Orubara 22 - Ebibulia 2001

Omukama wa Moabu natuma ahali Balaamu

¹ Abaisiraeli baimukya, orusisira barutera bolekeire Yeriko omu mpita za Moabu buseli bwa Yorudani.

² Balaki eya Sipori hakaba yaboine ebyo Abaisiraeli bakozire Abaamori.

³ Abamoabu batina muno Abaisiraeli, enshonga bakaba bali bangi, babahahanisa emyoyo.

⁴ Abamoabu bagambira abakuru ba Midiani bati, “Omugana ogu gw'embwa nigwija kuramba ebyo twinabyo okwo ente ekuuta obunyasi mbali yaliira.” Omu biro ebyo omukama wa Moabu hakaba ali Balaki eya Sipori.

⁵ Yatuma entumwa ahali Balaamu eya Beori, ayabaire atwire Petori, aha Mwiga gwa Efurati omu nsi ya Amawi, kumweta. Amuragiraho ati, “Haliho abantu barugire Misiri, ensi bagijwire, mara batwire omu maisho gaitu.

⁶ Mbwenu oije, ondaamire abantu aba, kuba nibankira amani, shana nakushobora kubasinga n'okubaihya omu nsi egi, aha rw'okuba nimanya okwo ow'oha omugisha ahabwa omugisha, n'ow'oraama araamwa.”

⁷ Abakuru ba Moabu n'aba Midiani bakwata emikimba y'okuha omufumu bagenda. Bagoba omwa Balaamu bamugambira ebyo Balaki yabatuma.

⁸ Abagambira ati, “Kir'eki murare hanunju, ndabahorora nyenkya okwo Omukama arangambira.” Kityo abatwazi ba Moabu barara omwa Balaamu.

⁹ Ruhanga aija ahali Balaamu amubaza ati, “Abantu aba ab'oinabo ni bahai?”

¹⁰ Balaamu ahorora Ruhanga ati, “Balaki eya Sipori, omukama wa Moabu antumireho ati,

¹¹ ‘Haliho abantu barugire Misiri, ensi bagijwire. Mbwenu oije obandaamire, shana nakushobora kubarashanisa nkababinga.’ ”

¹² Ruhanga agambira Balaamu ati, “Otagenda nabo mara otakuraama bantu abo ahakuba baina omugisha.”

¹³ Aho bwankya Balaamu agambira abatwazi ba Balaki ati, “Mushube owanyu kuba Omukama yantanga kugenda na inywe.”

¹⁴ Aho abatwazi ba Moabu baimukya bashuba owa Balaki bamugambira bati, “Balaamu yayanga kwija na ichwe.”

¹⁵ Balaki ashuba atuma abatwazi abandi, abangi kushaga aba mbere mara ab'ekitinwa kukiraho.

¹⁶ Baija omwa Balaamu bamugambira bati, “Balaki eya Sipori nagamba ati, ‘Hatabaho kya kukutanga kwija;

¹⁷ ndakuha ekitinwa kingi, mara nkore kyona kyona eky'orangambira. Oije ondaamire abantu aba.’ ”

¹⁸ Nawe Balaamu ahorora abairu ba Balaki ati, “N'orwo Balaki yakumpaire enjuye eijwire efeza n'ezahabu, tinakugireyo kuchwa muhango gw'Omukama Ruhanga wange, n'akati.

¹⁹ Mbwenu nimbashaba mushube murare hanu na kir'eki, manye kushagaho ekyo Omukama arangambira.”

²⁰ Ruhanga aija ahali Balaamu omu kiro amugambira ati, “K'abantu aba baraba baizire kukweta, imuka ogende nabo; ekyo ndakuragira kyonkai nikyo orakora.”

Balaamu n'Endogobeye

²¹ Bwankya Balaamu aimuka, ateka amatandiko aha ndogobe, agenda n'abatwazi ba Moabu.

²² Kyonkai okugendakwe kunigaza muno Ruhanga n'omumalaika w'Omukama ayemelera omu muhanda kumutanga. Akaba akuubire endogobeye aina n'abairube babili.

²³ Endogobe ebona omumalaika w'Omukama ayemeleire omu muhanda, akwete embanda eshohorogokire omu ruraro. Endogobe eruga omu muhanda egya omu kikamba. Balaamu agitera kugigarura omu muhanda.

²⁴ Aho omumalaika w'Omukama ayemelera omu kahanda kafunzire omugati y'omusiri gw'emizabibu, n'orukuta rumuli oku n'oku.

²⁵ Orwo endogobe yaboine omumalaika ogwo w'Omukama esima orukuta, etekelera Balaamu okuguru aha rukuta orwo. Balaamu ashuba agitera.

²⁶ Aho omumalaika w'Omukama agenda omu maisho, ayemelera ahafunzire muno, ahataina buhindukiro obulyo anga obumosho.

²⁷ Orwo endogobe yamuboine ebwarama ahansi okwo Balaamu akagili aha mugongo. Balaamu atamwa muno agiteza enkoni.

²⁸ Omukama akomorora endogobe akanwa. Ebaza Balaamu eti, “Nakukoleraki kuntera emirundi eshatu egi?”

²⁹ Balaamu agihorora ati, “Kuba wanzanisa. Kanakuba naba nkwete embanda nakukwisire.”

³⁰ Endogobe emubaza eti, “Tindi ndogobe yawe ey'otuura nokuuba oburora bwawe bwona kugoba mbwenu? Ebi ndabikukozire?” Agihorora ati, “Chei.”

³¹ Aho Omukama aburuza Balaamu amaisho, abona omumalaika ayemeleire omu muhanda, akwete embanda eshohorogokire omu ruraro; ainama, agwa ahansi ajumaire.

³² Omumalaika w'Omukama amubaza ati, “Emirundi eshatu egi endogobe yawe wagiteleraki? Naija kukutanga omu muhanda aha rw'okuba mbali olikugya tindikwendayo.

³³ Endogobe yambona emirundi eshatu neshuba aha rubaju. Kuba etashuba kashatu aha rubaju kumpigiza, mazima mbwenu aha nakuba nakwisire mara yonene ngileka.”

³⁴ Balaamu agambira omumalaika w'Omukama ati, “Nafakara, kyonkai naba ntalikumanya okwo waba nompimbira muhanda. Aha rw'ekyo orwo olikubona okwo ndikukora kubi, nagaruka omuka.”

³⁵ Omumalaika w'Omukama amugambira ati, “Abantu abo ogende nabo; nawe ekigambo ekyo ndakuragira kyonkai obe nikyo ogamba.” Aho Balaamu agenda n'abatwazi ba Balaki.

Balaki nachwekera Balaamu

³⁶ Orwo Balaki yahuliire okwo Balaamu yaija, agenda Ari kumuchwekera aha Mwiga gwa Arinoni orubibi rwa Moabu.

³⁷ Balaki abaza Balaamu ati, “Orwo nakutumireho kubaki tiwaizire?”

³⁸ Balaamu amushubamu ati, “Mbwenu naija! Nyina obushobora kugira ekyo nagamba kyona kyona? Ekigambo ekyo Ruhanga arandagira kugamba nikyo ndagamba.”

³⁹ Aho Balaamu agenda na Balaki bagya Kiriatihuzoti.

⁴⁰ Balaki atamba enumi n'entaama, atumaho Balaamu n'abatwazi abo yabaire ainabo kubaha enyama.

⁴¹ Bukeire Balaki atwara Balaamu aha ibanga eiguru elilikwetwa Bamotibaali kushobora kugira Abaisiraeli abo yabonaho.