Okuruga 40 - Ebibulia 2001

Okuterwa kw'Eihema ly'Obusinge n'okuhabwa omugisha

¹ Omukama agambira Musa ati,

² “Aha kiro kya mbere ky'omwezi gwa mbere oyemeleze ekiikaro ky'Eihema ly'Omuterano.

³ Okitemu Esanduku y'Endagano, kandi esanduku egyo ogisikise orutimbe.

⁴ Otahyemu emeza omare otebekanise ebintu byayo okwo biragirwe kuba. Otahyemu n'ekinara ky'etara, okiteho etara zakyo.

⁵ Alutare y'ezahabu ey'obunuuma ogiteke omu maisho g'Esanduku y'endagano, mara oyemeleze ekisika aha mulyango gw'ekiikaro.

⁶ Ealutare y'ekihongo ky'okwokibwa ogiteke omu maisho g'omulyango gw'ekiikaro ky'Eihema ly'Omuterano;

⁷ mara oteke orunabiro omugati y'Eihema ly'Omuterano na ealutare, kandi orutemu amaizi.

⁸ Oimukye orugo obuzingora mara ohanike ekisika ky'ekihigi kya nyakabuga.

⁹ Aho okwate amajuta g'okusiga osiige ekiikaro na byona ebikilimu, okihe omugisha n'ebikwato byakyo byona, kibe kitakatifu.

¹⁰ Alutare y'ekihongo ky'okwokibwa nayo ogisiige amajuta n'ebikwato byayo byona; ebe ntakatifu muno.

¹¹ Orunabiro n'eichuba lyarwo orusiige amajuta oruhe omugisha.

¹² Aho olete Aroni n'abatabani aha mulyango gw'Eihema ly'Omuterano obanabise n'amaizi.

¹³ Ojweke Aroni ebijwaro bitakatifu, oshube omukore amajuta omutendeke, abe mukuhani ankolere.

¹⁴ N'abatabani kwakwo obalete obajweke enyambarwa,

¹⁵ obakore n'amajuta nk'okwo ogakozire ishebo, babe bakuhani bankolere. Orwo barakorwa amajuta baraba bakuhani eirai lyona omu mizarwa yabo yona.”

¹⁶ Musa eby'Omukama yamuhangiire akabikora byona.

¹⁷ Aha kiro kya mbere ky'omwezi gwa mbere gw'omwaka gwa kabili Abaisiraeli barugiire Misiri, ekiikaro bakyemeleza.

¹⁸ Musa ayemeleza ekiikaro, ataho amachuba gakyo, ayemeleza emizilingiti yakyo, atamu emigamba yakyo, ayemeleza n'enyomyo zakyo.

¹⁹ Atanturulira eihema eiguru y'ekiikaro, nikwo kugir'oti ekiikaro akishwekesa eihema; nk'okwo Omukama yabaire amuhangiire.

²⁰ Akwata embengo z'amabare aziteka omu Sanduku y'Endagano, kandi emigamba agiteka aha sanduku egyo, hamoi n'entebe y'obuganyizi agiteka eiguru yayo.

²¹ Atahya esanduku omu kiikaro, aimukya orutimbe rw'ekisiika asika Esanduku y'Endagano; nk'okwo Omukama yabaire amuhangiire.

²² Ateka emeza omw'Ihema ly'Omuterano rubaju orwa bikara rw'ekiikaro, enjai y'orutimbe,

²³ agitekahoge emikate omu maisho g'Omukama, nk'okwo Omukama yabaire amuhangiire.

²⁴ Ateka n'ekinara ky'etara omw'Ihema ly'Omuterano bwolekera emeza rubaju orwa kasi rw'ekiikaro.

²⁵ Ateka n'etara omu maisho g'Omukama, nk'okwo Omukama yabaire amuhangiire.

²⁶ Kandi ateka ealutare y'ezahabu omw'Ihema ly'Omuterano omu maisho g'orutimbe;

²⁷ agihembaho obunuma bulikutamirana, nk'okwo Omukama yabaire amuhangiire.

²⁸ Aha mulyango gw'ekiikaro ataho ekisika.

²⁹ Honene aho ataho ealutare y'ekihongo ky'okwokibwa, agihongaho ekihongo ky'okwokibwa n'ekihongo ky'emyaka; nk'okwo Omukama yabaire amuhangiire.

³⁰ Ateka orunabiro rw'amaizi g'okunaba omugati y'Eihema ly'Omuterano na ealutare.

³¹ Amaizi ago nigo Musa na Aroni n'abatabani banabaga emikono n'amaguru.

³² Orwo batahaga omw'Ihema ly'Omuterano, n'orwo baijaga ealutare banabaga, nk'okwo Omukama yabaire ahangiire Musa.

³³ Aimukya orukuta obuzingora bw'ekiikaro na ealutare, ataho n'ekisika ky'ekihigi kya nyakabuga. Omulimo agumaliliza atyo.

Ekichwi eiguru y'Ahatakatifu

³⁴ Aho ekichwi kishweka Eihema ly'Omuterano, n'ekitinwa ky'Omukama kijura ekiikaro.

³⁵ Musa tiyashoboire kutaha mw'Ihema lya Muterano aha rw'okuba ekichwi kikaliikara eiguru n'ekitinwa ky'Omukama kyaijura ekiikaro.

³⁶ Omu ngendo zabo zona orwo ekichwi kyarugaga aha kiikaro Abaisiraeli bagendelera omu maisho.

³⁷ Kyonkai k'ekichwi kitarugagaho, aho tibagendeleraga mu maisho kuhika kiro ekyo kyarugagaho.

³⁸ Omu ngendo zabo zona ekichwi ky'Omukama kyaikaraga eiguru y'ekiikaro nyemishana, kandi omuliro gwaikaraga omunda yakyo omu kiro, omu maisho g'Abaisiraeli bona.