Orubara 28 - Ebibulia 2001

Ebihongo bya buli kiro

¹ Omukama akagambira Musa ati,

² “Ragira Abaisiraeli, obagambire ebyo ndikugamba ningira nti, ‘Ebihongo byange, ebitambo by'okwokibwa ebyo mulikumpongera, eby'akataachu akalikunshemelera, mugume mwijuke kubimpongera omu makiro gabyo agaragiirwe.’

³ Obagambire oti, Eki nikyo kihongo ky'okwokibwa ekyo muratambiraga Omukama: Amakiro gona buli kiro Omukama mumutambire obupaya bubili bw'emyana y'entaama, obw'omwaka gumoi obutaina kamogo.

⁴ Akatama akamoi mukatambe bwankya, akandi mukatambe bwaigoro.

⁵ Mushube mugelekeho ekihongo ky'ensano enungi ekilo emoi etabiraine n'erobo lita y'amajuta agakamwire.

⁶ Ekyo nikyo kihongo ky'okwokibwa eky'obutosha eky'okutambira Omukama ekyaragiirwe aha Ibanga lya Sinai, eky'akataachu akarungi.

⁷ Buli mwana gw'entaama gugendweho erobo lita y'ekihongo eky'okunywa. Ekihongo ky'amarwa ekyo mwahongera Omukama, mwihyeho otwarwa mutusheshe ahatakatifu.

⁸ Akataama akandi mukatambe bwaigoro. Mukatambe, mukalekeho ekihongo kyako ky'ensano n'eky'okunywa nk'ebya bwankya. Ekyo kibe kihongo ky'okwokibwa eky'akataachu ak'okushemelera Omukama.”

Ekitambo kya Sabato

⁹ “Aha kiro kya Sabato mutambe obupaya bubili bw'entaama obw'omwaka gumoi obutaina kamogo, hamoi n'ekilo ibili z'ensano nungi etabiraine n'amajuta n'ekihongo ky'okunywa.

¹⁰ Ekyo nikyo kihongo ky'okwokibwa ekya buli Sabato, ekya buli kiro n'eky'okunywa ekikigendaho ebyo bitabulimu.”

Ebihongo by'ekiro kya mbere ky'omwezi

¹¹ “Ahali buli mbandizo y'omwezi mutega nimuhongera Omukama ebihongo by'okwokibwa: Enumi z'ebigeto ibili, empaya y'entaama emoi, kandi obupaya mushanju bw'entaama obw'omwaka gumoi obutaina kamogo.

¹² Buli numi egendweho ekihongo ky'ekilo ishatu z'ensano nungi etabiraine n'amajuta, kandi empaya emoi y'entaama egendweho ekihongo ky'ekilo ibili z'ensano enungi etabiraine n'amajuta.

¹³ Omwana gw'entaama gugendweho ekilo emoi y'ensano enungi etabiraine n'amajuta. Ebi bitambo by'okwokibwa eby'akataachu ak'okushemelera Omukama.

¹⁴ Ebihongo eby'okunywa, eby'okugenda ahali ebyo, mugire elita ibili z'edivai aha rwa buli numi. Empaya y'entaama mugiteho elita emoi n'enusu z'edivai, kandi omwana gw'entaama gugendweho elita emoi. Nibyo bihongo bya buli mwezi eby'okwokibwa omwaka gwona.

¹⁵ Ekihongo kya buli kiro eky'okwokibwa, hamoi n'ekihongo kyakyo eky'okunywa, bigelekweho ekihongo ky'okuhongera Omukama eky'empaya y'embuzi aha rw'enyatano y'amafu.”

Ebihongo aha bugenyi bw'emikate etatumbisiibwe

¹⁶ “Pasika y'Omukama eshemezibwe aha kiro kya ikumi na binai ky'omwezi gwa mbere.

¹⁷ Ekiro kikuru kyonene kikorwe bukeire, aha kiro kya ikumi na bitanu. Mube nirwo mulya omukate gutaina itumbyo kumara ebiro mushanju.

¹⁸ Aha kiro kya mbere orwo mulikulya omukate gutaina itumbyo, habeho enteko, mufukame; mutalikora mulimo gwa mpita.

¹⁹ Mutambe ebitambo, muhongere Omukama ebihongo by'okwokibwa: Enumi ibili z'ebigeto, empaya y'entaama, n'obupaya mushanju bw'emyana y'entaama obw'omwaka gumoi obutaina kamogo.

²⁰ Muteho n'ebihongo by'ensano etabiraine n'amajuta ebigendanwa n'ebitambo ebyo: Enumi mugiteho ekilo ishatu z'ensano; empaya y'entaama mugiteho ekilo ibili;

²¹ kandi buli mwana gw'entaama, kilo emoi.

²² Mushube mugire empaya y'embuzi aha rw'ekihongo ky'enyatano y'amafu kwatilira amafu ganyu.

²³ Orwo mulikutamba ebitambo ebi, ekihongo eky'okwokibwa ekya buli kiro bwankya nikiba kitabulimu.

²⁴ Kutyo buli kiro omu biro mushanju mutambire Omukama ekitambo ky'okwokibwa, eky'akataachu k'okumushemelera. Ekitambo eki kigirwe eli nyongelera aha kitambo kya buli kiro hamoi n'ekitambo ky'okunywa ekikigendaho.

²⁵ Aha kiro kya mushanju habeho enteko, mufukame. Mutalikora mulimo gwa mpita.”

Ebihongo eby'Obugenyi bw'Amagesha

²⁶ “Aha kiro kya mbere ky'Obugenyi bw'Amagesha, orwo mulikuganuza Omukama omu bugenyi bw'amalimansi mushanju habehoga enteko, mufukame. Kir'ekyo mutalikora mulimo gwa mpita.

²⁷ Muhongere Omukama ekitambo ky'okwokya eky'akataachu k'okumushemelera: Enumi ibili z'ebigeto, empaya emoi y'entaama, n'obupaya mushanju bw'entaama obw'omwaka gumoi.

²⁸ Kwakwo ebihongo ebi bigendweho ebihongo byabyo eby'ensano nungi etabiraine n'amajuta. Enumi negendwaho ekilo ishatu z'ensano; empaya z'entaama buli emoi negendwaho ekilo ibili z'ensano;

²⁹ kandi emyana y'entaama omushanju buli gumoi nigugendwaho ekilo emoi.

³⁰ Mushube muteho empaya y'embuzi aha rw'okwatilira amafu ganyu.

³¹ Ebihongo ebi mubigire hamoi n'ebihongo byabyo eby'okunywa ebikabigendaho. Ahonu ekihongo eky'okwokibwa ekya buli kiro n'ekihongo kyakyo eky'ensano bitabulimu. Mwekomeleze bitagira kamogo.”