Orubara 12 - Ebibulia 2001

Miriamu nabemba

¹ Miriamu na Aroni baija bageya Musa aha rw'okushwera Omukushikazi,

² nibebaza bati, “Honene Omukama agambiire omu kanwa ka Musa wenkai? Manya na ichwe agambiire omu kanwa akaitu.” Omukama akihulira.

³ Musa hakaba ali muntu omufura muno kushaga abantu bona omu nsi.

⁴ Aho n'aho Omukama amugambira ati, “Inywenshatu mugye aha Ihema ly'Omuterano!” Bonshatu bagenda.

⁵ Omukama asongoka omu nyomyo y'ekichwi, ayemelera aha mulyango gw'Eihema, ayeta Aroni na Miriamu, baija bombili.

⁶ Abagambira ati, “Muhulire ebyo naija kugamba. Kamuraba mwina omurangi, inye Omukama n'inye mubonekera nkamwemanyisa, nkafumora nawe omu kiroto.

⁷ Kyonkai tikwo ngira ntyo Musa omwiru wange. Wenene nkamukwasa eihanga lyange lyona.

⁸ Nfumora nawe bufumora tutalikusindata, tufumora ebilikushoboka, mara ambona bubona. Aho kubaki inywe mutatinire kugeya Musa omwiru wange?”

⁹ Omukama abatamwa muno, ashuba agenda.

¹⁰ Orwo ekichwi kyarugire aha Ihema, niho honkai Miriamu hakaba yabembire, yayezire nk'orubare. Aroni kuleba Miriamu abona okwo yabemba;

¹¹ agambira Musa ati, “Rugaba rwange, tukozire obufera twafakara; singa otatubonabonyia.

¹² Ninkutagiliza otamushushanisa mwana azarwa afire, aruga omu nda ya nyina ajunzire anonombokire orubaju.”

¹³ Aho Musa atakira Omukama ati, “Waitu Ruhanga, ninkutagiliza, okize Miriamu.”

¹⁴ Kyonkai Omukama wenene abaza Musa ati, “Ka ishe yakumuchweleire omu maisho, tiyakumazire biro mushanju omu kibonabonyio? Mbwenu aruge omu rusisira ebiro mushanju, orwo birahwa ajuburwe kurugarukamu.”

¹⁵ Kityo Miriamu bamwihya omu rusisira ebiro mushanju. N'abantu bakelererwa kwimukya orugendo, balinzire Miriamu kubanza kujuburwa kugaruka omu rusisira.

¹⁶ Ahanyuma baruga Hazeroti, bagya basisira omw'Irungu lya Parani.