Okuruga 2 - Ebibulia 2001

Okuzarwa kwa Musa

¹ Aho Omulevita omoi agenda ashwera Omulevitakazi.

² Omukazi atwara enda azara omwana w'omwojo; kayaboine okwo yabaire ali murungi, amusheleka emyezi eshatu.

³ Kayabaire atakishobora kumusheleka kushagaho, amuletera ekitukuru ky'ebifunjo, akihomesa eisha n'elami, akitamu omwana ogwo akiteka omu rufunjo aha rukungu rw'omwiga.

⁴ Munyanya ayemelera harai kake kuleba okw'araba.

⁵ Aho muhara wa Farao asongoka aha mwiga kwoga, abazanabe basigara nibagendagenda aha mwiga. Wenene abona ekitukuru omu rufunjo, atuma omuzanawe kukileta.

⁶ Kayakibundwire abona akana, leba akana kakaba nikalira. Akakwatirwa ekisha, agamba ati, “Akana aka k'Abaheburania.”

⁷ Aho munyanya omwana abaza muhara wa Farao ati, “Ngye nkwetere omulezi Omuheburania akulerere omwana ogu?”

⁸ Muhara wa Farao amugambira ati, “Iroko!” Aho omwisiki agenda ayeta nyina mwana.

⁹ Muhara wa Farao amugambira ati, “Otware omwana ogu omundelere inye ndakuhera.” Aho omukazi atwara omwana amulera.

¹⁰ Omwana akura, amuletera muhara wa Farao, aba mutabani; amuruka eibara amweta Musa, aha rw'enshonga akagamba ati, “Kuba nkamwihya omu maizi.”

Musa nasingirwa Midiani

¹¹ Ekiro kimoi ka Musa yabaire yakuzire, akyalira abarumuna Abaheburania, abona enaku zabo, abona Omumisiri natera Omuheburania w'eihangalye.

¹² Alebaleba oku n'oku tabona muntu, aho aita Omumisiri ogwo amusheleka omu mushenye.

¹³ Bukeire kayashohoire aheru, abona Abaheburania babili nibarwana; abaza ayabaire naboya, ati, “Kubaki notera mutahi wawe?”

¹⁴ Ogu amuhorora ati, “N'ohai akutaireho kututwara okaturamura? Noyenda kunyita nk'okwo oisire Omumisiri?” Aho Musa atina atekeleza ati, “Mazimakwo ekigambo ekyo kyamanyikire.”

¹⁵ Farao kayakihuliire ahiga kumwita. Kyonkai Musa amwiruka, atura omu nsi ya Midiani.

¹⁶ Omukuhani wa Midiani akaba aina abahara mushanju. Ekiro kimoi Musa ashuntamire bwatana aha iziba baija bataha amaizi, baijuza enyato kwoshera obuhyo bwa ishebo bw'entaama.

¹⁷ Abashumba baija bababinga, kyonkai Musa ayemelera abajuna, boshera obuhyo bwabo bw'entaama.

¹⁸ Orwo baizire ahali ishebo, Reweli, ababaza ati, “Byaba bitai kir'eki kwija bwangu?”

¹⁹ Bamushubamu bati, “Omumisiri yatwihya omu mikono y'abashumba, nangu yatutahira n'amaizi, yayoshera obuhyo.”

²⁰ Abaza abahara abo ati, “Ali nkahai? Kubaki omushaija ogwo mwamusigayo? Mumwete alye ekyakulya.”

²¹ Musa asanirwa kutura n'omushaija ogwo; na wenene asiigira Musa omuhara Sipora.

²² Amuzalira omwana w'omwojo, Musa amweta eibara Gerishomu; aha rw'okuba akagamba ati, “Mbaire mufuruki omu ihanga eli.”

Ruhanga naijuka Isiraeli

²³ Ebiro kabyakeire bingi, omukama wa Misiri afa. Abaisiraeli omu bwiru bwabo obwo bataga, bataka kubona obujuni. Okutaka kwabo okwo kugoba ahali Ruhanga.

²⁴ Ruhanga ahulira okutaka kwabo, aijuka endaganoye na Aburahamu, Isaka na Yakobo.

²⁵ Abona enaku z'Abaisiraeli abaganyibwa.