Okuruga 15 - Ebibulia 2001

Oruhoya rwa Musa

¹ Aho Musa n'Abaisiraeli bahoyera Omukama oruhoya oru, bati, “Mpoyere Omukama, aha rw'okuba yasinga yabona kitinwa; efarasi n'omukuubi wayo, yanaga omu nyanja.

² Omukama niwe mani gange mara ruhoya rwange, yaba mulokozi wange. Ogu niwe Ruhanga wange, ndamuhaisiliza; Ruhanga wa tata ndamusingiza.

³ Omukama mwisherukale, ‘Mukama’ nilyo ibaralye.

⁴ Amagali ga Farao n'eihelye yanaga omu nyanja, n'abakuru b'eihe emanzi muno batoka omu Nyanja Rutuku.

⁵ Emitunga yababunda, batontobera obuziba nk'eibare.

⁶ Omukono gwawe gwa bulyo, waitu Mukama, amani gagwo g'ekitinwa; omukono gwawe gwa bulyo, waitu Mukama, guchwagulikya omubisha.

⁷ Ekitiinwa kyawe kihango nikyo osingisa ababisha bawe, osindika ekiniga kyawe kibokya okw'omuliro gwokya ekishagate.

⁸ K'enyindo zawe zayesaimwire amaizi gatuumangana, amaizi agaba nigagenda gayetuma hamoi; omu nyanja obuziba okuzimu haganda.

⁹ Ababisha bagambire bati, ‘Tubabinge tubakwate, tubegane eminyago, tutware byona ebyo tulikwenda, tushohorore embanda zaitu tubasilikye.’

¹⁰ Okaihisa omuyaga gwawe, enyanja yababunda, batobera nk'eishasi omu maizi gangi ag'amani.

¹¹ Waitu Mukama ni ruhangaki alikukushusha? N'ohai alikukwigana iwe omutakatifu w'ekitinwa? N'ohai ow'okukora ebitangazo n'ebikorwa by'amani?

¹² Okaimukya omukono gwa bulyo, ensi yabamira.

¹³ Omu kisha kyawe ochungwire abantu bawe, washuba wabebembera, omu mani gawe obahabwire wabagobya omu nsi yawe entakatifu.

¹⁴ Amahanga gahulire gachundwa, abataka ba Filisitia bakwatwa orumatu.

¹⁵ Abatwazi ba Edomu nibahwahwana, abebembezi ba Moabu orujugumbo rubakwete; abataka bona ba Kanaani bayagiliire.

¹⁶ Bagwerwa akamazi n'orumatu; aha rw'enshonga y'obungi bw'amani gawe, bagandaire nk'eibare, kuhika orwo abantu bawe barahingura, waitu Mukama, kuhika orwo abantu bawe ab'ochungwire barahingura.

¹⁷ Waitu Mukama, orabagobya omu nsi egyo, obabyare aha ibanga lyawe, omwanya ogw'ohindwire buturo bwawe, ahatakatifu, waitu Mukama ah'emikono yawe etaireho.

¹⁸ Omukama alitwara eirai n'eirai.”

Oruhoya rwa Miriamu

¹⁹ Orwo efarasi za Farao n'amagalige n'ab'efarasibe batahire omu nyanja, Omukama akagarura enyanja yababunda; kyonkai Abaisiraeli omu nyanja baraba aha rukaru.

²⁰ Aho Miriamu, omurangi, munyanya Aroni akwata akadiika, n'abakazi baturuka bamuhondeire bakwete obudiika nibazina.

²¹ Miriamu abahoyera ati, “Muhoyere Omukama, kuba yasinga, yabona ekitinwa kihango; efarasi n'agikuubire yanaga omu nyanja.”

Amaizi g'enshalizi

²² Aho Musa aihya Abaisiraeli aha Nyanja Rutuku, bataha omw'irungu lya Shuri; bagenda ebiro bishatu omw'irungu elyo bataboinemu maizi.

²³ Orwo bagobire Mara tibashoboire kunywa maizi gaho enshonga gakaba nigashalira; nikyo hayeteirwe Mara.

²⁴ Abantu bajojobera Musa bati, “Turanywaki?”

²⁵ Musa atakira Omukama; Omukama amwoleka omuti, agunaga omu maizi, amaizi ganulilira. Honene aho Omukama abaha ekiragiro n'omugenzo, abaraganisa

²⁶ ati, “K'oligira obwegendeleza okahulira eiraka lyange, okakora ebilikunshemelera oketaho emihango yange, okakwata ebiragiro byange, tindikusindikira ndwara ezo nasindikiire Abamisiri; Omukama omukiza wawe aba inye.”

²⁷ Abaisiraeli bagoba Elimu mbali habaire hali enchuro ikumi na ibili n'emitende nshanju, basisira aha nchuro ezo.