Okuruga 29 - Ebibulia 2001

Okutendekwa kwa Aroni n'abatabani

¹ “Aroni n'abatabani kugya kubatendeka bakaba bakuhani bakankolera, obakolere oti: Okwate enumi y'ekigeto n'empaya ibili z'entaama ezitaina kamogo;

² omukate ogutatumbisiibwe, n'ekeki zitatumbisiibwe kyonkai zina amajuta, n'echapati zitatumbisiibwe kyonkai zisiigirwe amajuta. Omukate, ekeki n'echapati obikoze ensano nungi ey'engano.

³ Obiteke omu ntukuru emoi, obimpongere orwo orantambira ekitambo ky'enumi y'ekigeto.

⁴ Olete Aroni n'abatabani aha kishasi ky'eihema ly'omuterano, obogye n'amaizi.

⁵ Okwate ebijwaro, ojweke Aroni enyambarwa n'ekanzu elikugelekwaho fodi, n'efodi yonene, n'akendo k'aha kifuba, omukome omuyondo gw'efodi ogushukirwe omu bubuya.

⁶ Omujweke ekilemba, oshube omugeleke kalinda entakatifu aha kilemba,

⁷ Okwate amajuta g'okusiga, ogamufuke aha mutwe omukore amajuta.

⁸ Ahanyuma olete abatabani obajweke enyambarwa,

⁹ obakome emiyondo kandi obajweke ekofira za bituli. Obe nikwo otendeka otyo Aroni n'abatabani. Bonene na baijukuru babo bakuhani b'okunkolera eirai lyona.

¹⁰ “Ahanyuma olete enumi omu maisho g'eihema ly'omuterano. Aroni n'abatabani bateke emikono yabo aha mutwe gw'enumi egyo.

¹¹ Iwe ogitire omu maisho gange aha kishasi ky'eihema ly'omuterano.

¹² Oihyeho obwamba bwayo obusiigise orukumu rwawe aha mahembe ga ealutare, obwamba obusigaire obusheshe aha maguru ga ealutare egyo.

¹³ Okwate ekiteko ky'eine n'ekilelembire n'ensigo zombili n'ebishaju ebiziliho, obyokeze ahali ealutare.

¹⁴ Kyonkai enyama y'enumi, n'oruhu rwayo, n'efo yayo, obyokye n'omuliro enjai y'orusisira. Ekyo kitambo ky'okwatilira entambara.

¹⁵ “Okwateho empaya y'entaama, Aroni n'abatabani bagiteho emikono aha mutwe,

¹⁶ ogiite, okwate obwamba bwayo obushaimulire ealutare obuzingora.

¹⁷ Oshube ochwagachwagure entama egyo, amara gayo n'amaguru obyogye, obikwatirane n'omutwe gwayo obitungike aha nyama ezo wachwagachwagura.

¹⁸ Entama yona ogyokeze ahali ealutare; nikyo kihongo ky'Omukama eky'okwokibwa; akatachu k'ekihongo ky'okwokibwa kanshemelera, inye Omukama.

¹⁹ “Okwate empaya y'entaama endijo; Aroni n'abatabani bagiteho emikono aha mutwe.

²⁰ Ogiite, oihyeho obwamba bwayo obusiige Aroni aha mbarakutwi ya bulyo, obusiige n'abatabani aha mbarakutwi za bulyo, n'aha byara bishaija byabo by'amaguru aga bulyo; obwamba obusigaire obushaimulire ealutare obuzingora.

²¹ Ahanyuma oihye obwamba ahali ealutare, okwate n'amajuta g'okwesiiga, obishaimulire Aroni n'ebijwarobye, n'abatabani n'ebijwaro byabo. Wenene n'abatabani baraba batakatifu n'ebijwaro byabo bibe bitakatifu.

²² “Kandi okwate ebishaju by'empaya y'entaama, n'eby'eikira, n'ebishwekire amara, n'ekichweka ky'eine, n'ensigo zombili hamoi n'ebishaju byazo, n'okuguru kwa bulyo, aha rw'okuba empaya y'eitendeka,

²³ n'omu ntukuru eli omu maisho g'Omukama oihyemu omukate gumoi, n'ekeki eina amajuta, n'echapati emoi: Byona ebi tibitumbisiibwe,

²⁴ obikwase Aroni n'abatabani babihongere Omukama nibabichunkeza.

²⁵ Ahanyuma obibaihye omu mikono obyokeze ahali ealutare, egyo nyongelera aha kihongo ky'okwokibwa. Akatachu k'ekihongo eki ky'okwokibwa kanshemelera, inye Omukama.

²⁶ “Kandi okwate enkoro y'empaya y'entaama y'okutendekwa kwa Aroni, ogihongere Omukama nogichunkeza. Enkoro egyo ebe yawe.

²⁷ Orwo omukuhani yatendekwa, enkoro y'empaya y'entaama eyatambwa ekitambo ky'eitendeka n'okuguru kwayo obimpongere nobichunkeza. Ogwo mushondo gwa Aroni n'abatabani.

²⁸ Orwo Abaisiraeli barahongeraga Omukama ebihongo by'emilembe, ebiro byona enkoro n'okuguru birabaga by'abakuhani.

²⁹ “Enyambarwa za Aroni ziliba z'Abatabani abalimusikira. Barazijwaraga kukorwa amajuta kutendekwa.

³⁰ Omutabani alimusikira omu bukuhani kugya omw'ihema ly'omuterano ahatakatifu aha muruka arajwaraga enyambarwa ezo ebiro mushanju.

³¹ “Okwate enyama y'empaya y'entaama ey'eitendeka, ogichumbire ahatakatifu;

³² Aroni n'abatabani balye enyama egyo, n'omukate oguli omu ntukuru, babiliire aha kishasi ky'eihema ly'omuterano.

³³ Ebyakoziibwe aha rw'okwatilira amafu aha itendeka bilibwe bonene. Ow'aheru atabilyaho aha rw'okuba bitakatifu.

³⁴ K'enyama y'eitendeka eliraraho anga omukate, ogyokye, etalibwa aha rw'okuba ntakatifu.

³⁵ “Aroni n'abatabani obakolere emichonchozo yona y'eitendeka ebiro mushanju, nk'okwo nkuragire.

³⁶ Kandi buli kiro ohonge enumi y'ekihongo ky'enyatano y'amafu. Ekihongo ekyo kilihasilira ealutare. K'olimara kwatilira amafu ago, ealutare ogikore amajuta ogikuze.

³⁷ Okore otyo ebiro mushanju. Aho ealutare egyo eliba ntakatifu muno, mara ekiligikwataho kyona kyona kiliba kitakatifu.

Ebihongo bya buli kiro

³⁸ “Buli kiro obutosha otambe aha ealutare: Obutama bubili bw'omwaka gumoi.

³⁹ Omwana gw'entaama gumoi oguhonge bwankya, ogundi bwaigoro.

⁴⁰ Omwana gw'entaama ogwa mbere ogutambe n'ekilo emoi y'ensano nungi etabiraine n'elita emoi y'amajuta agakeneine, n'elita emoi y'edivai ey'ekihongo ky'okunywa.

⁴¹ Orwo olikutamba omwana gw'entaama ogwa bwaigoro, oguteho ekihongo ky'emyaka n'ekihongo ky'okunywa nka bwankya. Akatachu k'ekitambo eki ky'okwokibwa kanshemelera, inye Omukama.

⁴² Amakiro gona agalija, ekitambo eki ky'okwokibwa mukimpongere aha kishasi ky'eihema ly'omuterano. Niho ndashangana n'abantu bange nkafumora naiwe.

⁴³ Halinya ndita kushanganaho n'Abaisiraeli, mara ekitinwa kyange kilihahindura hatakatifu.

⁴⁴ Eihema ly'omuterano na ealutare ndibihundura bitakatifu, kwakwo na Aroni n'abatabani babe bakuhani bankolere.

⁴⁵ Nditura omu Baisiraeli mbe Ruhanga wabo.

⁴⁶ Balimanya okwo mba Ruhanga wabo, ayabaihire omu nsi ya Misiri kwija kubaturamu; inye mba Mukama Ruhanga wabo.