Orubara 13 - Ebibulia 2001

Abarambuzi

¹ Omukama agambira Musa ati,

² “Otume ab'okurambura ensi ya Kanaani eyo ndikuha Abaisiraeli. Buli ruganda otume araba ali mukuru warwo.”

³ Kityo Musa akora okwo Omukama yamuhangira. Ayema omw'Irungu lya Parani, atuma abakuru b'enganda bona omuli Isiraeli.

⁴ Aga nigo mabara gabo: Omu ruganda rwa Rubeni hakarugwamu Shamua eya Zakuri.

⁵ Omu ruganda rwa Simeoni hakarugwamu Shefati eya Hori.

⁶ Omu ruganda rwa Yuda hakarugwamu Kalebu eya Yefune.

⁷ Omu ruganda rwa Isakari hakarugwamu Igali eya Yozefu.

⁸ Omu ruganda rwa Efuraimu hakarugwamu Hoshea eya Nuni.

⁹ Omu ruganda rwa Benjamini hakarugwamu Paluti eya Rafu.

¹⁰ Omu ruganda rwa Zabuloni hakarugwamu Gadieli eya Sodi.

¹¹ Omu ruganda rwa Manase (nirwo rwa Yozefu) hakarugwamu Gadi eya Susi.

¹² Omu ruganda rwa Dani hakarugwamu Amieli eya Gemali.

¹³ Omu ruganda rwa Asheri hakarugwamu Seturi eya Mikaili.

¹⁴ Omu ruganda rwa Nafutali hakarugwamu Nabi eya Wofusi.

¹⁵ Omu ruganda rwa Gadi hakarugwamu Geweli eya Maki.

¹⁶ Aga nigo mabara g'abantu abo Musa yatumire kurambura ensi. (Hoshea eya Nuni, Musa akamuhindura eibara yamweta Yoshua).

¹⁷ Musa abatuma kugya kurambura Kanaani, abaragira ati, “Mutahire Negebu, mwinugukire omu nsi y'amabanga,

¹⁸ mubone emishusire y'ensi, mumanye abantu abalikutura omwo nka baina amani anga niboroba, nka bali bangi anga bali bake.

¹⁹ Mulebe n'ensi eyo balikuturamu nk'eli nungi anga mbi, n'ebigo ebyo balikuturamu nka bina eboma anga chei.

²⁰ Mumanyege nk'ensi neleta anga eina orwonyu, nk'einamu ebibira anga teinabyo. Mugume, mara mwije n'ebiraba byayo.” Kikaba kili kirumo orwo ezabibu zabaire nizibanza kuhisa.

²¹ Kityo bagenda barambura ensi ya Kanaani, babandiza aha Irungu lya Sini bagoba Rehobu, mbali ekigo kya Hamati kilikubandiza.

²² Bataha Negebu, baturuka Heburoni; bashangamu Ahimani, Sheshai na Talimai, baijukuru ba Anaki (Heburoni ekebembera Zoani eya Misiri emyaka mushanju omu kwombekwa).

²³ Bagoba omu Ruhanga rwa Eshikoli, nimwo bashazire orugoobe rw'ezabibu, barutwara babili babili aha muti. Bakatwara n'amakomamanga n'etini.

²⁴ Ensi elinya bakagyeta Ruhanga rwa Eshikoli, aha rw'enshonga y'orugoobe rw'ezabibu orwo Abaisiraeli bashaziremu.

²⁵ Ababaire bagiire kurambura ensi bakagarukira ekiro kya 40.

²⁶ Bagoba Musa na Aroni n'eihanga lyona lya Isiraeli omw'Irungu lya Parani, omuli Kadeshi. Babamanyisa amakuru, bagamanyisa n'eihanga lyona; baboleka n'ebiraba by'ensi egyo.

²⁷ Bagambira Musa bati, “Ensi eyo watutumiremu tukagobamu; nesheshekana amatai n'obwoki, ebi nibyo biraba byayo.

²⁸ Kandi abantu abalikutura omu nsi egyo baina amani. Ebigo bihango muno mara bina eboma. Kandi tuboinemu na baijukuru ba Anaki.

²⁹ Ensi ya Negebu neturwamu Abaamaleki. Ensi ey'amabanga neturwamu Abahiti, Abayebusi n'Abaamori. Abakanaani abo batwire aha rubaju rw'enyanja na bwatana Yorudani.”

³⁰ Nawe Kalebu achuleza abantu ababaire bazingoire Musa nagamba ati, “Tutalinda, tugende tukwate ensi egyo tugituremu, mara nitushobora kugisinga.”

³¹ Aho abo yabaire agenzire nabo bagira bati, “Chei, titulikushobora kusinga bantu bamwo; nibatukiza amani.”

³² Baranza amakuru gabi omu Baisiraeli aha nsi eyo babaire bagiire kurambura. Bagamba bati, “Ensi eyo turambwire erambaza abagituramu, n'abantu abo tuboinemu bishoka.

³³ Tuboinemu Abanefili. (Baijukuru ba Anaki batabuka omu Banefili). Ahali bonene tweboine tuli bake nitushusha ensenene, nabo nikwo batuboine.”