Okuruga 22 - Ebibulia 2001Okuliha 1 “K'omuntu aliiba ente anga entama, akagiita anga akagiguza, aliliha ente itanu aha rw'ente emoi, n'entama inai aha rw'entaama emoi. Alihe; k'aliba ataina kantu ahonu aguzibwe aha rw'obushumabwe. 2 “K'omushuma alikwatwa natema enju, akaterwa n'okufa akafa, alimwita talikwatwa mushango gwa bwitamuntu; 3 kyonkai k'alimwita omushana gujwire, aho omushango gw'obwitamuntu gulimukwata. 4 K'alikwatwa n'ekitunganwa akibire kikyarora, ebe nte anga ndogobe anga ntama, alihe kabili. 5 “Orwo omuntu alyonesa omusiri anga endimiro y'emizabibu, anga akataishura ekitunganwakye kikona endimiro y'omuntu ondijo, alihe ebirungi muno kuruga omu musirigwe anga omu ndimiroye y'emizabibu. 6 “Orwo omuliro gulihya gukakwata amahwa, gukokya emiganda y'engano eyagesirwe anga engano etakagesirwe anga omusiri gukahya, ogwo ayaguchumika alihe endihi egobire. 7 “K'omuntu alibikisa mutahiwe empiha anga ebintu ebindi, bikaibirwa omwa kibibikisibwa, aho k'omushuma alikwatwa alihe kabili. 8 K'omushuma aliba atakwetwe, mukama w'enju bamulete mbali balikufukamira Ruhanga anahire okwo tiwe aibire bintu bya mutahiwe. 9 “Buli orwo omuntu alitwara eky'ondiijo, ebe nte, anga ndogobe, anga ntaama, anga kijwaro, anga ekintu kyona kyona ekinagirwe, eky'omuntu aligamba ati, ‘Eki kyange,’ omushango gw'abantu aba bombili gwije mbali balikufukamira Ruhanga. Owo Ruhanga alitaho omushango, alihe mutahiwe kabili. 10 “K'omuntu aliheleka ahali mutahiwe endogobe, anga ente, anga entama, anga ekitunganwa ekindi kyona kyona, kikafa anga kikahutara, anga kikaibwa obuzira muntu wena wena kukibona, 11 ebigambo ebyo kugya kubimara kibikisibwa anahire omu maisho g'Omukama okwo ataibire kintu kya mutahiwe. Aho mukama wakyo aikilize okwo ogu yanahira, mara akibikisiibwe taligira ndihi. 12 Kyonkai kibikisibwa kabaliba bamwibire ekitunganwa ekyo, aho akilihe. 13 Kakililibwa ekikaaka aho akilete kibe bujulizi, taligira ndihi aha rw'ekyalibwa. 14 “K'omuntu aligira ekyo yatiza ahali mutahiwe, kikahutara anga kikafa mukama wakyo ataliho, kitiza agire endihi egobire. 15 Kamukama wakyo alishangwa aliho, kitiza taligira ndihi. Kakiliba kikodesiibwe, kililihwa amahera gakikodesize. Obuntu bw'omuntu 16 “K'omuntu alyohya omwisiki atakasheleirwe akabyama nawe, amujuge, abe mukaziwe. 17 Ka ishe alyanga kumumuha, alihe empiha ezigaine amakura g'omwisiki. 18 “Omukazi omurogi, omwite. 19 “Weena wena alihamba ekigunju, bamwite. 20 “Kaishe muntu alitambira ruhanga wena wena ekitambo, atakitambiire Omukama wenkai, bamwite. 21 “Mutalikora kubi mugenyi anga kumugingiza, aha rw'okuba na inywe mukaba muli bagenyi omu nsi ya Misiri. 22 Mutalishasa ntumbwakazi anga ntabwa. 23 Kamulibashasa, bakantakira, ndihulira okutaka kwabo; 24 mara ndibanigalira muno, ndibaisa embanda, bakazi banyu babe ntumbwakazi, n'abana banyu babe ntabwa. 25 “Omu bantu bange k'olihoramu munaku empiha, otalimutonga magoba. 26 K'oliziza kutwara ekijwaro kya mutahi wawe guli musimbo, okimugarulire eizoba litakatobeire; 27 aha rw'okuba ekyo nikyo kyeshwekokye kyonkai, mara nikyo kijwaro; isi arabyamiraki? K'alintakira, ndimuhulira, ahakuba ngira embabazi.” 28 “Otalijuma Ruhanga anga kukeena mutwazi wa ihanga lyawe. 29 Otalikelererwa kumpongera magesha ga myaka yawe. Divai yawe na majuta gawe ag'emizeituni.” “Mutabani wawe omuzigaijo omumpe. 30 Nikwo olikora n'emizigaijo y'ente zawe n'entama zawe. Ebiro mushanju omuzigaijo gwikare na nyinagwo; aha kiro kya munana ogumpe.” 31 “Muli bantu bange endonkwa; aha rw'ekyo mutalilya nyama ey'ebikaaka bililiire omw'ishwa, mugishabulire embwa. |
Ruhaya DC Bible © Bible Society of Tanzania, 2001.
Bible Society of Tanzania