Orubara 1 - Ebibulia 2001

Abaisiraeli nibabarwa elya mbere

¹ Omukama akagambira Musa Omw'Irungu lya Sinai, omw'Ihema ly'Omuterano, aha kiro kya mbere ky'omwezi gwa kabili, omu mwaka gwa kabili kwema barugire Misiri, ati,

² “Mubare eihanga lyona ly'Abaisiraeli kuhonderana n'enganda zabo n'ebika byabo. Mubare buli muntu ibaralye, araba ali mushaija wena;

³ kwema aha myaka 20 kutemba, buli Mwisiraeli alikushobora kutabara. Iwe na Aroni mubabare nk'okwo amahe gabo gali.

⁴ Kandi mweme n'omuntu omoi kuruga buli ruganda, mara abe ali mukuru w'oruganda orwo.

⁵ Aga nigo mabara g'abantu abo murayema nabo. Omu ruganda rwa Rubeni: Elizuri eya Shedeuri;

⁶ omu ruganda rwa Simeoni: Shelumieli eya Zurishadai;

⁷ omu ruganda rwa Yuda: Nashoni eya Aminadabu;

⁸ omu ruganda rwa Isakari: Natanaeli eya Zuari;

⁹ omu ruganda rwa Zabuloni: Eliabu eya Heloni;

¹⁰ omu ba Yozefu, omu ruganda rwa Efuraimu: Elishama eya Amihudi; n'omu rwa Manase: Gamalieli eya Pedazuri;

¹¹ omu rwa Benjamini: Abidani eya Gideoni;

¹² omu rwa Dani: Ahiezeri eya Amishadai.

¹³ Omu rwa Asheri: Pagieli eya Okarani;

¹⁴ Omu rwa Gadi: Eliasafu eya Deweli;

¹⁵ kandi omu rwa Nafutali: Ahira eya Enani.”

¹⁶ Aba nibo bakuru b'enganda za Isiraeli abaronzirwe omw'ihanga.

¹⁷ Musa na Aroni batwara abashaija aba abagambwa amabara,

¹⁸ kandi aha kiro kya mbere ky'omwezi gwa kabili, bahuruza eihanga lyona aho abantu behandikisa buli muntu na ibaralye kuhonderana n'enganda zabo n'amahiga gabo, kwema aha myaka 20 kutemba,

¹⁹ nk'okwo Omukama yahangiire Musa. Kityo hakababalira Omw'Irungu lya Sinai.

²⁰ Oruganda rwa Rubeni, omuzigaijo gwa Isiraeli, kuhonderana n'ebika byabo n'amahiga gabo buli muntu na ibara, kaishe mushaija kwema ow'emyaka 20 kutemba, bona ababaire nibashobora kutabara omu ndashana:

²¹ Ab'oruganda rwa Rubeni bakaba bali 46,500.

²² Omu ruganda rwa Simeoni, kuhonderana n'ebika byabo n'amahiga gabo ababazirwe buli muntu na ibara, kaishe mushaija ow'emyaka 20 kutemba, bona ababaire nibashobora kutabara omu ndashana:

²³ Ab'oruganda rwa Simeoni bakaba bali 59,300.

²⁴ Omu ruganda rwa Gadi, kuhonderana n'ebika byabo n'amahiga gabo kwema myaka 20 kutemba, bona ababaire nibashobora kutabara:

²⁵ Bakaba bali 45,650.

²⁶ Omu ruganda rwa Yuda, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara

²⁷ bakagoba abantu 74,600.

²⁸ Omu ruganda rwa Isakari, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

²⁹ Omu ruganda orwo rwa Isakari, orubara bakagoba 54,400.

³⁰ Omu ruganda rwa Zabuloni, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

³¹ Omu ruganda rwa Zabuloni orwo orubara rwabo bakagoba 57,400.

³² Omu ruganda rwa Yozefu, nirwo ruganda rwa Efuraimu, abanyaruganda kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

³³ Omu ruganda rwa Efuraimu orwo orubara rwabo bakagoba enkumi 40,500.

³⁴ Omu ruganda rwa Manase, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

³⁵ Omu ruganda orwo rwa Manase orubara rwabo bakagoba 32,200.

³⁶ Omu ruganda rwa Benjamini, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

³⁷ Omu ruganda orwo rwa Benjamini orubara rwabo rukagoba 35,400.

³⁸ Omu ruganda rwa Dani, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

³⁹ Omu ruganda orwo rwa Dani orubara rwabo bakagoba 62,700.

⁴⁰ Omu ruganda rwa Asheri, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

⁴¹ Omu ruganda orwo rwa Asheri orubara rwabo bakagoba 41,500.

⁴² Omu ruganda rwa Nafutali, abanyaruganda, kuhonderana n'amahiga gabo, nibyo bika byabo, orubara rwabo buli muntu na ibara, kwema aha myaka 20 kutemba, buli mushaija ayabaire nashobora kutabara:

⁴³ Omu ruganda orwo rwa Nafutali orubara rwabo bakagoba 53,400.

⁴⁴ Abo nibo babazirwe. Nibo Musa na Aroni babazire nibajunwa abebembezi ikumi na babili ba Isiraeli buli omoi omw'ibara ly'orugandarwe.

⁴⁵ Kityo orubara rwona rw'Abaisiraeli, kuhonderana n'enganda zabo, kwema aha myaka makumi gabili kutemba, buli mushaija ayabaire nashobora kutabara:

⁴⁶ Orubara rwona bakagoba 603,550.

⁴⁷ Nawe Abalevita tibabalirainwe nabo kuhonderana na ruganda rwabo.

⁴⁸ Ahakuba Omukama akagambira Musa ati,

⁴⁹ “Oruganda rwa Levi rwonkai nirwo otalikwija kubara. Otakubabalirana na Baisiraeli.

⁵⁰ Abalevita obakwase Eihema lyange elyo nyikaramu hamoi n'ebikwato byalyo byona. Balilebelere, kandi basisiirega balizingoire.

⁵¹ Orwo Eihema liraijaga kusimbuka Abalevita babe nibo balisimbura. Kandi orwo liraijaga kusimbwa, Abalevita babe nibo balisimba. Kandi k'omuntu ondijo aliligobaho, ogwo bamwite.

⁵² Abaisiraeli bate nibatera amahema gabo kuhonderana n'emitwe yabo. Buli muntu atere Eihemalye omu rusisira rw'aba wenene mara mbali ebendera y'eihelye eli.

⁵³ Kyonkai Abalevita basisiire bazingoire Eihema elyo nyikaramu, ntalija nkanigalira kubi nteko y'Abaisiraeli. Abalevita abo balebelere Eihema elyo nyikaramu.”

⁵⁴ Abaisiraeli nikwo bakozire. Bakakora byona okwo Omukama yabihangiire Musa.