Okuruga 18 - Ebibulia 2001

Yetiro nazindukira Musa

¹ Yetiro omukuhani wa Midiani, ishezara Musa, ahulira bya ebyo Ruhanga yabaire akoleire Musa na n'Abaisiraeli abantube, akabaihya Misiri.

² Aho aleta omuhara Sipora muka Musa, kuba Musa akaba amushubizeyo,

³ n'abatabani bombili. Omoi akaba ali Gerishomu, aha rw'okuba Musa akagamba ati, “Mbaire ndi mufuruki omw'ihanga,”

⁴ n'ondijo akaba ali Eliezeri, enshonga akagamba ati, “Ruhanga wa tata akanjuna, yandokora aha mbanda ya Farao.”

⁵ Yetiro aija na muka Musa n'abatabani omw'irungu mbali Musa yabaire asisiire aha Ibanga lya Ruhanga.

⁶ Orwo omuntu omoi yagambire Musa ati, “Lea, shozara Yetiro na mukazi wawe na batabani bawe bombili nibaija owawe.”

⁷ Musa ashohora kutangilira ishezara, abandama mara amunywegera, babazangana amakuru gabo bamara bataha omw'ihema.

⁸ Aho Musa agambira ishezara byona okwo Omukama yakozire Farao n'Abamisiri aha rw'Abaisiraeli, n'enaku zona ezabagwireho omu muhanda, n'okwo Omukama yabarokoire.

⁹ Yetiro ashemelerwa aha rw'ebirungi byona ebyo Omukama yabaire akoleire Abaisiraeli kubona nabaihya omu mikono y'Abamisiri.

¹⁰ Yetiro agamba ati, “Omukama asingizibwe, abaihire omu mikono y'Abamisiri n'omu mikono ya Farao.

¹¹ Mbwenu namanya okwo Omukama ali mukuru kushaga baruhanga bona, aha rw'okuba arokoire abantube omu mikono y'Abamisiri orwo babaire nibabaita kubi n'ekyeju.”

¹² Yetiro ahongera Ruhanga ekihongo n'ebitambo; Aroni aija n'abebembezi bona ba Isiraeli kulya hamoi na ishezara Musa ekyakulya, kili kigiro ky'okufukamira Ruhanga.

Musa naronda abaramuzi

¹³ Bukeire Musa ashuntama kuramura abantu. Abantu bamwemeleraho kwema bwankya kuturuka bwaigoro.

¹⁴ Orwo ishezara yaboine bya ebyo yabaire nakolera abantu, abaza ati, “Biki ebi eby'olikukolera abantu? Kubaki noshuntama wenkai mara abantu nibakwemeleraho kwema bwankya kuturuka bwaigoro?”

¹⁵ Musa amuhorora ati, “Nindagirwa ntyo kuba abantu nibanyijaho kambabaliza ahali Ruhanga.

¹⁶ Orwo balikuhakana banyijaho, aho ndamura omuntu na mutahiwe, mara mbamanyisa ebiragiro bya Ruhanga n'emihangoye.”

¹⁷ Ishezara amugambira ati, “Eky'olikukora ti kirungi.

¹⁸ Iwe n'abantu ab'oinabo nimwija kwelemesa, aha rw'okuba omulimo ogu nigukusikilira muno; toshobora kugukora oli wenkai.

¹⁹ Mbwenu hulira nkugambire; ninyija kukuhanulira mara Ruhanga abe naiwe! Iwe obe mubaka w'abantu omu maisho ga Ruhanga, mara omugambire empaka zabo.

²⁰ Kandi obegese emiku n'emihango, obagambire okwo bararora n'ebyo baragirwe kukora.

²¹ Kandi orondemu abantu ab'akalyo abalikutina Ruhanga, abesigwa mara abatalikulya rushwa; aba obe nibo otaho kutwara abantu enkumi, ebikumi, amakumi gatanu n'eikumi.

²² Babe baramuzi baramure abantu omwanya gwona; buli kigambo ekihango bakikuletere, kyonkai ekigambo ekike kyona kyona bakyeramulire. Aho omulimo gurakworobera kushaga, na bonene bakutwaze omugugu ogu.

²³ K'orakora otyo, nk'okwo Ruhanga alikukuragira, aho toyelemese, abantu bona barashuba omuka empaka zihoire eli milembe.”

²⁴ Kityo Musa ahulira ebyo ishezara yamugambira, aba nikwo akora.

²⁵ Aronda abantu ab'akalyo omuli Isiraeli yona, abahindura batwazi b'enkumi, ab'ebikumi, ab'agatanu n'ab'eikumi.

²⁶ Baramura abantu ebiro byona, emishango egumire bagileteraga Musa, kyonkai ekigambo ekike bakyeramuliraga.

²⁷ Ahanyuma Musa ataishura ishezara, ishezara agaruka owabo.