Okuruga 8 - Ebibulia 2001

Ekibundo kya kabili: Ebikere

¹ Omukama agambira Musa ati, “Ogende omwa Farao omugambire oti, ‘Omukama nagamba ati, Otaishure abantu bange bagende banfukamire.

² K'orayanga kubataishura ensi yawe yona ndagibunza ebikere;

³ Naili eraijura ebikere ebyo, birugemu bije omwawe, bitahe omu kitabo kyawe, bigye n'aha kitabo kyawe, n'omu maju g'abaramata bawe, n'ag'abantu bawe, n'omu byoto byawe n'omu Pakuli zawe ez'okukandiramu engano.

⁴ Bikukuube, n'abantu bawe bibakuube n'abaramata bawe bona.’ ”

⁵ Omukama ashuba agambira Musa ati, “Ogambire Aroni oti, ‘Kwata enkoni yawe ogimukye aha miiga, aha nyato n'aha ntunga, okuubise ensi ya Misiri ebikere!’ ”

⁶ Aho Aroni aimukya enkoni aha maizi ga Misiri; ebikere bitemba bibunda ensi.

⁷ Kyonkai abakonikoni nabo bakora batyo omu bubuya bwabo beshelekire, baleta ebikere omu nsi ya Misiri.

⁸ Farao ayeta Musa na Aroni abagambira ati, “Mushabe Omukama atwihyeho ebikere; abantube ndabataishura bagye bamutambire ekitambo.”

⁹ Musa agambira Farao ati, “Iwe obe niwe ondagira orwo ndakushabira, iwe hamoi n'abaramata bawe n'abantu bawe. Aho birabarugaho, biruge n'omu maju ganyu, bisigare Naili mwonkai.”

¹⁰ Farao agamba ati, “Nyenkya.” Musa agamba ati, “Okwo wagamba nikwo, nirwo oramanya okwo hatabayo ashusha Mukama Ruhanga waitu.

¹¹ Ebikere birakurugaho, biruge n'omwawe n'omu maju g'abaramata bawe, bisigare Naili mwonkai.”

¹² Aho Musa na Aroni baruga ahali Farao; Musa ashaba Omukama kushubyayo ebikere; nk'okwo yabaire aikilijainyie na Farao.

¹³ Omukama akorakwo kuhonderana n'ekigambo kya Musa; ebikere bifa omu maju n'omu bibuga n'aheru.

¹⁴ Babishombokya entumo, ensi enuka chuchuchu.

¹⁵ Kyonkai Farao kayaboine okwo habaho akabu, agumangana omutima, aba atakibaikiliza, nk'okwo Omukama yabaire agambire.

Ekibundo kya kashatu: Enda

¹⁶ Omukama agambira Musa ati, “Ogambire Aroni oti, ‘Imukya omukono otere echuchu ehinduke nda omuli Misiri yona.’ ”

¹⁷ Bagira batyo. Aroni aimukya enkoniye atera echuchu ehinduka nda, zilya abantu n'ebigunju; echuchu yona omuli Misiri ehinduka nda.

¹⁸ Abakonikoni balenga omu bubuya bwabo beshelekire kuleta enda, kyonkai tibashoboire. Kityo enda zilya omuntu n'ekigunju.

¹⁹ Abakonikoni bagambira Farao bati, “Eki kyakorwa Ruhanga.” Kyonkai Farao wenene aguma agumangaine omutima, tiyaikiliize, nk'okwo Omukama yabaire agambire.

Ekibundo kya kanai: Enshwera

²⁰ Aho Omukama agambira Musa ati, “Oimuke bwankya karai, otanganwe Farao orwo araba nagya Naili, omugambire oti, ‘Omukama nagamba ati, Otaishure abantu bange bagye banfukamire.

²¹ K'otabataishure, iwe n'abaramata bawe n'abantu bawe, ndabasindikira emijumbi y'enshwera; amaju gawe n'ag'Abamisiri gaijure, kutyo n'ensi eyo bemeleireho.

²² Kyonkai kir'ekyo ndashorora ensi ya Gosheni, mbali abantu bange balikutura, emijumbi y'enshwera tebeyo; oije omanye okwo omu nsi omu Omukama aba inye.

²³ Kityo abantu bange ndabatanurana n'abawe. Ekitangazo ekyo kirabaho nyenkya.’ ”

²⁴ Mara Omukama akorakwo. Emijumbi mihango y'enshwera eija omwa Farao n'omu maju g'abaramatabe, zibunda Misiri yona, ensi esisikara aha rw'enshonga y'enshwera ezo.

²⁵ Aho Farao ayeta Musa na Aroni abagambira ati, “Mugende mutambire Ruhanga wanyu ekitambo omu nsi egi.”

²⁶ Kyonkai Musa agamba ati, “Tikibe kirungi kugira tutyo, aha rw'okuba turatambira Omukama Ruhanga waitu ebihongo eby'Abamisiri babona bili binyamunuge, tibatuteze mabare?

²⁷ Nituragirwa kugenda orugendo rw'ebiro bishatu omw'irungu kutambira Omukama Ruhanga waitu nk'okwo aratuhangira.”

²⁸ Aho Farao agamba ati, “Ndabataishura mugende mutambire Omukama Ruhanga wanyu ekitambo omw'irungu; ekiliho mutakugenda harai muno. Munshabire.”

²⁹ Aho Musa agamba ati, “Lea, Inye nakurugaho nashohora, ndashaba Omukama, emijumbi y'enshwera nyenkya ekurugeho, eruge n'aha baramata bawe n'abantu bawe; ekiliho otatulemba rundi kwanga kututaishura kugya kutambira Omukama.”

³⁰ Aho Musa aruga ahali Farao aturuka ashaba aha Mukama.

³¹ Omukama akora nk'okwo Musa yashaba; aihya emijumbi y'enshwera ahali Farao, n'aha baramatabe n'aha bantube, tihasigaireho n'emoi.

³² Kyonkai n'eli kwakwo Farao agumangana omutima, abantu tiyabataishwire.