Orubara 14 - Ebibulia 2001

Embaga neyeboroboita

¹ Kir'ekyo eihanga lyona likarara nilichura niliboroga.

² Buli Mwisiraeli ajojobera Musa na Aroni. Eihanga lyona libagambira liti, “Nitube twagwire Misiri, anga nitube twagwire omw'irungu!

³ Kubaki Omukama natutwara omu nsi egyo katugya kugwa aha mbanda? Abakazi baitu n'abana baitu nibaija kutwarwa endore. Ti hakili katwakugarukire Misiri?”

⁴ Bagambirangana bati, “Tuteho omugabe waitu, tugaruke Misiri.”

⁵ Aho omu maisho g'embaga yona y'Abaisiraeli, Musa na Aroni bajumara ahansi.

⁶ Yoshua eya Nuni na Kalebu eya Yefune, ababaire bagenzire n'abandi kurambura ensi, batemura emyendo yabo,

⁷ bagambira Abaisiraeli bona bati, “Ensi eyo turambwire nsi nungi muno.

⁸ Omukama k'aratusingira naija kugitugobyamu akagituha; nsi elikusheshekana amata n'obwoki.

⁹ Ekikuru muleke kushengera Omukama. Kandi abantu bamwo mutabatina; nitwija kubajunga kaizi. Ruhanga waitu yasingire baruhanga babo ababalinda. Kandi Ruhanga waitu wenene ogwo natwemera.”

¹⁰ Kyonkai embaga yona erahira kubateza amabare. Aho Omukama ahabukira Abaisiraeli bona omu kitinwa aha Ihema ly'Omuterano.

Musa nashabira eihanga

¹¹ Abaza Musa ati, “Abantu aba balibaerahai n'okungaya? Isi baliberahai n'okutanyesiga, n'orwo nabakoleire ebitangazo ebyo byona?

¹² Ndabateza endwara mara mbaite. Kyonkai iwe ndakwihyamu eihanga elilikubakira obungi n'okubashagya amani.”

¹³ Nawe Musa agambira Omukama ati, “K'orakora otyo Abamisiri nibaija kukihulira. Manya abantu aba okabaihya Misiri n'amani gawe.

¹⁴ Mbwenu Abamisiri nibaija kubigambira abalikutura omu nsi egyo. Waitu Mukama barahuliire okwo otura n'abantu bawe; okwo waitu Mukama abantu bawe abo bakubona bubona, n'okwo otweka ekichwi kikabebembera: Bwamushana bahaburwa enyomyo y'ekichwi, kandi omu kiro bahaburwa enyomyo y'omuliro.

¹⁵ Iwe k'orabaita okabamaraho bona, aho amahanga agarakuhulize eiranga garagira gati,

¹⁶ ‘Omukama aitiire abantube omw'irungu aha rw'enshonga alemirwe kubagobya omu nsi eyo yabaraganisize.’

¹⁷ Mbwenu ninkutagiliza, singa oyolekye amani gawe okore okwo waragaine orwo wagambire oti,

¹⁸ ‘Omukama tanigara bwangu. Agira ekisha kingi muno, agarulira amafu n'entambara. Kyonkai alibonabonyia abana nabatura amafu ga baishebo kuturuka aha muzarwa gwa kashatu n'ogwa kanai.’

¹⁹ Ninkutagiliza, osinge ogarulire abantu aba amafu gabo, nk'okwo ekisha kyawe kiba kingi. Obaganyire nk'okwo whakabaganyiire kwema obaihire Misiri kugoba mambwenu.”

²⁰ Aho Omukama ahorora ati, “Nabagarulira okwo washaba.

²¹ Nawe n'inyerahira kwo, inye Omukama w'ekitinwa omu nsi zona,

²² abaraba baramboine okwo ngira ekitinwa, ababoine ebitangazo ebyo nakozire Misiri n'omw'irungu, bakashuba bagobya emirundi egi ikumi nibampahuza, bakanga kuhikya ebyo ndikugamba,

²³ taliho n'omoi alibona nsi eyo narahiire kuha baishebo. Kandi abangahire bona nabo taliho aligibona.

²⁴ Kyonkai omwiru wange Kalebu orwo aina omutima ogulikweshusha, mara mwesigwa muno ahali inye, ogwo ensi eyo yagobiremu ndigimutahyamu, kandi baijukurube baligilya.

²⁵ Mbwenu orwo Abaamaleki n'Abakanaani balikutura omu mpanga, nyenkya muhinduke mugye omw'irungu, mutwarwe omuhanda ogulikugya aha Nyanja Rutuku.”

Omukama naita abantu aha rw'okweboroboita

²⁶ Omukama abaza Musa na Aroni ati,

²⁷ “Abantu babi aba baliberahai n'okunjojobera? Abaisiraeli okunjojobera kwabo nakuhuliire.

²⁸ Mubagambire okwo ndikwerahira! Ebyo bagambire mbahuliire, nanye nikwo ndabagira.

²⁹ Nibaija kufa, emitumbi yabo ekarambira omw'irungu. Abakabazirwe bona kubandiza aha b'emyaka 20 n'okutemba, abanjojobeire,

³⁰ taliho n'omoi aligoba omu nsi eyo naragaine kubaha kuturamu; shana Kalebu eya Yefune na Yoshua eya Nuni nibo baligobamu.

³¹ Kyonkai abana banyu abo mwagambire okwo balitwarwa endore, nabo ndibagobyamu, babone ensi eyo bagahire.

³² Kandi bonene baragwa omw'irungu emitumbi yabo erambiire omwo.

³³ Abana babo balimara emyaka 40 omw'irungu nibaliisa ebitunganwa, bazire amafu gabo, kulemwa kuhika orwo ow'enzindo omuli bonene aligwa omw'irungu.

³⁴ Ebiro 40 ebyo bamazire nibarambura ensi, ekiro kimoi guliba mwaka. Mulishasha muzire amafu ganyu emyaka 40 yona, mumanye okwo ntashemeleirwe.

³⁵ Alikugamba n'inye Omukama. Eihanga libi eli elyemire hamoi kunshenga, ndibakora ntyo. Balihweraho kimoi omw'irungu eli, baligwemu.”

³⁶ Abantu abo Musa yatumire kurambura ensi, kabagarukire babeiya embaga, baletera eihanga lyona kujojobera Omukama.

³⁷ Aho Omukama yabateza ekibundo, bafa.

³⁸ Kyonkai Yoshua eya Nuni na Kalebu eya Yefune nibo bahungireho ahali balinya ababaire bagiire kurambura Kanaani.

Nibalenga kubunda ensi elya mbere

³⁹ Musa agambira Abaisiraeli bona ebigambo ebyo; embaga echura muno.

⁴⁰ Baimukya bwankya karai nibagamba bati, “Leba tuli aha. Tugembe mbali Omukama yatushubiize. Nitwikiliza okwo tufakaire.” Aho batemba omu mabanga eiguru kurashanisa ensi egyo.

⁴¹ Nawe Musa agamba ati, “Kubaki mbwenu nimuchwa omuhango gw'Omukama? Ebyo tibishoboke.

⁴² Mutagyayo ababisha banyu bakabaita; aha rw'okuba Omukama tabemiremu.

⁴³ Nimwija kugwa omu Baamaleki n'omu Bakanaani bakabaisa embanda, enshonga mulekeire kuba besigwa aha Mukama. Omukama talikwija kubemamu.”

⁴⁴ Kyonkai bonene bazigilira kutemba omu mabanga eiguru, n'orwo Musa yasigaire omu rusisira hamoi n'Esanduku ly'Omukama ly'Endagano.

⁴⁵ Aho Abaamaleki n'Abakanaani abaturaga omu mabanga ago basongoka, babatera, mara bababinga babagobya Horima.