Orubara 25 - Ebibulia 2001

Abaisiraeli ahali Peori

¹ Orwo Abaisiraeli babaire basisiire Shitimu, abandi babanza kushemera n'Abamoabu.

² Bagenda babo aba bata nibabeta aha magenyi g'okutambira baruhanga babo ebitambo. Abaisiraeli kabaijaga balya nabo aha bitambo ebyo, bafukamira na baruhanga babo.

³ Kityo babera kimoi ba Baali owa Peori. Aho Omukama abakwatirwa ekiniga kingi muno.

⁴ Agambira Musa ati, “Leta abakuru b'eihanga bona, obashe, obahanike baterwe omushana, nyije ndekere kunigalira Isiraeli.”

⁵ Musa agambira abaramuzi ba Isiraeli ati, “Buli omoi, inywena, aite abantube abekwete Baali owa Peori.”

⁶ Omwisiraeli omoi agya aleta Omumidiani orwo Musa n'Abaisiraeli babaire bali omu maisho g'Eihema ly'Omuterano batekire ekibi.

⁷ Finehasi eya Eleazari, mwijukuru wa Aroni omukuhani, kayaboine eihano elyo, yaimuka omu mbaga, yabarata eichumu,

⁸ yahondera Omwisiraeli ogwo omw'Ihema omunda, yabachumita bombili, eichumu lyabaturukirana. Nikwo ekibundo ekyabaire nikiita Abaisiraeli kulekera.

⁹ Abantu bona abagwire omu kibundo ekyo bakagoba 24,000.

¹⁰ Omukama agambira Musa ati,

¹¹ “Finehasi eya Eleazari, mwijukuru wa Aroni omukuhani, ammazire ekiniga aha Baisiraeli. Okufukamira Ruhanga wena wena atali inye kumutamire, nikyo ntanigalire nkabasilikya.

¹² Kityo omugambire okwo nakora nawe endagano eligumaho amakiro gona agalija.

¹³ Wenene na baijukurube balikara bali bakuhani, aha rw'okuba anokeire okufukamira baruhanga abandi yandwanilira, yalihilira Abaisiraeli.”

¹⁴ Omwisiraeli ayaitirainwe n'Omumidiani eibaralye hakaba ali Zimuri eya Salu, mara ali mukuru w'oruganda rwa Simeoni.

¹⁵ Kandi Omumidiani ayaisirwe hakaba nayetwa Kozubi muhara wa Zuri. Zuri nawe omu Bamidiani hakaba ali mukuru w'oruganda.

¹⁶ Omukama akagambira Musa ati,

¹⁷ “Otuntuze Abamidiani, obaite,

¹⁸ ahakuba babakozire kubi orwo mubaire muli Peori, babagobeza. Kandi obature Kozubi munyanyabo, muhara w'omukuru w'oruganda omu Bamidiani bonene, aisirwe aha rw'ekibundo kibaire kiteire Peori.”