Okuruga 6 - Ebibulia 2001

¹ Aho Omukama agambira Musa ati, “Mbwenu orabona ekyo ndakora Farao. Ndamugimba ataishure abantu bange. Ndamugimba ababinge omu nsiye.”

Ruhanga nagumisa Musa

² Ruhanga agambira Musa ati, “Omukama n'inye.

³ Nkabonekera Aburahamu, Isaka na Yakobo; mba Ruhanga Rushoborabyona, kyonkai eibara lyange, Mukama, tinalibamanyisize.

⁴ Kwakwo nkaragana nabo okwo ndibaha ensi ya Kanaani, ensi eyo baturagamu bali bafuruki.

⁵ Kandi nahuliire okutaga kw'Abaisiraeli abo Abamisiri balikuhindura bairu, mara naijuka endagano yange.

⁶ Aha rw'ekyo ogambire Abaisiraeli abo oti, ‘Omukama n'inye, ndabaihya omu bwiru bw'Abamisiri. Ndakoza obushobora bwange bungi mbahe ekibonabonyio ky'amani kandi inywe mbarokore.

⁷ Ndabahindura bantu bange, inye mbe Ruhanga wanyu; mara muramanya okwo ndi Mukama Ruhanga wanyu, orwo ndaba nabaihire omu bwiru bw'Abamisiri.

⁸ Ndabatwara omu nsi eyo nanahiire kuha Aburahamu, Isaka na Yakobo; ndagibaha mugilye. N'inye Mukama.’ ”

⁹ Musa agambira atyo Abaisiraeli; kyonkai tibamwikiliize enshonga bakaba bayenanukire aha rw'obwiru bubi obwo babaire balimu.

¹⁰ Aho Omukama agambira Musa ati,

¹¹ “Ogende ogambire Farao omukama wa Misiri ataishure Abaisiraeli baruge omu nsiye.”

¹² Kyonkai Musa amugambira ati, “Abaisiraeli tibanyikilize; aho Farao aranyikiliza atai inye omuntu atamanya kugamba?”

¹³ Kyonkai Omukama aragira Musa na Aroni ati, “Mugambire Abaisiraeli na Farao omukama wa Misiri okwo nabaragira kwihya Abaisiraeli Misiri.”

Entabuko ya Musa na Aroni

¹⁴ Aba nibo bakuru b'amahiga gabo: Batabani ba Rubeni omuzigaijo gwa Isiraeli ni Hanoki, Palu, Hesironi na Karimi; aga nigo mahiga agalikutabuka ahali Rubeni.

¹⁵ Batabani ba Simeoni ni Yemweli, Yamini, Ohadi, Yakini, Sohari na Shauli owo yazaire aha Mukanaanikazi; aba nibo bagurusi b'ebika by'Abasimeoni.

¹⁶ Aga nigo mabara ga batabani ba Levi kuhonderana n'emizarwa yabo: Gerishoni, Kohati na Merari. Levi akarora emyaka kikumi mwo makumi gashatu na mushanju.

¹⁷ Batabani ba Gerishoni ni Libuni na Shimei kuhonderana n'ebika byabo.

¹⁸ Batabani ba Kohati ni Amuramu, Izihari, Heburoni na Uzieli. Kohati akarora emyaka kikumi mwo makumi gashatu n'eshatu.

¹⁹ Batabani ba Merari ni Mahuli na Mushi. Ebi nibyo bika by'Abalevita kuhonderana n'emizarwa yabo.

²⁰ Amuramu ashwera Yokebedi ishenkazi, amuzaraho Aroni na Musa. Amuramu akarora emyaka kikumi mwo makumi gashatu na mushanju.

²¹ Batabani ba Izihari ni Kora, Nefegi na Zikiri.

²² Kandi batabani ba Uzieli ni Mishaeli, Elisafani na Sitiri.

²³ Aroni ashwera Elisheba muhara wa Aminadabu, munyanya Nashoni amuzaraho Nadabu, Abihu, Eleazari na Itamari.

²⁴ Batabani ba Kora ni Asiri, Elikana na Abiasafu; ebi nibyo bika by'Abakora.

²⁵ Eleazari mutabani wa Aroni ashwera muhara wa Pusieli; amuzaraho Finehasi. Aba nibo bagurusi b'ebika by'Abalevita nk'okwo ebika byabo bili.

²⁶ Aba nibo Aroni na Musa abo Omukama yagambire ati, “Mwihye Abaisiraeli Misiri kuhonderana n'ebika byabo.”

²⁷ Nibo bonene aba abagambire Farao omukama wa Misiri kutaishura Abaisiraeli kuruga Misiri.

Ruhanga nahangira Musa na Aroni

²⁸ Kiro ekyo Omukama yagambire Musa omuli Misiri,

²⁹ ati, “Omukama n'inye, ogambire Farao omukama wa Misiri ebyo ndikukugambira.”

³⁰ Musa amubaza ati, “Lea, Inye tindi ngambagambi; aho mbwenu Farao aranyikiliza atai?”