Okuruga 34 - Ebibulia 2001

Embengo z'emihango eza kabili

¹ Omukama agambira Musa ati, “Yasa embengo ibili z'amabare nk'eza mbere, nyije mpandikeho ebigambo ebibaire bili aha za mbere ezo, ez'oyasire.

² Bwankya obe wayetekatekire, otembe aha Ibanga lya Sinai aha mutwe, oije onyeyanjulire.

³ Taliho muntu kukuhondera anga kugira mbali yazoka hona hona omw'ibanga. Na nte na ntaama zitakuliira mu kibazi kya ibanga elyo.”

⁴ Kityo Musa ayasa embengo ibili nk'eza mbere. Aimuka bwankya karai atemba aha Ibanga lya Sinai, nk'okwo Omukama yabaire amuragiire, atwara n'embengo ibili z'amabare.

⁵ Omukama asongoka omu kichwi, Musa ayemeleraho nawe, ahaisiliza eibara ly'Omukama.

⁶ Omukama amuraba omu maisho agamba ati, “Omukama, Omukama, Ruhanga omuganyizi mara omufura, ti mwangu wa kunigara, aijwire ekisha n'obwesigwa.

⁷ Abantu enkumi abagilira ekisha, abaganyira entambara n'ebyo bashobya. Kyonkai tindiburwa kubonabonyia bana ba baijukuru nimbatura entambara za baishebo kuturuka aha muzarwa gwa kashatu n'ogwa kanai.”

⁸ Aho Musa arahuka ainika omutwe ahansi, afukama.

⁹ Agamba ati, “Waitu Mukama, kandaba ninkushemelera, ninkutagiliza osinge tugende hamoi n'orwo tuli bantu abagumangaine emitima. Batugarulire entambara zaitu n'amafu gaitu, otubone okwo tuli bantu bawe.”

Okushubwamu kw'endagano

¹⁰ Omukama agamba ati, “Lea nakora endagano. Ninyija kukolera abantu bawe ebitangazo ebitakabonekaga mu nsi yona anga omw'ihanga lyona lyona. Kandi boa ab'oinabo barabona ekyo ndakora. Ekyo ndabakolera ky'okutinisa.”

¹¹ “Oyekomeleze ebyo ndikukuragira kir'eki. Orwo oliba notaha Kanaani ndigibingamu Abaamori, Abakanaani, Abahiti, Abaperizi, Abahivi n'Abayebusi.

¹² Olyelinda otalikora ndagano na banyansi bamwo, etalija ekakubera mutego.

¹³ Okambure ealutare zabo, enyomyo zabo ozate, oteme na Ashera zabo.

¹⁴ Otalifukamira ruhanga ondijo, aha rw'enshonga Omukama alikwetwa ‘Omunyaibuba,’ ni Ruhanga omunyaibubakwo.

¹⁵ Otalikora ndagano na banyansi bamwo, otalija okafukamira baruhanga babo. Kabakukutambira ebitambo omuntu yakukuraliza olya aha bitambobye.

¹⁶ Batabani bawe otalibashwelerera bahara babo. Enshonga abakazi abo kabakufukamira baruhanga babo, bakuhabisa batabani bawe nabo bafukamira baruhanga abo.”

¹⁷ “Otalihesha bishushani bya baruhanga.”

¹⁸ “Oyekomye ekiro kikuru ky'omukate ogutatumbisiibwe. Ebiro mushanju olyega omukate ogutatumbisiibwe, nk'okwo nakuragiire, aha kanya akatairweho omu mwezi gwa Abibu. Omu mwezi gwa Abibu nirwo warugiire Misiri.

¹⁹ Buli muzigaijo, gwange na buli kitunganwa kyawe ekishaija, gwaba muzigaijo gwa nte anga ntaama.

²⁰ Omuzigaijo gw'endogobe oguchunguze omwana gw'entaama. K'oliba otaguchungwire oguhende ebikya. Batabani banyu emizigaijo mubachungure. Hataligira yanyija mu maisho ngaro zishai.

²¹ “Ebiro mukaga okore emilimo, kyonkai aha kiro kya mushanju ohumure. Byaba biro bya kulima anga bya kugesha ohumure.

²² Kandi olyekomeleza ekiro kikuru ky'amalimansi, orwo wabanza kugesha engano eya mbere, oyekomye n'ekiro kikuru ky'amagesha gona aha nzindo y'omwaka.

²³ Emirundi eshatu omu mwaka nketwa mushaija mwawe aije kunfukamira inye Omukama Ruhanga wa Isiraeli.

²⁴ Orwo ndiba nabingire amahanga omu nsi egyo orwo olikutahamu, ensi yawe egyo ndigihanguhya. Kandi omu biro bikuru bishatu ebyo taliho muntu alyegomba nsi yawe kugitabalira.”

²⁵ “Otalihonga bwamba bwa kitambo kyange hamoi n'omukate ogutumbisiibwe. N'ekitambo ky'ekiro kikuru kya Pasika otalikirazaho.

²⁶ Ebiraba bya mbere by'emyaka yawe eby'oyelize obitware omw'Omukama Ruhanga wawe. Otalichumba mwana gwa mbuzi mu mata ga nyinagwo.”

²⁷ Omukama agambira Musa ati, “Ohandike ebigambo ebi; kuba nibyo nakoleraho endagano naiwe na Isiraeli.”

²⁸ Aha ibanga Musa akaikarayo n'Omukama ebiro makumi ganai, ekiro n'omushana gwaho; tiyaliire kyakulya anga kunywa maizi. Mara ahandika ebigambo by'endagano, niyo mihango ikumi, aha mbengo ezo.

Musa naruga aha ibanga

²⁹ Orwo Musa yasongokire Eibanga lya Sinai, ashutwire embengo zombili z'emihango, akaba nayengelera obuso aha rw'enshonga akaba ashangirwe nafumora na Ruhanga; kyonkai ekyo tiyakimanyire.

³⁰ Orwo Aroni n'Abaisiraeli baboine nayengelera obuso, batina kumugoba.

³¹ Kyonkai wenene Musa abeta; aho Aroni n'abebembezi b'enteko bagaruka, bamugoba, afumora nabo.

³² Ahanyuma Abaisiraeli bamugoba, abaragira byona eby'Omukama yabaire afumoire nawe omw'ibanga lya Sinai.

³³ Orwo yamazire kufumora nabo ayebunda ekihundwi aha maisho. Kyonkai orwo yagyaga omw'ihema ly'omuterano omu maisho g'Omukama kufumora nawe yakijuraga kuhika orwo yaturukaga.

³⁴ Kandi orwo yaturukaga akagambira Abaisiraeli ebyo yaragirwa,

³⁵ babonaga okwo alikwengelera obuso, aho wenene ayeshubya ekihundwi aha buso kuhika orwo yashubagayo kufumora nawe na Ruhanga.