Oruhoya 3 - Ebibulia 2001

¹ Aha kitanda kyange omu kiro, nkahiga ogwo ow'omwoyo gwange gugonza; nkamuhiga, kyonkai tinamuboine, nkamweta, kyonkai tiyamporoire.

² Mbwenu nyimuke ngendagende omu kigo, omu mihanda n'omu katare; ndamuhigahiga ow'omwoyo gwange gugonza. Nkamuhiga kyonkai tinamuboine.

³ Abalinzi bakambona, orwo babaire nibagendagenda omu kigo. Mbabaza nti, Mwamuboine ow'omwoyo gwange gugonza?

⁴ Nkaba nabarabaho nti, nirwo namuboine ow'omwoyo gwange gugonza. Kanamuboine namuhweramu, mara tinamulekire k'agenda, kuhika orwo namulesire omu nju ya mawe, omu kiyumba ky'ayambakire enda.

⁵ Inywe baana bahara ba Yerusalemu, nimbaanahiza omw'ibara ly'enjobe n'enyemera, okwo mutaliigije ngonzi anga kuzimukya, kuhika orwo zirayeyendera.

Oruhoya rwa kashatu Omwisiki

⁶ Ekyo kiki ekilikuruga omw'irungu, nikishusha enyomyo y'omwika, nikitamirana mira n'obunuma, n'epoda zona z'abachuruza eziina akatachu?

⁷ Leba nketo ya Solomoni! Ezingoirwe abaisherukare nkaga. Abashaija emanzi za Isiraeli.

⁸ Bona bakikiire embanda, babuya omu ndashana, buli omoi aina embanda aha kiberokye, agyelindize ekyakubaho omu kiro.

⁹ Omukama Solomoni akehangira enketo, yagikoza emiti ya Lebanoni.

¹⁰ Amaguru gayo yagakoza efeza, obweyegeko bwayo zahabu, n'obushuntamo bwayo zambarau; omunda ekaba elengize eli kaliza, elengibwe abaana bahara ba Yerusalemu.

¹¹ Inywe baana bahara ba Sioni mushohore, mulebe Omukama Solomoni, aina orukinga orwo nyina yamujwekire kiro ekyo yashwera, kiro ekyo yaboine ebyera.