Orubara 24 - Ebibulia 2001

¹ Orwo Balaamu yaboine okwo Omukama alikugonza k'aha Abaisiraeli omugisha, tiyagenzire nk'okwo yabaire yagenzire mirundi endijo kubaza. Amaisho agahanga omw'irungu.

² Aleba, abona okwo Abaisiraeli basisiire, buli ruganda harwo. Aho Ruhanga amwija aha mutwe,

³ abanza kuranga ati, “Ekigambo kya Balaamu eya Beori, ekigambo ky'omuntu ow'amaisho galikubonage.

⁴ Ekigambo eky'omuntu ahulira ebigambo bya Ruhanga, alikubona ebyo Rushoborabyona alikumwoleka, ajumaire ahansi kyonkai amaishoge gaburwire:

⁵ Amahema gawe garungi gatai, iwe Yakobo, zirungi zitai ensisira zawe, iwe Isiraeli!

⁶ Zeyanjaire zagoba harai nk'empita, zashusha emisiri aha rubaju rw'omwiga, zili nk'emiti y'omugaju eyo Omukama yabyaire, ni nk'emiti y'emielezi aha rubaju rw'omugera.

⁷ Abaisiraeli balibona enjura nyingi, n'ebyo balibiba bilibona amaizi gangi. Omukama wabo aliba muhango kukira Agagi, n'engomaye eliba mpango muno.

⁸ Ruhanga hakabaihya Misiri; amani aina ag'embogo. Balimaraho amahanga g'ababisha babo, amagufa gabo bagashekenyure, babarashe emyambi ebaturukirane.

⁹ Bainama kandi babyama nk'entare enshaija, bashusha n'entare enkazi; n'ohai ow'okubaimukya? Alibaha omugisha wena ahabwe omugisha, alibaraama wena n'akaraamwe.”

¹⁰ Balaki akwatirwa Balaamu ekiniga kingi, atera oruganja. Amugambira ati, “Nkwesire kundaamira ababisha bange, mbwenu wagobya emirundi eshatu nobaha omugisha?

¹¹ Aha rw'ekyo iruka oshube omuka. Ngambire okwo ndakuha ekitinwa, kyonkai Omukama yakwimisa ekitinwa ekyo.”

¹² Balaamu abaza Balaki ati, “Entumwa zowantumireho tinazigambiire nti,

¹³ ‘N'orwo Balaki yakumpa enjuye eijwire efeza n'ezahabu, tinakuchwa muhango gwa Mukama kukora okwo nayenda na kirungi na kibi; nkagamba okwo ekyo Omukama alikugamba nikyo ndagamba?’ ”

Balaamu naranga ely'enzindo

¹⁴ Balaamu agambira Balaki ati, “Leba nashuba owaitu. Mbwenu ija nkugambire ebyo Abaisiraeli aba balikora omu makiro agalija.”

¹⁵ Abanza kuranga ati, “Ekigambo kya Balaamu eya Beori, ekigambo ky'omuntu ow'eliisho liburwire,

¹⁶ ekigambo ky'omuntu ahulira ebigambo bya Ruhanga, akamanya ebyo Rukirabyona amanya, akabona ebyo Rushoborabyona amwoleka, ajumara ahansi kyonkai amaishoge gaburwire.

¹⁷ Inye nyenene nimubona kyonkai ti mbwenu aha; nimubona, kyonkai tali haihi; Omukama alikushamura, enyanyinyi eliruga omwa Yakobo, enkoni y'obutwazi eliruga omwa Isiraeli; elishekenyura abatwazi b'Abamoabu, baijukuru ba Sheti elibasilikya bona.

¹⁸ Edomu elinyagwa, kwakwo n'aba Seiri, ababishabe, balisingwa; kyonkai Isiraeli elikora eby'obumanzi.

¹⁹ Omutwazi aliruga omwa Yakobo, n'ebigo ebiliba bihonokire biliranduka.”

²⁰ Ahanyuma omu kubonekerwakwe, Balaamu abona Abaamaleki, aranga ati, “Abaamaleki eihanga elyakizaga amahanga amani, kyonkai aha maheleruka balisilika.”

²¹ Omu kubonekerwakwe, ashuba abona Abakeni, aranga ati, “Mbali mulikutura hagumire, nihashusha ekishunkuli ekili aha ibare eiguru;

²² kyonkai Abakeni bona abo balifa omwebura, Abaasiria babatware endore.”

²³ Balaamu aranga ati, “Ai bambi, n'ohai alihunga orwo Ruhanga alikora atyo?

²⁴ Emeli ziliruga Kitimu, Ababisha abalizijamu basilikye Asiria na Eberi kyonkai na bonene ahanyuma barandukire kimoi.”

²⁵ Aho Balaamu aimuka ashuba owabo, na Balaki agendabwe.