Orubara 32 - Ebibulia 2001

Enganda Ezasigaire Oburugaizoba bwa Yorudani

¹ Abarubeni n'Abagadi bakaba baina ente zingi muno. Kababoine ensi ya Yazeri n'eya Gileadi zili nsi zirungi z'okulisizamu ente,

² aho Abagadi n'Abarubeni baija bagambira Musa na Eleazari omukuhani n'abebembezi b'eihanga bati,

³ “Ebigo bya Ataroti, Diboni, Yazeri, Nimura, Heshiboni, Eleale, Sebamu, Nebo na Beoni,

⁴ bili omu nsi ey'eihanga lya Isiraeli liliire omu mani g'Omukama. Ensi egi nungi y'okulisizamu ente; kandi ichwe abairu bawe ebitunganwa ebyo twinabyo.”

⁵ Bashuba bamugambira bati, “Waitu osingire, ichwe abairu bawe, batuhe ensi egi tugitware, otatushabura Yorudani.”

⁶ Nawe Musa abaza Abagadi n'Abarubeni ati, “Barumuna banyu bagye omu ndashana inywe mushuntamire aha?

⁷ Kubaki mumare Abaisiraeli ekihika ky'okushabuka kugya omu nsi eyo Omukama yabahaire?

⁸ Okwo nikwo baisheinywe bagizire orwo nabatumire kurambura ensi egyo, tukyali Kadeshibarinea.

⁹ Aha rw'okuba orwo batahire omu Ruhanga rwa Eshikoli bakabona ensi egyo, bamara Abaisiraeli amani g'okugya omu nsi eyo Omukama abahaire.

¹⁰ Kir'ekyo Omukama akanigara muno, yarahira ati,

¹¹ ‘Omu mazima abantu abarugire Misiri, kwema aha baina emyaka 20 n'okugya omu maisho, taliho n'omoi alibona nsi eyo nanahiire kuha Aburahamu, Isaka na Yakobo, tibangiliire bwesigwa obumazire.

¹² Taliho n'omoi shana Kalebu mutabani wa Yefune Omukenizi na Yoshua mutabani wa Nuni, abo besigwa kakimoi ahali inye.’

¹³ Omukama akwatirwa Abaisiraeli ekiniga, abaleka bajenjera omw'irungu emyaka 40 kuhika orwo abamufakaliire bahoireho.

¹⁴ Mbwenu inywe mwarondora baisheinywe, na inywe mwayenda kufakalira Omukama k'ayeyongera kunigalira muno Isiraeli.

¹⁵ Kuba kamuramushengera, mukanga kuba besigwa ahali wenene, arashuba aitire Abaisiraeli omw'irungu, mara n'inywe muraba mwisize eihanga eli lyona.”

¹⁶ Bonene Abagadi n'Abarubeni bagoba Musa bamugambira bati, “Amahyo gaitu turagazitilira, n'abana baitu tubombekere ebigo.

¹⁷ Ichwe chwenene tukwate ebikwato by'endashana, twebembere Abaisiraeli kuhika orwo tulibatahya omu nsi yabo. Kandi abana baitu balikara omu bigo by'eboma aha rw'okwelinda abanyansi ba munu.

¹⁸ Tituligaruka mu maka gaitu kuhika orwo buli Mwisiraeli alibona omugabogwe omu nsi egyo.

¹⁹ Ichwe titulikwija kugabiranwa na Baisiraeli buseli bwa Yorudani n'okwilirayo. Emigabo yaitu twagiboine kunu oburugaizoba bwa Yorudani.”

²⁰ Musa abagarukamu ati, “Kamulikukora mutyo, mukakwata ebikwato mukatabara kurashanira Omukama,

²¹ buli mushaija n'ebikwatobye akashabuka Yorudani kurashanira Omukama akalemwa akasingira kimoi ababishabe,

²² ensi ekagya omu mikonoye, aho muligaruka mutaina mushango aha Mukama n'aha Baisiraeli. N'Omukama wenene alikiliza okwo ensi egi eli yanyu. Ahanyuma muligaruka oburugaizoba bwa Yorudani, kandi Omukama na Isiraeli baliba batakibatonga kantu. Omukama wenene ensi egi aliba agibahaire.

²³ Kyonkai kamuliba mutagizire mutyo aho muliba mufakaliire Omukama, mara mumanye obutalengeshanyia okwo obufu bwanyu obwo bulibarugiramu ekibonabonyio.

²⁴ Abana banyu mubombekere ebigo, n'entaama zanyu muzombekere ebiraro; mushube mukore okwo mwaragana.”

²⁵ Na bonene bamugarukamu bati, “Ichwe abairu bawe turakora nk'okwo iwe mukama waitu waturagira.

²⁶ Abana baitu na bakazi baitu baraikara omu bigo bya Gileadi, hamoi n'entaama zaitu n'ente zaitu.

²⁷ Kyonkai ichwe chwena abairu bawe abaina ebikwato by'endashana turashabuka, tutabare, turashanire Omukama, nk'okwo iwe mukama waitu waturagira.”

²⁸ Ahanyuma Musa aragira Eleazari omukuhani na Yoshua eya Nuni n'abakuru b'enganda za Isiraeli ati,

²⁹ “K'Abagadi n'Abarubeni bona abaliba baina ebikwato by'endashana balitabara kurashanira Omukama, bakashabuka Yorudani na inywe, bakabajuna kusinga ensi ya Kanaani, aho ensi ya Gileadi mugibahe ebe yabo.

³⁰ Kyonkai kabatalishabuka na inywe baina bikwato, aho na bonene bahabwe hamoi na inywe obutaka omu nsi ya Kanaani.”

³¹ Abagadi n'Abarubeni bahorora bati, “Okwo Omukama yagambira abairu bawe, nikwo tulikora.

³² Tulishabuka twina ebikwato, turashanire Omukama tugiire Kanaani, obutaka bwaitu busigare buseli bwa Yorudani.”

³³ Abagadi n'Abarubeni n'enusu y'oruganda rwa Manase eya Yozefu, Musa yabaha engoma ya Sihoni ey'Abaamori, n'engoma eya Ogi omukama wa Bashani, hamoi n'ebigo n'ensi ezataine engoma ezo zombili.

³⁴ Abagadi bombeka ebigo by'eboma: Diboni, Ataroti, Aroeri,

³⁵ Atirotishofani, Yazeri, Yogibeha,

³⁶ Betinimura na Betiharani. Bombekera n'entaama ebiraro.

³⁷ Abarubeni bombeka Heshiboni, Eleale, Kiriataimu,

³⁸ Nebo na Baalimeoni (amabara g'ebigo ebi bakagahindura), na Sibuma. Ebigo ebindi ebyo bayombekire bakabiha amabara agandi.

³⁹ Aba Makiri eya Manase bakagya Gileadi, bagikwata bagyaka Abaamori ababaire bagilimu.

⁴⁰ Musa aha aba Makiri eya Manase ensi ya Gileadi, baba nimwo batura.

⁴¹ Yairi eya Manase agenda akwata ebyaro byabo abyeta Havotiyairi.

⁴² Kandi Noba agenda akwata Kenati n'ebyaro byayo. Ekigo kya Kenati akakyeta Noba, eibaralye.