Orubara 35 - Ebibulia 2001

Ebigo by'Abalevita

¹ Omukama akagambira Musa omu mpita za Moabu haihi na Yorudani ahalebangaine na Yeriko ati,

² “Oragire Abaisiraeli omu butaka bwabo bahemu Abalevita ebigo by'okuturamu. Kandi babahe n'amataka agataine ebigo ebyo balisizemu ebitunganwa.

³ Ebigo ebyo bibe byabo by'okuturamu, n'amalisizo gabe g'ente zabo n'ebitunganwa byabo byona.

⁴ Amalisizo ag'aha bigo ago muliha Abalevita, gatandikire aha boma z'ebigo gagende emita 450 buli bwolekera.

⁵ Enjai y'ekigo rubaju orw'oburugaizoba mupime emita 900; kasi emita 900; obugwaizoba emita 900; na bikara emita 900, ekigo kisigare omugati. Ago gabe nigo gaba malisizo gabo aha bigo byabo.

⁶ Abalevita mulibaha ebigo mukaga eby'abantu kuhungiramu. Wena aliita omuntu ahungire omwo, kandi ebigo ebyo mukaga mubongereho makumi 42.

⁷ Byona hamoi mulibaha ebigo makumi 48, hamoi n'amalisizo agabyataine.

⁸ Ebigo ebyo muliihya muliihya aha butaka bw'Abaisiraeli kuha Abalevita, abangi mulibaihyaho bingi, n'abake mulibaihyaho bike. Buli ruganda n'obusika bwarwo okwo buliba buli, nikwo rulihiraho Abalevita aha bigo byarwo.”

Ebigo by'obuhungiro

⁹ Omukama akagambira Musa ati,

¹⁰ “Ogambire Abaisiraeli oti, Orwo mulishabuka Yorudani mukagya omu nsi ya Kanaani,

¹¹ aho mulironda ebigo byanyu eby'okuhungiramu. Alishangwa aisire omuntu atagendeleire abe nimwo ahungira.

¹² Ebigo ebyo bilibabera buhungiro bw'okukiliramu aha muntu ow'enzigu alikwenda kwehora. Aliba aisire omuntu aleke kufa atakemeleire mu maisho ga bakuru omushangogwe kuramurwa.

¹³ Kandi ebigo ebyo omukaga ebyo muliha Abalevita nibyo biliba byanyu by'okuhungiramu.

¹⁴ Buseli bwa Yorudani mwihyeyo bishatu, n'ebindi bishatu omuli Kanaani. Ebyo biliba bigo by'okuhungiramu.

¹⁵ Ebigo ebyo mukaga biliba buhungiro bw'Abaisiraeli n'abanyamahanga n'abaliba bafurukiiremu. Aliita omuntu atamugendeleire, ahungiremu.”

¹⁶ “Nawe k'halimuteza ekikwato ky'ekyoma akafa, ogwo aliba ali mwisi, kandi omwisi ogwo bamwite.

¹⁷ Mara k'alikwata eibare ely'okwita omuntu, akhalimuteza akafa, ogwo aliba ali mwisi, mara omwisi bamwite.

¹⁸ Handiki akwate ekiti eky'okwita omuntu akimuteze afe, ogwo aliba ali mwisi, omwisi bamwite.

¹⁹ Omuntu alyeholera owa wenene owo baisire, aliba amwisire amwite; k'halimutanganwa amwite.

²⁰ Kandi aisire omuntu k'aliba amuchumisire omuhyo aha rw'okumunoba, anga akamuchokera, handiki kumuzimbira, akafa,

²¹ anga aha rw'okumunoba akamutera enkoni akamunaga ahansi, akafa, kimutera ogwo bamwite; aliba ali mwisi. Alikweholera kifa k'alitanganwa omwisi ogwo, amwite.

²² Kyonkai k'halimutera omuhyo kibandagara atalikumunoba, anga akagira ekyo yamujugunyira atamuzimbiire,

²³ anga akamuteza eibare ely'okwita omuntu atamuboine, akafa, n'orwo babaire batalikunobangana, kugir'oti yamugendelera kumuhutaza,

²⁴ aho embaga eramure omushango gwa kiita n'alikweholera kifa, okwo emigenzo elikuragira.

²⁵ Embaga egyo ekize kiita ahali olinya alikweholera kiitwa atamwita, emugarure omu kigo ky'okuhungiramu ekyo abaire ahungiremu, akikaremu kuhika orwo Omukuhani Nyamukuru ayakozirwe amajuta gatakatifu alifa.

²⁶ Kyonkai kiitamuntu k'alilenga kushabuka orubibi rw'ekigo ekyo ahungiremu,

²⁷ alikweholera kiitwa akamushanga enjai y'ekigo ekyo ekyo ahungiiremu akamwita, talikwatwa mushango ogwo.

²⁸ Aha rw'okuba kiitamuntu naragirwa kwikara omu kigokye ky'obuhungiro kuhika aha kufa kw'Omukuhani Nyamukuru muno, aho abe nirwo agaruka omuka.”

²⁹ “Ebiragiro ebi n'emigenzo egi mubikwate oburora bwanyu bwona hona hona mbali mulikatura.

³⁰ Kaishe muntu aliita ondijo, kugya kumwita hazokweho buzima abajulizi babili. Kyonkai ataliitwa hazokire omujulizi omoi.

³¹ Kandi mutalitora kya kuchungura muntu aisire ondijo kandi okwo naragirwa kwitwa. Owab'ogwo bamwite.

³² Kandi mutalikiliza eky'okuchungura omuntu ahungiire omu kigo ky'okuhungiramu, k'agaruka omuka kandi okwo Omukuhani Nyamukuru muno atakafire.

³³ Ensi eyo mulituramu mutaligihagaza. Ahakuba obwamba nibwo buhagaza ensi; kandi okwo eky'okwatilira ensi aha rw'omuntu aisirwe tikyakushoboka, shana kwita amwisire.

³⁴ Ensi eyo mulituramu mutaligihagaza, enshonga inye Omukama ndiba nintura n'Abaisiraeli omu nsi egyo.”