Okuruga 9 - Ebibulia 2001

Ekibundo kya katanu: Okufa kw'ebitunganwa

¹ Omukama agambira Musa ati, “Ogende omwa Farao omugambire oti, ‘Omukama Ruhanga w'Abaheburania nagamba ati, Otaishure abantu bange bagende banfukamire.

² K'orayanga kubataishura okaikara obazimatire,

³ ebitunganwa byawe ebili omu malisizo: Efarasi, endogobe, engamia, amahyo g'ente n'ag'entaama, ndabiteza ekibundo ekibi muno.

⁴ Eby'Abaisiraeli arabishorora omu by'Abamisiri, taliho kitunganwa kya Mwisiraeli ekirafa.’ ”

⁵ Omukama agamba orwo kirabaho, ati, “Nyenkya ninkora ekikorwa eki.”

⁶ Aho bukeire Omukama akora atyo, ebitunganwa by'Abamisiri bifa, kyonkai omu bitunganwa by'Abaisiraeli n'ekimoi tikyafire.

⁷ Farao atuma abantu kuleba, bashanga okwo omu bitunganwa eby'Abaisiraeli tihafiremu na kimoi. Kyonkai aikara agumangaine omutima, abantu tiyabataishwire.

Ekibundo kya mukaga: Ebihute

⁸ Omukama agambira Musa na Aroni ati, “Muyore ebikamato by'eijwi omu kyoto, Musa alituntumulire eiguru omu maisho ga Farao.

⁹ Lirahinduka chuchu esesenukire omu nsi yona ya Misiri, lilete ebihute ebilikufumuka, abantu n'ebigunju omu nsi yona ya Misiri bagire ebironda.”

¹⁰ Bayora eijwi elyo omu kyoto, bemelera omu maisho ga Farao, Musa alituntumulira eiguru, abantu n'ebigunju baterwa ebihute, bifumuka biba bironda.

¹¹ Abafumu tibashoboire kwemelera mu maisho ga Musa aha rw'enshonga y'ebihute byabaire bibateire, bikatera n'Abamisiri bona.

¹² Kyonkai Omukama agumanganisa Farao omutima, tiyabaikiliize, nk'okwo yabaire agambire Musa.

Ekibundo kya mushanju: Orubare

¹³ Omukama agambira Musa ati, “Oimuke bwankya karai oyemelere omu maisho ga Farao, omugambire oti, ‘Omukama Ruhanga w'Abaheburania nagamba ati, Otaishure abantu bange bagende banfukamire.

¹⁴ Kuba eli ninyija kukusindikira ebibundo iwe n'abaramata bawe n'abantu bawe, oije omanye okwo omu nsi yona taliho n'omoi alikunshusha.

¹⁵ Enshonga mbwenu aha nakubaire naimukize omukono nakuteize endwara iwe n'abantu bawe, wakubaire wafire ensi yarandukire.

¹⁶ Kyonkai aha rw'enshonga egi nkulekire buleka kukwoleka obushobora bwange, eiranga lyange limanyike omu nsi yona.

¹⁷ Iwe okyagilira bantu bange eishaija, tolikubataishura.

¹⁸ Nyenkya nka mwaha ndagwisa enjura mpango muno ey'orubare, etakabahoga kwema Misiri ebaireho kuhika mbwenu.

¹⁹ Aha rw'ekyo otume batahye ebitunganwa byawe neby'oinabyo omw'ishwa byona, kuba omuntu n'ekitunganwa ekirashangwa aheru kitakatahire nikija kuterwa orubare kife.’ ”

²⁰ Aho omu baramata ba Farao ayatinire ekigambo ky'Omukama, niwe yasingisize abairube akabatahya omu maju akatahya n'ebitunganwa.

²¹ Atayetaireho kigambo kya Mukama akasiga abairube n'ebitunganwabye omw'ishwa.

²² Omukama agambira Musa ati, “Imukya omukono ogwolekeize eiguru, enjura y'orubare egwe Misiri yona. Etere omuntu n'ekigunju n'ebimera byona omw'ishwa omuli Misiri yona.”

²³ Musa aimukya enkoniye agyolekeize eiguru; Omukama ataishura enkuba n'enjura y'orubare n'omuliro bihanantuka omu nsi. Omukama agwisa enjura y'orubare omu nsi ya Misiri.

²⁴ Hakabaho enjura y'orubare, egwa n'omuliro nigurabarabya obutaleka. Enjura y'orubare egyo ekaba eli y'amani gangi muno eyabaire etakabahoga omuli Misiri kwema Misiri ebaire ihanga.

²⁵ Orubare rutera buli kantu akabaire kali omw'ishwa omuli Misiri yona, rutera omuntu n'ekigunju kwakwo. Rutera buli kimera kyona omw'ishwa, rusinjagulikya emiti yamwo yona.

²⁶ Omuli Gosheni mwonkai, mbali Abaisiraeli babaire bali, nimwo rutagobire.

²⁷ Aho Farao atumaho, ayeta Musa na Aroni, abagambira ati, “Eli nafakara, Omukama ali omu mazima, inye n'abantu bange tituli mu mazima.

²⁸ Mutagilize Omukama; enkuba n'orubare ebyabaho nibimara; inye ndabataishura mugende, timukiikara munu.”

²⁹ Musa amugambira ati, “Orwo ndashohora nti omu kigo, ndaimukiza Omukama emikono; enkuba ziralekera, kandi orubare tirugendelere, oije omanye okwo ensi eba y'Omukama.

³⁰ Kyonkai kandi iwe n'abaramata bawe nimanya okwo mutakatinire Mukama Ruhanga.”

³¹ Epamba n'eshayiri bikafa eshayiri ekaba yagizire ebikumba n'epamba ekaba yatwara kwakya.

³² Engano na kusemetu ebyo tibyafire aha rw'okuba bikaba bikelereirwe kumera.

³³ Musa aruga ahali Farao omu kigo, aimukiza Omukama emikono; enkuba n'orubare bilekera, enjura eba etakishesheka.

³⁴ Kyonkai Farao kayaboine okwo enjura n'orubare n'enkuba byalekera, ashuba kandi afakara, agumangana omutima, n'abaramatabe kutyo.

³⁵ Farao agumangana omutima, tiyataishwire Baisiraeli; nk'okwo Omukama yabaire agambire omu kanwa ka Musa.