Okuruga 7 - Ebibulia 2001

¹ Omukama agambira Musa ati, “Lea, nakushushanisa Ruhanga ahali Farao, kandi Aroni murumuna wawe niwe aramukugambilira.

² Ogambe byona ebyo ndikukuragira; kandi Aroni murumuna wawe aragambira Farao ataishure Abaisiraeli baruge omu nsiye.

³ Kyonkai ndagumanganisa omutima gwa Farao. N'orwo ndakora obubonero n'ebitangazo bingi omuli Misiri,

⁴ tibaikiliize. Aho nirwo ndabonabonyia Misiri nkaihyamu abantu bange Abaisiraeli kuhonderana n'enganda zabo.

⁵ Aho Abamisiri baramanya okwo inye mba Mukama, orwo ndabonabonyia Misiri nkaihyamu Abaisiraeli bakabarugamu.”

⁶ Musa na Aroni bakora okwo Omukama yabaragiire.

⁷ Orwo balikugambira Farao ebyo, Musa akaba aina emyaka kinana, kandi Aroni aina emyaka kinana n'eshatu.

Ebibundo bya Misiri

⁸ Omukama agambira Musa na Aroni ati,

⁹ “Ka Farao arabagambira ati, ‘Mugire eky'amani ekyo mwakora mweyoleke okwo mulikugamba amazima,’ aho ogambire Aroni oti, ‘Kwata enkoni yawe ogishabure ahansi omu maisho ga Farao, ehinduke njoka.’ ”

¹⁰ Bombili bagenda ahali Farao bakora nk'okwo Omukama yabaire abaragiire; Aroni ashabura enkoniye ahansi omu maisho ga Farao n'abaramatabe, ehinduka njoka.

¹¹ Aho Farao ayeta abamanyi n'abarogi n'abakonikoni ba Misiri, nabo bakora batyo omu bubuya bwabo beshelekire.

¹² Ahakuba buli muntu akashabura enkoniye ahansi, zona zaba njoka. Enkoni ya Aroni emira ezabo.

¹³ Kyonkai Farao agumangana omutima, tiyabaikiliize; nk'okwo Omukama yabaire agambire.

Ekibundo kya mbere: Amaizi nigahinduka bwamba

¹⁴ Aho Omukama agambira Musa ati, “Farao nagumangana omutima, nayanga kutaishura abantu bange kabagenda.

¹⁵ Ogende otanganwe nawe bwankya, orwo araba nagya Naili, omulindilire aha rukunguru rw'omwiga, mara ogende n'enkoni ebaire ehindukire njoka,

¹⁶ omugambire oti, ‘Omukama Ruhanga w'Abaheburania antumire ahali iwe, nagamba ati, Otaishure abantu bange bagende, bagye omw'irungu banfukamire, kyonkai tolikwikiliza.

¹⁷ Mbwenu aha nirwo oramanya okwo Omukama aba inye: Amaizi ga Naili ndagateza enkoni egi eyo nkwete gahinduke bwamba,

¹⁸ enfuru zamwo zife, Naili enuke, kandi Abamisiri baranuga kunywa amaizi gayo.’ ”

¹⁹ Omukama ashuba agambira Musa ati, “Ogambire Aroni oti, ‘Kwata enkoni yawe, oimukye omukono aha maizi ga Misiri, aha miiga yabo, enyato zabo, n'ebitunga n'entunga zabo zona z'amaizi, bihinduke bwamba. Misiri yona ebe bwamba, n'amaizi agali omu bikwato by'emiti n'omu by'amabare garahinduka bwamba.’ ”

²⁰ Musa na Aroni bagira nk'okwo Omukama yabaragira. Omu maisho ga Farao n'abaramatabe Aroni aimukya enkoni atera amaizi ga Naili, gona gona gahinduka bwamba.

²¹ Enfuru zamwo zifa; Naili enuka, kityo Abamisiri baba batakinywa maizi gayo; Misiri yona eba bwamba.

²² Kyonkai abakonikoni ba Misiri nabo bakora batyo omu bubuya bwabo beshelekire; Farao aguma agumangaine omutima. Tiyabaikiliize, nk'okwo Omukama yabaire agambire.

²³ Agaruka omwe, nangu n'eki tiyakitaire aha mutima.

²⁴ Abamisiri bashokora ebina aha nkunguru za Naili nibahiga amaizi g'okunywa, tibashoboire kunywa maizi gayo.

²⁵ Ebiro mushanju bihingura kwema orwo Omukama yateire Naili.