Oruhoya 2 - Ebibulia 2001

¹ Inye ndi roza ya Shaloni, lilia y'empanga.

Omusigazi

² Nka lilia omu mahwa, nikwo omugonzibwa wange ali omu baisiki.

Omwisiki

³ Nk'omupera omu miti y'ekibira, nikwo omugonzibwa wange ali omu basigazi. Omu mashemelerwa gangi nkashuntama omu kibehokye, ebirababye bikannulira.

⁴ Akantahya omu nju y'amagenyi, ebenderaye ahali inye ekaba eli ngonzi.

⁵ Ondise emikate y'ezabibu zomire, ondemuuze amapera; okuba engonzi nizindamaiza.

⁶ K'omukonogwe gwa bumosho gwakunshagwire aha mutwe, n'omukonogwe gwa bulyo gukanfumbata!

⁷ Inywe baana bahara ba Yerusalemu, nimbaanahiza omw'ibara ly'enjobe n'enyemera, okwo mutaligiije ngonzi anga kuzimukya, kuhika orwo zirayeyendera.

Oruhoya rwa kabili

⁸ Eiraka ly'omugonzibwa wange! Leba naija, nachoka aha mabanga, nachokachoka obubanga.

⁹ Omugonzibwa wange ni nk'enjobe, anga enyana y'enyemera. Leba niw'ogwo ayemeleire enyuma y'orukuta rwaitu, nalinguliza omu madirisha, naleebera omu bihuru.

Omusigazi

¹⁰ Omugonzibwa wange nafumora nangambira ati, “Imuka, mugonzibwa wange, kirungo kyange, tugendanwe;

¹¹ aha rw'okuba ebiro by'embeho byahingwire, enjura yakeire yayamuukire.

¹² Enyakyo nizakya ahansi, omwanya gw'okuhoya gwahika, n'eiraka ly'entungurumaiba nilihulirwa omu nsi yaitu.

¹³ Omutini niguraba etini, emizabibu eyakize, neleta akatachu. Imuka, mugonzibwa wange, kirungo kyange, tugendanwe.

¹⁴ Iwe kaiba kange akeshelekire omu bihuru by'amabare, omu mpako z'omu mpanga, kambone obuso bwawe, kampuliire eiraka lyawe, okuba eiraka lyawe nilinnulira, n'obuso bwawe burungi.

¹⁵ Mutukwatire emiha, egyo emiha emito, elikwita endimiro z'emizabibu, aha rw'okuba endimiro zaitu z'emizabibu zakize.”

Omwisiki

¹⁶ Omugonzibwa wange, wange; nanye ndi wa wenene, nalisa obuhyo bw'entaamaze omuli lilia.

¹⁷ Kuhika orwo burakya, obwire kutaishukana, garuka mugonzibwa wange, oshushe enjobe, anga enyana y'enyemera omu mabanga ga Betheli.