Orubara 11 - Ebibulia 2001

Omwanya gwa Tabera

¹ Ahanyuma abantu babanza kweboroboitera Omukama aha rw'amatangwa agabagwireho. K'Omukama yahuliire okwo bamweboroboitera yabanigalira muno. Nirwo yasindikire omuliro gukokya empelero z'orusisira.

² Kandi aho abantu bonene batakira Musa. Musa ashaba aha Mukama, omuliro gwarara.

³ Nikyo omwanya ogwo gwayeteirwe Tabera aha rw'enshonga y'omuliro ogwarugire aha Mukama gukokya omu nsisira zabo.

Musa naronda abebembezi nshanju

⁴ Omu Baisiraeli abo hakaba halimu abagendaga nabo, baija bagira orwoyoyo rungi muno orw'enyama. Abaisiraeli nabo babanza kushuba kujojoba nibagira bati, “Katwakuboine enyama tukagilya!

⁵ Nitwijuka enfuru ezo twalyaga bushai tuli Misiri, amatango, emyongo, emikubi elikushusha ebitunguru, ebitunguru byonene n'ebitungurusumu.

⁶ Nawe mbwenu amani gatuhwa, mara taliho kantu kona kona shana manu egi eyo tulebire kushai!”

⁷ Manu egyo yashushaga enjuma z'omugusha, kandi rubaju orundi eteleramu nk'oruzinga.

⁸ Abantu bagendaga bagikumakuma bagisa aha mbengo anga bagitwanga omu bitwangiro. Bakaba nibagichumba omu nyungu nibagihamu ekeki. Eminulire yayo ekaba neshusha ekeki ezo batairemu amajuta.

⁹ Orume karwagwaga omu nsisira omu kiro, manu nayo eizirana n'orume orwo.

¹⁰ Musa ahulira okwo abantu omu maka balikweboroboita, buli muntu ayemire aha Ihemalye aha mulyango najojoba. Aho Omukama anigara muno na Musa atamwa.

¹¹ Musa abaza Omukama ati, “Waitu nk'omwiru wawe wamukora kubi? Kiki kutanganyira, kunsebeka embaga egi yona?

¹² Inye abantu bona nkabazara? Nkabaihya Misiri k'oija kungambira oti, ‘Obakikire omu kifuba nk'okwo omulezi akikira enkelemeke kubatwara omu nsi eyo wanahilire baish'enkurubo okwo oligibaha bonene aba?’

¹³ Inye enyama y'okuha abantu aba bona ngihe nkahai. Aha rw'okuba nibanjojobera bati, ‘Otuhe enyama y'okulya.’

¹⁴ Tindikushobora kutwara mbaga egi yona nyenkai, nensikilira muno.

¹⁵ K'oraba noyenda kungira otyo, onyite aho n'aho, nawe k'oraba nonganyira, ntabona naku ezo.”

Omukama naha Musa ab'okumuhwera

¹⁶ Omukama ahorora Musa ati, “Onshombokeze abantu nshanju omu bakuru b'Abaisiraeli, ab'olikumanya okwo baina obukuru mara bebembezi omu mbaga. Obalete aha Ihema ly'Omuterano oyemelere nabo.

¹⁷ Inye ndasongoka nfumore naiwe honene aho. Ndabaha obushobora nk'obwawe, baije bakukwase kutwara embaga, oleke kugitwara iwe wenkai.

¹⁸ Ogambire abantu oti, ‘Mweyeze kuba nyenkya nimwija kulya enyama. Mweboroboisire Omukama yahulira.’ Mugizire muti, ‘N'ohai aratuha enyama tukalya? Orwo twabaire tuli Misiri tukaba tulige.’ ” Aha rw'ekyo Omukama naija kubaha enyama mulye.

¹⁹ Mara timulikwija kugilya kiro kimoi anga bibili anga bitanu anga ikumi, nangu n'amakumi gabili,

²⁰ muragilya omwezi gwona, elemwe ebanukire kubi, ebatame. Manya n'inywe mushengire Omukama asingiire omuli inywe, mwamujojobera nimugira muti, “Ekyatwihire Misiri kiki?”

²¹ Musa agamba ati, “Leba, nyina abantu elaki mukaga omu rugendo; washuba waitu wagamba oti, ‘Ndabaha enyama y'okulya omwezi gwona!’

²² Mbwenusi aho babaitire amahyo g'entaama n'ag'ente, enyama kwija kubamara? Anga babajubire enfuru zona omu nyanja, nizo zirabagoba?”

²³ Omukama abahorora ati, “Obushobora obwange tibulengwa. Mbwenu orabona okwo ekyo nagamba kirabakwo anga chei.”

²⁴ Kityo Musa aruga omw'Ihema ly'Omuterano, agambira abantu ebyo Omukama yagamba. Ashombokya abantu 70 omu bakuru b'Abaisiraeli, abazingoza Eihema.

²⁵ Aho Omukama asongoka omu kichwi afumora na Musa; amara aha abakuru abo nshanju obushobora nk'obwa Musa. Orwo bagizire obushobora babanza kuranga. Kyonkai bakaranga elyo lyonkai, tibagendeleire.

²⁶ Mbwenu omu rusisira bhakaba hasigairwemu abantu babili: Elidadi na Medadi. Na bonene bagobwa obushobora.

²⁷ Nikwo omusigazi omoi kwiruka akagambira Musa ati, “Elidadi na Medadi bali omu rusisira nibaranga.”

²⁸ Yoshua eya Nuni, omuhwezi wa Musa, omoiho omu ndonkwaze, agira ati, “Rugaba rwange Musa, obatange.”

²⁹ Kyonkai Musa amubaza ati, “Wachuba, wabona bankira? Hakili nangu eihanga lyona ly'Omukama bakubaire barangi, hakabaha obushobora!”

³⁰ Musa n'abakuru bona b'Abaisiraeli bashuba omu nsisira.

Endahi

³¹ Omukama asindika omuyaga, gwihya gwemire omu nyanja, guleta endahi, guzigobya bwatana aha nsisira, orugendo rw'ekiro kimoi kwema aha nsisira ezo buli bwolekera. Zonene zikaba niziharara nk'emita emoi kwema ahansi.

³² Mushana ogwa kir'ekyo gwona kukeisa n'obwire, n'ekiro ekyahondeireho kyona, abantu bagenda kukwata endahi ezo. Ayakwete zike akakwata ehomeri ikumi. Bamara kuzita bazanika buli hantu obuzingora bw'ensisira.

³³ Orwo babaire babanza kukanjura, Omukama abanigalira, abateza ekibundo kihango muno.

³⁴ Aha rw'ekyo halinya haketwa Kiburoti Hatava orwo baziikiremu abantu abaisiibwe orwoyoyo rw'enyama.

³⁵ K'abantu barugire Kiburoti Hatava bagya Hazeroti, niyo baikaire.