Okuruga 4 - Ebibulia 2001

Musa nahabwa obushobora bw'ebitangazo

¹ Aho Musa ahorora ati, “Kyonkai tibanyikilize anga kuhulira ebyo ndabagambira, nibaija kugamba bati, ‘Omukama takubonekeire.’ ”

² Omukama amubaza ati, “Okweteki ekyo?” Ahorora ati, “Nkoni.”

³ Ruhanga ati, “Ginage ahansi.” Musa aginaga ahansi, ehinduka njoka; agiiruka.

⁴ Kyonkai Omukama amugambira ati, “Imukya omukono ogikwate omukira,” Musa aimukya omukono agikwata, ehinduka nkoni okwo akagikwete;

⁵ “Babone kwikiliza okwo Omukama Ruhanga wa baishebo, Ruhanga wa Aburahamu, Ruhanga wa Isaka na Ruhanga wa Yakobo yakubonekerakwo.”

⁶ Omukama ashuba amugambira ati, “Funya omukono ogugarure omu kanzu.” Musa afunya omukonogwe agugarura omu kanzu aha kifuba. Kugya kugushohoza gukaba gwabembire, nigwera nk'eseruji.

⁷ Aho Ruhanga agamba ati, “Funya omukono ogugare omu omu kanzu aha kifuba.” Musa agufunya agugarura omu kanzu, kugya kugushohoza gukaba gwakizire gwashushaniraine n'omubiligwe.

⁸ Ruhanga agamba ati, “Kabaraba batakwikiliize, anga kwikiliza akabonero ka mbere, baraikiliza akabonero aka nyuma.

⁹ Kabaraba bataikiliize na bubonero obu bwombili anga kuhulira kwo wabagambira, oihye amaizi omuli Naili ogasheshe aha nsi; gahinduke bwamba.”

¹⁰ Kyonkai Musa agambira Omukama ati, “Waitu Mukama wange, inye tindi ngambagambi, ebe nyeigoro anga ijo, anga kwema okagambire n'omwiru wawe; inye ngamba mpora ngira n'akaneta.”

¹¹ Omukama amubaza ati, “N'ohai ayahaire omuntu akanwa? N'ohai amuhindura mutita anga mwigazi w'amatwi, anga akamubonesa, anga akamuhindura mpume? T'inye Omukama?

¹² Mbwenu aha rw'ekyo genda, ndakujuna ogambe, nkwegese n'eby'oragamba.”

¹³ Kyonkai Musa ati, “Waitu Mukama wange, ninkutagiliza batume omuntu ondijo.”

¹⁴ Aho Omukama amutamwa, agamba ati, “Aroni murumuna wawe Omulevita taliho? Nimanya okwo alikushobora kugambage; mara lea nashohora kukuchwekera, k'arakubona arashemelerwa aha mutima.

¹⁵ Iwe omugambire, mara omuragilire eby'aragamba. Nywembi ndabaha eby'okugamba mbagambire n'ebyo murakora.

¹⁶ Arakugambilira abantu, agambe omw'ibara lyawe. Kandi iwe omuli wenene orashusha Ruhanga.

¹⁷ Okwate enkoni egi, niyo orakoza ebitangazo.”

Musa nagaruka Misiri

¹⁸ Musa agaruka owa Yetiro ishezara, amugambira ati, “Ninkushaba ontaishure ngaruke Misiri omu banyaruganda bange ndebe nka bakyarora.” Yetiro amugarukamu ati, “Ogende n'emilembe.”

¹⁹ Aho Omukama agambira Musa omuli Midiani ati, “Garuka Misiri, aha rw'okuba bona abakuhiganisaga kukwita bafire.”

²⁰ Musa akwata mukaziwe n'abatabani, abakuubisa aha ndogobe, agaruka Misiri; agenda akwete enkoni eyo Ruhanga yamugambiire.

²¹ Omukama agambira Musa ati, “K'orashuba Misiri oyekomye kukolera Farao ebitangazo byona ebyo nakuhera obushobora bw'okubikora. Kyonkai ndamugumanganisa omutima, tataishure bantu.

²² Ogambire Farao oti, ‘Omukama nagamba ati, Isiraeli aba mutabani wange w'omuzigaijo,

²³ mara ninkugambira nti, Otaishure mutabani wange agende kunfukamira, k'orayanga kumutaishura akagenda, ndaita mutabani wawe w'omuzigaijo.’ ”

²⁴ Omu rugendo mbali yabaire akambikire Omukama atanganwa Musa ahiga kumwita.

²⁵ Aho Sipora akwata eibare ly'obwogi atahiri omutabani, akashunshu akakwasa Musa aha bushaijabwe, nagamba ati, “Mazima oli ibanye ayanyebohoire.”

²⁶ Aho Omukama amuleka. Nikyo Sipora yagambire ati, “Oli ibanye ayanyebohoire.”

²⁷ Omukama agambira Aroni ati, “Ogende omw'irungu ochwekere Musa.” Agenda kumuchwekera, amutanganwa aha Ibanga lya Ruhanga, amunywegera.

²⁸ Musa agambira Aroni eby'Omukama yabaire amutumire byona n'ebitangazo byona ebyo yabaire amuragire kukora.

²⁹ Aho bombili bagenda bahuruza abebembezi b'Abaisiraeli.

³⁰ Aroni abagambira eby'Omukama yabaire agambire Musa, mara Musa wenene abakolera ebitangazo ebyo.

³¹ Aho abantu baikiliza; kandi kabahuliire okwo Omukama yabasingiire n'okwo yabaire yaboine enaku ezo babaire balimu, bainama bafukama.