Okuruga 30 - Ebibulia 2001

Alutare y'okwoteraho obunuma

¹ “Okore ealutare y'okwoteraho obunuma; ogikoze omuti gw'omushita.

² Egire oburai n'obukiika nk'enusu mita, eiganirane embaju zona. Egire obwemi bw'emita nk'emoi, mara ekoleranwe n'amahembe gayo.

³ Kandi eiguru n'omu mbaju obuzingora n'amahembe gayo ogasiige ezahabu enchenkure. Mara ogizingoze omukugiro gw'ezahabu.

⁴ Ogikolere ebifunga bibili by'ezahabu; oshube obikome ahansi y'omukugiro oku n'oku. Bibe by'okutahyamu emigamba y'okugitwaza.

⁵ Emigamba ogikoze omushita, omare ogisiige ezahabu.

⁶ Ogiteke omu maisho g'orutimbe oruli bwatana aha sanduku y'endagano n'omu maisho g'entebe y'obuganyizi eiguru y'esanduku y'endagano egyo, mbali ndateraniraga naiwe.

⁷ Buli bwankya orwo Aroni araijaga kushemeza etara, ealutare egyo agyotereho obunuma.

⁸ Na bwaigoro orwo yaija kuhemba etara abwotere. Ebiro ba byona omu makiro agalija murampongeraga obunuma.

⁹ Mutaligihongeraho bunuma bulikuzira, anga kihongo ky'okwokibwa, nangu n'ekihongo ky'emyaka; mara mutaligisheshaho kihongo kya kunywa.

¹⁰ Amakiro gona limoi omu mwaka Aroni agihasilire. Akwate obwamba bw'ekihongo ky'enyatano y'mafu abusiige amahembe gayo. Alutare egi y'Omukama ntakatifu muno.”

Omushoro gw'eihema ly'omuterano

¹¹ Omukama agambira Musa ati,

¹² “Orwo orabara Abaisiraeli, buli omoi agire eky'okwechunguza akimpe, otaija okaba nobabara bakaterwa kibundo.

¹³ Buli omoi arabarwa agire enusu y'eshekeli kuhonderana n'eshekeli y'ahatakatifu, bagimpongere. Eshekeli nizo gera makumi gabili.

¹⁴ Kaishe muntu ow'okwema emyaka makumi gabili n'okutemba, arabarwa, ampongere ekihongo.

¹⁵ Abatungi batagira bingi kushaga, n'aboro batagira bike kushaga. Orwo mulikugira ekihongo ky'okweyatilira mumpongere enusu y'eshekeli.

¹⁶ Oshoroze empiha ezi omu Baisiraeli ezo baragira kweyatilira, ozikoze omuruka gw'eihema ly'omuterano. Omushoro ogu Abaisiraeli baragugira kweyatilira, kandi nanye aho ndaijuka kubalinda.”

Orunabiro rw'omulinga

¹⁷ Omukama agambira Musa ati,

¹⁸ “Okore orunabiro rw'omulinga embunu yarwo ebe y'omulinga. Oruteke omugati y'eihema ly'omuterano na ealutare. Orutemu amaizi,

¹⁹ ago Aroni n'abatabani baranabaga emikono n'amaguru

²⁰ orwo baraijaga kutaha omw'ihema ly'omuterano anga kugya ealutare kumngera kuntambira ekihongo ky'okwokibwa.

²¹ Banabega emikono n'amaguru batalija bakafa. Ekiragiro eki bakikwate na baijukuru babo ebiro byona.”

Amajuta g'okwesiiga

²² Kandi Omukama agambira Musa ati,

²³ “Okwate ebirungo ebirungi muno: Mira ey'amaizi eshekeli 500 n'omudarasini ogwina akoya karungi enusu y'ekipimo eki, nikwo kugamba oti eshekeli 250 mwatanu, na kane elikutamirana ey'eshekeli 250,

²⁴ n'eshekeli 500 eza kasiya kuhonderana n'eshekeli y'Ahatakatifu, n'elita inai z'amajuta g'omuzeituni.

²⁵ Byona ebi obikoremu amajuta gatakatifu ag'okwesiiga nk'agakozirwe omukozi w'amarasi. Garaba majuta agatakatifu ag'okusiiga.

²⁶ Ogasiige eihema ly'omuterano n'esanduku y'endagano,

²⁷ n'emeza hamoi n'ebikwato byayo byona, n'ekinara ky'etara hamoi n'ebikwato byakyo, na ealutare y'obunuma,

²⁸ na ealutare y'okwokezaho ebitambo n'ebikwato byayo byona n'orunabiro n'embunu yarwo.

²⁹ Obihe omugisha, bibe bitakatifu muno. Kyona kyona ekilibikoraho kiliba kitakatifu,

³⁰ kandi okore Aroni n'abatabani amajuta, obatendeke babe bakuhani bankolere.

³¹ Ogambire Abaisiraeli oti, ‘Aga ebiro byona galiba majuta gange agatakatifu ag'okusiga.

³² Gatalisheshwa ha bantu ba buli kiro, nangu mutaligira gandi ago mwatoba nka gonene. Ago gatakatifu, mara mumanye okwo gali gatakatifu.

³³ Weena wena alikora agalikugashusha, anga aligasiiga atali mukuhani, aliba atakili muntu wange.’ ”

Obunuma

³⁴ Omukama agambira Musa ati, “Okwate ebirungo ebilikutamirana: Natafi, shekelesi na kelibena, hamoi n'obunuma oburungi, byona bibe bina ekipimo kimoi,

³⁵ okore obunuma nk'obukozirwe omubuya w'amarasi. Oburungemu omwonyu, bubone kwikarage mara bube butakatifu.

³⁶ Ogire obwo wasaho bukoroba muno, obuteke omw'ihema ly'omuterano mbali turateranira. Obumamilire omu maisho g'esanduku y'endagano; obunuma obu mumanye okwo buli butakatifu muno.

³⁷ Kandi obunuma obwo olirunga oti otaliburunga kabuba bwawe. Omanye okwo buli butakatifu mara bw'Omukama.

³⁸ Wene wena aliburunga ati nk'amarasi, ogwo aliba atakili muntu wana.”