Okuruga 23 - Ebibulia 2001

Okukoza amazima

¹ “Otaligamba bishuba. Otalyema na muntu mubi kuba mujulizi omunyaitima.

² Otalihondera kikukuro kukora kubi; anga otaliba mujulizi mu mushango kugwera rubaju rw'ekikukuro kukyora mazima;

³ kandi otaligilira munaku kigonzi mu mushangogwe.

⁴ “K'olitanganwa ente anga endogobe y'omubisha wawe nebura, ogimukubulire.

⁵ K'olibona endogobe y'omuntu akunoba ebataraire ahansi omugugu gwayo gugitekeleire, otagimunagira, omujune kugimukya.

⁶ “Otalikyora mazima ga munaku mu mushangogwe.

⁷ Oyekenge ebishuba, kandi otalita nyakatetere mara omugorogoki, aha rw'okuba omubi tindimuleka.

⁸ Kandi otalitora nguzi rushwa; rushwa ehumisa abakuru, kandi eitira abali omu mazima.

⁹ “Otaligingiza mugenyi; nomanya okuba mugenyi kushasa; na inywe mukaba muli bagenyi omu nsi ya Misiri.

Omwaka gwa mushanju n'ekiro kya mushanju

¹⁰ “Ensi yawe ogilime emyaka mukaga n'okugesha eby'olyeza.

¹¹ Kyonkai omwaka gwa mushanju ogileke ehumure, eikye, kandi eby'olyezamu otalibigesha. Ebyo bilibwe abanaku, ebilisigaramu bilibwe enyamaishwa. Kutyo obe nikwo ogira endimiro yawe y'emizabibu n'ey'emizeituni.

¹² “Ebiro mukaga okore emilimo yawe, kyonkai ekiro kya mushanju ohumure. Ente yawe n'endogobe nabyo bihumure.

¹³ “Oyekomeleze byona ebyo nakugambira; kandi otaligamba mabara ga baruhanga bandi, anga aga ngeli egi kuhulirwa mu kanwa kawe.

Ebiro bikuru bishatu

¹⁴ “Emirundi eshatu omu mwaka onkolere ekiro kikuru.

¹⁵ Oshemeze ekiro kikuru ky'omukate gutatumbisiibwe, nk'okwo nakuragiire. Olye omukate gutatumbisiibwe ebiro mushanju, omu kanya akatairweho omu mwezi gwa Abibu, aha rw'okuba omuli gwonene nirwo warugiire Misiri. Omuntu n'omoi ataliboneka mu maisho gange ngaro zishai.

¹⁶ “Oyekomye ekiro kikuru ky'amagesha, eky'ebiraba bya mbere by'eby'olimire omu musiri. Ekiro ky'amagesha okikore aha nzindo y'omwaka, orwo olikugesha eby'olimire omu ndimiro yawe.

¹⁷ Buli mwaka aha biro bikuru ebi byonshatu, nketwa mushaija omwawe aije kunfukamira, inye Omukama Ruhanga.

¹⁸ “Orwo olintambira ekitambo ky'ekitunganwa otalimpongera mukate gutumbisiibwe. Ebishaju by'ebitunganwa ebitambiirwe ebitambo aha biro bikuru ebi, mutalibirazaho kugoba bwankya.

¹⁹ “Omu myaka yawe ebilyera bili bya mbere obilete Rwensinga y'Omukama Ruhanga wawe. “Otalichumba mwana gwa mbuzi mu mata ga nyinagwo.

Emitahire ya Kanaani

²⁰ “Ndatuma omumalaika akwebembere omu rugendo rwawe akugobye mbali nakutekatekeire.

²¹ Mumuhulire mara mukwate eby'arabagambira. Mutakumushenga kuba amutumire n'inye. Kamulikumushenga tabaganyire.

²² Kyonkai kamurahulira kurungi eby'arabagambira mukabikora, aho ndaba mubisha w'ababisha banyu, ababanoba mbanobe.

²³ Orwo omumalaika wange arabebembera akabagobya omu Baamori, Abahiti, Abaperizi, Abakanaani, Abahivi n'Abayebusi, abanyansi abo nimbaita nibaranduka.

²⁴ Baruhanga babo mutalibabandamaho anga kubafukamira, mutakwata na michwo yabo. Baruhanga abo mubaite, enyomyo zabo muzihendahende.

²⁵ Mufukamire Omukama Ruhanga wanyu, nanye ndibaha omugisha mubone ekyakulya n'amaizi, mbakize n'endwara zona.

²⁶ Omu nsi yanyu talimu mukazi alinaga nda anga kugumbara. Ndibaha n'oburora burai.

²⁷ “Nditinisa ababisha banyu mutakabagobire. Kandi ndibaturutumya, mulibasinga bairuke.

²⁸ Mutakagobireyo ndisindika enwa zibinge Omuhivi, Omukanaani n'Omuhiti.

²⁹ Kyonkai tindibabinga mu mwaka gumoi, ensi etalija ekahinduka irungu n'ebikaaka bikakanya bikabaita kubi.

³⁰ Ndibabinga mporampora orwo mulikutahamu kuhika orwo mulikanya mukaba bangi ab'okushobora kulya ensi egyo.

³¹ Embibi z'ensi yanyu ndizemya aha Nyanja Rutuku kugoba aha Nyanja y'Abafilisiti n'okwema omw'irungu kugoba aha Mwiga gwa Efurati. Abanyansi bamwo ndibanaga omu mikono yanyu, mubabinge mutakatahiiremu kimoi.

³² Mutalikora ndagano nabo anga kugikora na baruhanga babo.

³³ Omu nsi yanyu batalituramu kwija bakabahabisa mukanfakalira. Kamulifukamira baruhanga babo, mazimakwo ogwo guliba mutego ahali inywe.”