Ruti 1 - Ebibulia 2001

Elimeleki n'ekaye nibafurukira Moabu

¹ Omu makiro ag'abaramuzi babaire nibatwara, hakabaho eifa lingi omu nsi. Omushaija omoi owa Betelehemu eya Yuda afurukira omu nsi ya Moabu, wenene na mukaziwe n'abatabani babili.

² Omushaija ogwo eibaralye ni Elimeleki, na mukaziwe ni Naomi, kandi abatabani bombili amabara gabo ni Maloni na Kilioni. Bakaba bali Baefurati ba Betelehemu eya Yuda. Bagenda omu nsi ya Moabu, baba nimwo baikara.

³ Kyonkai Elimeleki, iba Naomi, afa; Naomi asigara n'abatabani bombili.

⁴ Aba bashwera Abamoabukazi. Omoi eibaralye akaba ali Oripa, n'ondijo ni Ruti. Baturayo nk'emyaka ikumi;

⁵ mara bombili, Maloni na Kilioni, bafa; kityo Naomi aferwa mushaijawe n'abatabani bombili.

Naomi na Ruti nibagaruka Betelehemu

⁶ Aho Naomi aruga Moabu hamoi n'abakamwana, aha rw'okuba akaba ahuliire akyali Moabu okwo Omukama yabaire ahabukiire ab'owabo, akabatunga ebyakulya.

⁷ Aruga mbali yabaire ali hamoi n'abakamwana bombili; bakwata omuhanda bagaruka omu nsi ya Yuda.

⁸ Kyonkai Naomi agambira abakamwana bombili ati, “Mugende, inywembili buli omoi agarukire nyina. Omukama asinge ababere nk'okwo mubeleire aba abafire, nanye.

⁹ Omukama asinge abatunge amaka, buli omoi ashube abone omushaija, agire eka.” Aho abanywegera, kandi bonene balira muno.

¹⁰ Bamugambira bati, “Chei, ichwe turagenda na iwe omu bawe.”

¹¹ Kyonkai Naomi abagambira ati, “Bana bange, mushubeyo, mutampondera. Inye nkyazara abojo abandi ab'okwija kuba baibainywe?

¹² Mushubeyo, bana bange, mugende, ahakuba inye nakaikwire muno, tinkishwerwa. Nangu n'orwo nakugira nti nyina eshubi, n'orwo nakushwerwa omushaija omu kiro omu nkazara abana b'abojo,

¹³ mwakulinda kuhika orwo balikura? Mwakwetanga kushwerwa? Chei, bana bange, nimbashasibwa muno munonga kubona okwo Omukama anshasize.”

¹⁴ Aho bonene bashuba balira muno. Oripa anywegera nyinazara, kyonkai Ruti amwezingelera.

¹⁵ Naomi agamba ati, “Leba, mukabaro yashuba omu babo n'ahali baruhangabe. Na iwe oshubeyo, ohondere mukabaro.”

¹⁶ Kyonkai Ruti agamba ati, “Otantagiliza kukusigaho anga otantanga kukuhondera. Aha rw'okuba mbali oragya niyo ndagya, na mbali orashura niyo ndashura. Abawe nibo baraba bange; kandi Ruhanga wawe niwe araba Ruhanga wange.

¹⁷ Mbali oligwa, nanye niho ndigwa, mara honene aho niho ndiziikwa. Kahalibaho eky'okuntaishurana naiwe, rutali rufu, Omukama ambonabonyie ambonabonyize.”

¹⁸ Naomi kayaboine okwo Ruti yamaza kugenda nawe, tiyagambire bindi.

¹⁹ Kityo bombili batamu, balemwa bagoba Betelehemu. Kabagobire Betelehemu, ekigo kyona batangara kubabona; abakazi bebaza bati, “Ogu ni Naomi?”

²⁰ Abagambira ati, “Mutanyeta Naomi munyete Mara, Rushoborabyona anteize enaku ezitali za kugambwa.

²¹ Nkagenda nyijwize, kyonkai mbwenu Omukama yangarura ntaina kantu. Kubaki munyete Naomi, okwo Omukama ambonabonyize, Rushoborabyona anteize enaku?”

²² Nikwo Naomi yagarukire atyo, na Ruti, Omumoabukazi, omukamwana, nibaruga omu nsi ya Moabu. Bakagoba Betelehemu omu mbandizo y'eigesha ly'eshayiri.