Orubara 16 - Ebibulia 2001

Okushenga kwa Kora na batahibe

¹ Kora eya Izihari, Izihari eya Kohati, Kohati eya Levi na Datani na Abiramu batabani ba Eliabu, na Oni eya Peleti, ab'oruganda rwa Rubeni, bashenga,

² baimukira Musa, bema n'Abaisiraeli 250 abali bakuru omw'ihanga, ab'eiranga ababaire batairweho embaga.

³ Bema hamoi batabalira Musa na Aroni, babagira bati, “Mwashaga amashenyero! Eihanga lyona litakatifu, buli omoi mutakatifu, mara Omukama asingiire omw'ihanga eli. Mbwenu inywe kubaki nimweteka eiguru, nimugaya abantu?”

⁴ Musa kuhulira atyo, ajumara ahansi.

⁵ Agambira Kora n'ekisimbakye kyona ati, “Bukeire bwankya Omukama arazora owa wenene, azore omutakatifu, mara ogwo niwe arajubura kugoba aha alutare.

⁶ Iwe Kora, n'abawe bona mukore muti: Mukwate ebyotezo;

⁷ mubitemu amakara g'omuliro n'obunuma mubitware alutare. Nyenkya omuntu owo Omukama araihyaho niwe araba ali mutakatifu. Inywe Balevita inywe, mwashaga amashenyero!”

⁸ Musa ashuba agambira Kora ati, “Hulira inywe Balevita:

⁹ Nimugira muti kigambo kike ahali inywe kubona Ruhanga yabahwire omw'ihanga lya Isiraeli kubehikya? Akabashorora kamumukolera omu kiikarokye, kukolera n'embagaye;

¹⁰ akabehikya inywe n'Abalevita abanyaruganda banyu. Mbwenu nimwenda n'obukuhani kabuba bwanyu?

¹¹ Aha rw'ekyo iwe n'ekisimba kyawe kyona mwageleka Omukama. Aroni n'ohai owo mulikunjojobera?”

¹² Musa atuma kweta Datani na Abiramu batabani ba Eliabu; kyonkai bonene bahorora bati, “Titulikwijayo!

¹³ Kigambo kike ahali iwe kubona okatwihya omu nsi elikusheshekana amatai n'obwoki, kutwitira omw'irungu, noshuba noyenda kwehindura mukama kututwara?

¹⁴ Kandi buzima tiwatugobya mu nsi elikusheshekana matai na bwoki, anga kutuha ndimiro na mizabibu. Abantu aba nogonza kubabunda amaisho? Titulikwijayo!”

¹⁵ Aho Musa akwatwa ekiniga kingi muno, agambira Omukama ati, “Ekihongo kyabo okyange. Taliho owo ndayakire ndogobe, anga kugira owo nakora kubi.”

¹⁶ Ashuba agambira Kora ati, “Nyenkya iwe n'ekisimba kyawe kyona na Aroni mwije aha kiikaro ky'Omukama.

¹⁷ Buli omoi okwo muli akwate ekyotezo ekye akitemu obunuma akilete alutare. Ebyotezo byona hamoi 250. Naiwe kwakwo; na Aroni abulimu; buli omoi n'ekyotezokye.”

¹⁸ Kityo buli muntu akwata ekyotezokye, akitamu amakara g'omuliro n'obunuma, bemelera aha mulyango gw'Eihema ly'Omuterano hamoi na Musa na Aroni.

¹⁹ Kora ahuruza Abaisiraeli bona kugeleka Musa na Aroni, abaleta aha mulyango gw'Eihema ly'Omuterano. Omukama omu kitinwakye abahabukira bona okwo bali hamoi.

²⁰ Omukama agambira Musa na Aroni ati,

²¹ “Abantu aba mubarugemu nyije mbaite omw'ipokya n'omw'iburura.”

²² Kyonkai Musa na Aroni bajumara ahansi batongana bati, “Waitu Ruhanga, Ruhanga entabuko y'oburora bw'abantu bona, omuntu afakare omoi, onigaliire eihanga lyona?”

²³ Omukama agambira Musa ati,

²⁴ “Ogambire abantu baruge omu mahema ga Kora, Datani na Abiramu.”

²⁵ Aho Musa aimuka agya owa Datani na Abiramu; abebembezi ba Isiraeli bamuhondeire.

²⁶ Agambira embaga ati, “Nimbashaba muruge omu mahema g'abantu babi aba, mutakwata aha kintu kyona kyona ekili kyabo, mutaija mukatwalishanibwa nabo mukazira amafu gabo.”

²⁷ Kityo abantu baruga omu mahema ga Kora, Datani na Abiramu. Datani na Abiramu baruga omu mahema gabo bemelera aha milyango, bonene na bakazi babo n'abana babo.

²⁸ Musa agamba ati, “Aha niho muramanyira okwo Omukama niwe yantumire kukora emilimo egi yona, tikugira oti nkora okwo natekeleza.

²⁹ Abantu aba kabarafa emifere eya buli kiro, Ruhanga atabahaire kibonabonyio, aho mpaho araba atantumire.

³⁰ Kyonkai Omukama aije akore ekitakabonekaga, ensi eyashamuke ebamire, n'ebyabo byona ebimire, bagye Sheoli nibaleba, aho muramanya okwo bakunukurwize Omukama.”

³¹ Namara ati kugamba atyo, mbali babaire bali ensi etemuka,

³² eyashamuka ebamira bona n'emitungo yabo yona, n'ababaire bali ba Kora n'ebyabo byona.

³³ Kityo bona n'ebyabo byona bagya Sheoli nibaleba. Ensi eshuba eyebumba, baba nikwo bahwaho batyo.

³⁴ Abaisiraeli bona ababaire bali aho kabahuliire okwo aba baboroga, barugaho bairukire nibagira bati, “Leka ensi etatumira!”

³⁵ Omukama atweka omuliro, gwokya abantu 250 ababaire niboteza obunuma.

Ebyotezo

³⁶ Ahanyuma Omukama agambira Musa ati,

³⁷ “Ogambire Eleazari mutabani wa Aroni, omukuhani, aihye ebyotezo omu mitumbi elikumengeta omuliro, kandi omuliro agunaganage harai,

³⁸ ahakuba ebyotezo ebyo bitakatifu; bakama babyo bafakaire bayeisa. Biheshwemu amabati g'okushweka alutare, enshonga baba babihongeire Omukama. Abaisiraeli balijukiraho.”

³⁹ Kityo Eleazari omukuhani, akwata ebyotezo by'omulinga ebyo abayokiibwe babaire bahongire, abiha abahesi babiheshamu eibati ly'okushweka alutare,

⁴⁰ Abaisiraeli kuta nibaijukiraho, omuntu atali mwijukuru wa Aroni, atali mukuhani, ataliziza kugoba alutare kwoteza Omukama obunuma, atalija hakaba nka Kora na batahibe. Nikwo Omukama yagambiire Eleazari omu kanwa ka Musa.

Aroni narokora embaga

⁴¹ Kyonkai bukeire embaga yona y'Abaisiraeli bajojobera Musa na Aroni bati, “Mwaita abantu b'Omukama.”

⁴² Embaga ezinda Musa na Aroni; kyonkai bonene bahinduka baleba Eihema ly'Omuterano. Eihema lishwekwa ekichwi, Omukama w'ekitinwa ahabuka.

⁴³ Musa na Aroni bagoba aha Ihema elyo,

⁴⁴ Omukama agambira Musa ati,

⁴⁵ “Ruga omu mbaga egi, nyije ngisilikye omw'ipokya n'omw'iburura.” Aho aba babili bajumara ahansi.

⁴⁶ Musa agira Aroni ati, “Kwata ekyotezo kyawe, okitekemu amakara g'omuliro kuruga alutare, okitemu n'obunuma, oyanguhe okitwalire embaga, obatilire. Kuba Omukama yatamwa muno n'ekibundo kyazokire.”

⁴⁷ Kityo Aroni akwata ekyotezo nk'okwo Musa yagamba, airuka agiire omu mbaga. Ekibundo kikaba kyabandize kuzoka omu bantu. Aho ekyotezo ky'omuliro akitamu obunuma, ayatilira embaga.

⁴⁸ Abemeleramu: Okwo aba bafire, aba nibarora, aho ekibundo kilekera.

⁴⁹ Abaisirwe ekibundo bakagoba abantu 14,700; abagwire omu rushengo rwa Kora batabulimu.

⁵⁰ Aho Aroni agaruka ahali Musa aha mulyango gw'Eihema ly'Omuterano, orwo ekibundo kyahoire.