Orubara 23 - Ebibulia 2001

Balaamu naranga elya mbere

¹ Balaamu agambira Balaki ati, “Onyombekere aha ealutare mushanju, mara ompe enumi mushanju n'empaya z'entaama mushanju.”

² Balaki akora okwo Balaamu yagamba. Buli ealutare bombili bagitambiraho enumi emoi n'empaya y'entaama emoi.

³ Balaamu agambira Balaki ati, “Yemelera aha rubaju rw'ekitambo kyawe ekyokize, inye ngende, rundi Omukama yakwija kumbona. Ekyo aranyoleka kyona kyona ndakikugambira.” Aho atemba aha ibanga eiguru.

⁴ Balaamu agya abonangana na Ruhanga amugambira ati, “Natekateka ealutare mushanju, buli emoi nagitambiraho enumi n'empaya y'entaama.”

⁵ Omukama atuma Balaamu ati, “Oshube ahali Balaki omugambire oti n'oti.”

⁶ Balaamu agaruka ahali Balaki, amushanga ayemeleire aha rubaju rw'ekitambokye ekyokize hamoi n'abatwazi bona ba Moabu.

⁷ Balaamu wenene abanza kugamba ati, “Balaki onyihire Aramu, Omukama wa Moabu anyihire omu mabanga g'oburugaizoba, ati, ‘Ija ondaamire Yakobo, ija onkeenere Isiraeli!’

⁸ Nakuraama ntai owo Ruhanga ataraamire? Nakukeena ntai owo Omukama atakeenire?

⁹ Aha rw'okuba Yakobo nimulebera aha mabanga eiguru, Isiraeli nimuleba nyemire aha mitwe y'enshozi. Leba, ihanga elitwire lyonkai, mara nibemanya okwo bali baberwa kushaga amahanga agandi.

¹⁰ N'ohai ayakubona baijukuru ba Yakobo akanguti? N'erobo yonkai ya Isiraeli ebarwe ohai? Nfe kyonkai nfe orufu rw'omurungi, mpeleruke nk'omuntu akorage!”

¹¹ Balaki abaza Balaamu ati, “Wankoleraki? Nkulesire kundaamira ababisha bange, mbwenu leba toina kyo wakora shana okubaha omugisha!”

¹² Balaamu amuhorora ati, “Inye nsige kugamba ebyo Omukama alikundagira kugamba?”

Balaamu naranga elya kabili

¹³ Balaki agambira Balaamu ati, “Ija tugende ahandi mbali orashobora kubabonera. Orabona abailiire haihi, tolikwija kubabona bona. Aho obe niho oyema kubandamira.”

¹⁴ Amutwara omu kangaratete ka Zofimu, aha mutwe gw'Eibanga lya Pisiga. Ayombekayo ealutare mushanju, buli emoi yagitambiraho enumi n'empaya y'entaama.

¹⁵ Balaamu agambira Balaki ati, “Yemelera aha rubaju rw'ekitambo kyawe ekyokize, ngye kulinya mbonangane n'Omukama.”

¹⁶ Omukama abonangana na Balaamu, amugambira ebyo aragamba, ati, “Ogaruke ahali Balaki, oku obe nikwo omugambira.”

¹⁷ Balaamu aija ahali Balaki, amushanga akyayemeleire aha kitambokye ekyokize, aina abatwazi ba Moabu. Balaki amubaza ati, “Omukama yakugambiraki?”

¹⁸ Aho Balaamu ahorora ati, “Balaki imuka, ohulire; ontege amatwi, iwe mutabani wa Sipori

¹⁹ Ruhanga ti muntu, kugir'oti yakubeiya, kandi ti kashoke, kugir'oti yakwefuuhya. Ebyo yagambiire talibikora? Anga ekyamurugire kanwa talikigobesheleza?

²⁰ Leba, ndagiirwe kubaha omugisha, Ruhanga agubahaire, tinakugubaka.

²¹ Tiyabona kabi omuli Yakobo, anga kubona Baisiraeli bamushengire. Omukama Ruhanga wabo abasingiiremu, nabo nibazina okwo Omukama niwe aba Mukama wabo.

²² Ruhanga abaihire Misiri, amani aina ag'embogo.

²³ Ow'okuroga Yakobo taliho; taliho w'okutega Isiraeli ngisha. Abantu baligamba ahali Isiraeli bati, ‘Ekyo Ruhanga yabakoleire!’

²⁴ Leba abantu abalikubanduka ahansi nk'entare enkazi; nibabaratuka nk'entare enshaija, tebyama hansi etakaliire bwite bwayo, etakanyoire bwamba bwa bwite obwo.”

Balaamu naranga elya kashatu

²⁵ Balaki agambira Balaamu ati, “Orwo wayanga kubaraama, n'omugisha otagubaha n'akati!”

²⁶ Kyonkai Balaamu ahorora Balaki ati, “Tinkugambiire nti, ‘Byona ebyo Omukama aragamba nibyo ndaragirwa kukora?’ ”

²⁷ Balaki agambira Balaamu ati, “Mbwenu oije nkutware ahandi, rundi Ruhanga yakukunda oyemayo obandaamira.”

²⁸ Kityo amutwara aha katwetwe k'Eibanga lya Peori elyolekeraine n'Eirungu lya Yeshimoni.

²⁹ Balaamu agambira Balaki ati, “Onyombekere hanu aha ealutare mushanju, mara ompe enumi mushanju n'empaya z'entaama mushanju.”

³⁰ Balaki akora okwo Balaamu yagamba. Buli ealutare agitambiraho enumi n'empaya y'entaama.