Okuruga 21 - Ebibulia 2001

Amateka g'abairu

¹ “Egi niyo migenzo ey'oraha Abaisiraeli.

² Orwo omuntu oligura omwiru Omuheburania, akukolere emyaka mukaga, ogwa mushanju agende ataina kyo ayechungwize.

³ K'araija ali wenkai agende ali wenkai. K'alija yashweire yaseire aho omukaziwe agende nawe.

⁴ Ka mukamawe alimuha omukazi mara omukazi ogwo akamuzalira abojo anga abaisiki, omukazi n'abanabe baliba ba mukamawe, wenene aligenda wenkai.

⁵ Kyonkai omwiru ogwo k'aligamba akature ati, ‘Inye ningonza mukama wange, omukazi wange n'abana bange, tindikugenda,’

⁶ aho mukamawe amutware mbali balikufukamira Ruhanga, aha rwigi anga aha muzilingiti, amwiguze empindu okutwi; aho amukolere oburorabwe bwona.

⁷ “Orwo omuntu aliguza omuhara omu buzana, ogu obuzana ataliburugamu nk'okwo abairu baruga mu bwiru.

⁸ K'aliba atashemeleire mukamawe alishangwa amuligiire aho mukamawe ogwo amuleke achungurwe; kandi atalimuguza aha munyamahanga orwo yamujangwire.

⁹ K'omuntu aligura omuzana kumuha omutabani kumushwera, amubone nk'omuhara.

¹⁰ K'omuntu alishwera omukazi wa kabili agendelere kuha mukaziwe ekyakulya n'ebijwaro n'okumuralira nk'obubere.

¹¹ K'aliba atamukoleire bintu ebyo byonshatu, amutaishure agende mara atamwendize mpiha.

Amateka g'obwita muntu

¹² “Weena wena alitera omuntu akamwita nawe bamwite.

¹³ Kyonkai k'aliba yashangwa atamuzimbiire, akamwita atamugendeleire, aho ndakwoleka mbali omuntu ogwo aliirukira.

¹⁴ Kyonkai omuntu k'alita ondijo amugendeleire amurabire omu magezi, ogwo omw'ihye ahali ealutare yange bamwite.

¹⁵ “Weena wena alitera ishe anga nyina, bamwite.

¹⁶ “Buli omoi aliiba omuntu, n'orwo aliba yamugulize anga akaboneka ainawe, bamwite.

¹⁷ “Omuntu wena alikeena ishe anga nyina, bamwite.

¹⁸ “Orwo abantu balirwana, omoi akatera ondijo eibare anga entomi, kiterwa atafire kyonkai akashega,

¹⁹ ahanyuma akaimukamu akakwata ensiso akagendagenda aheru aho olinya alishangwa amuteire talikwatwa mushango, ekiliho alihe ebirobye ebimufeleire, kandi amutambize kurungi.

²⁰ “K'omuntu alitera omwiruwe anga omuzanawe enkoni, omwiru anga omuzana ogwo akamugwa omu mikono, ahabwe ekibonabonyio.

²¹ Kyonkai k'omwiru alimaraho ekiro kimoi anga bibili, mukamawe talihabwa kibonabonyio; aha rw'okuba ogu mwiru akamugura.

²² “Orwo abashaija balirwana bakahutaza omukazi aina enda akagoba aha kuginaga kyonkai hatabaireho kabi kashagireho, ogwo ayamuhutaza bamuteho endihi eyo iba omukazi aliramura. Ashashure nk'okwo abaramuzi baliramura.

²³ K'omukazi wenene alihutara, aho aliba amuhutaize ayehorwe:

²⁴ Elisho liihwa linu, elino liihwa linu, omukono gwihwa gunu, ekilenge kiihwa kinu,

²⁵ amahya gaihwa ganu, orubare rwihwa runu, orushanju rwihwa runu.

²⁶ “K'omuntu litera omwiruwe anga omuzanawe elisho, akalita, amutaishure agende aha rw'elisholye elyafa.

²⁷ Kandi k'alimutera elino akalikura, abe mwiru anga muzana, amutaishure agende aha rw'elinolye elyakuka.

Ente kuhutaza omuntu

²⁸ “Orwo ente elichumita omuntu yaba mushaija anga mukazi akafa, ente egyo bagiteze amabare, kandi enyama yayo etalilibwa, kyonkai mukama wayo talikwatwa mushango.

²⁹ Kandi k'ente eliba emanyiire kuchumita kwema karai, na mukama wayo bamugambire kyonkai tiyagikoma, ekaija ekaita omuntu yaba mushaija anga mukazi, bagiteze amabare na mukama wayo kwakwo bamwite.

³⁰ Kabalimuchwa eky'okwechunguza aho agire kyona kyona ekyo balimuchwa kwechungura.

³¹ K'elichumita omwana w'omuntu yaba mwojo anga mwisiki, bamukore kuhonderana n'eiteka lyonene lyonene eli.

³² K'ente elichumita omwiru anga omuzana, mukama wayo ahe mukama wabo eshekeli makumi gashatu z'efeza, kandi ente bagiteze amabare.

³³ “K'omuntu alisiga ekina kyashamire, anga akakilima atakishwekire, mara ente anga endogobe ekakigwamu,

³⁴ mukama w'ekina ekyo alihe, ahe mukama w'ekitunganwa empiha, ekitunganwa ekyafa kibekye.

³⁵ “Orwo ente y'omuntu elihutaza ey'ondijo, n'okufa ekafa, aho baguze ente elikurora babegane eiguzi lyayo; n'ekitunganwa ekyafa kwakwo bakibegane.

³⁶ Anga kakiliba nikimanyika okwo ente emanyiire kuchumita kwema karai mara mukama wayo atagikomire, ente aragiliha ente, ekitunganwa ekyafa kibekye.