eshayiri eyo yakenguza. Amuha n'ebyakulya ebyo yabaire asigireho orwo yamazire kwiguta.

¹⁹ Nyinazara amubaza ati, “Kir'eki wakenguza nkahai? Waba nokora nkahai? Ogwo ayakumanya ahabwe omugisha.” Agambira nyinazara omusiri ogwo yakoramu, ati, “Mukama w'omusili ogwo nakoramu kir'eki ni Boazi.”

²⁰ Naomi agambira omukamwana ati, “Omushaija ogwo Omukama amutunge omugisha, Omukama omufura atanagirana barora anga bafire!” Naomi ashuba agambira Ruti ati, “Omushaija ogwo munyabuzare waitu empikabubili.”

²¹ Aho Ruti Omumoabukazi agamba ati, “Mara kandi, yangambira ati, ‘Oikare haihi aha bairu bange, kuhika orwo baramara kugesha ebyange byona.’ ”

²² Naomi agambira Ruti omukamwana ati, “Kurungi mwana wange, kugenda n'abazanabe, bataija bakakukora kubi omu musiri ogundi.”

²³ Kityo aikara aha bazana ba Boazi, nakenguza kulemwa kugoba aha nzindo y'amagesha g'eshayiri n'engano; amara aikara na nyinazara.