Okuruga 20 - Ebibulia 2001

Emihango ikumi

¹ Ruhanga agamba ebi byona ati,

² “Ninye Omukama Ruhanga wawe, ayakwihire omu nsi ya Misiri, omu bwiru.”

³ “Otaligira baruhanga bandi atali inye.”

⁴ “Otalibaija kishushani anga kukora kishushani kyona eky'ekintu kyona kyona eky'omw'iguru anga eky'omu nsi anga eky'omu maizi okuzimu.

⁵ Otalibibandamira anga kubifukamira, aha rw'okuba inye Omukama Ruhanga wawe mba Ruhanga ow'eibuba, mbonabonyia abannoba na baijukuru babo kuhika aha muzarwa gwa kashatu n'ogwa kanai.

⁶ Kyonkai abangonza bakahikya emihango yange mbagilira ekisha kuhika aha mizarwa enkumi n'enkumi.”

⁷ “Otaligamba bushai ibara ly'Omukama Ruhanga wawe, ahakuba Omukama taliburwa kumukwata mushango agamba bushai eibaralye.”

⁸ “Ijuka ekiro kya Sabato, oyekomye okwo kili kitakatifu.

⁹ Ebiro mukaga ochwaziike, okore emilimo yawe yona;

¹⁰ kyonkai ekiro kya mushanju ni Sabato y'Omukama Ruhanga wawe; otaligikoleramu mulimo gwona gwona, yaba iwe anga mutabani wawe, anga muhara wawe, omwiru wawe anga omuzana wawe, anga ekitunganwa kyawe, anga omunyamahanga ali omwawe.

¹¹ Inye Omukama eiguru n'ensi, enyanja na byona ebigilimu, nkabitonda omu biro mukaga aha kiro kya mushanju nahumura. Aha rw'ekyo ekiro kya mushanju nkakiha omugisha nakihindura kitakatifu.”

¹² Okunire sho na nyoko, nirwo olirora ebiro birai omu nsi ey'Omukama Ruhanga wawe alikukuha.

¹³ “Otalita.

¹⁴ “Otalisiyana.

¹⁵ “Otaliba.

¹⁶ “Otalijulira bishuba ahali mutahi wawe.

¹⁷ “Otalyegomba nju ya mutahi wawe; anga mukaziwe, anga mwiruwe, anga muzanawe, anga nteye, anga ndogobeye, anga ekintu kyona kyona ekilikye.”

¹⁸ Aho orwo abantu bahuliire okusharuka kw'enkuba, enzamba zikajuga bakabona endabyo zarabya, n'eibanga lyachunka omwika, batina bachundwa. Bemelera harai,

¹⁹ bagambira Musa bati, “Iwe otugambire, turahulira, Ruhanga atatugambira tukafa.”

²⁰ Musa abagambira ati, “Mutatiina; Ruhanga yaija kubalenga, nirwo muliikara mumutinire, mutalija mukafakara.”

Amateka ga ealutare

²¹ Orwo Musa alikugoba omwilima elindindi ogwo Ruhanga yabaire alimu abantu bemelera harai.

²² Omukama amugambira ati, “Ogambire Abaisiraeli oti, ‘Mwayebonera okwo inye Omukama nafumora na inywe nyemire omw'iguru.

²³ Mutalinfukamira kandi mukashuba mukakora na baruhanga ab'efeza anga ab'ezahabu.

²⁴ Munyombekere ealutare y'eitaka mube niyo muntambiliraho ebihongo by'okwokibwa n'eby'emilembe, entama zanyu n'ente zanyu. Hona mbali ndikuronka kamuba niho munfukamira ndaijagaho mbahe omugisha.

²⁵ Kandi k'olinyombekera ealutare y'amabare otaligyombekesa mabare gabaizire; kuba k'oligateraho enyondo oliba ogihagaize.

²⁶ Mara otalinyombekera ealutare okagitaho ngazi; k'oligitaho engazi, aha kuzitemba wakwija ojuulira ealutare egyo!’