Okuruga 14 - Ebibulia 2001

Nibashabuka Enyanja Rutuku

¹ Aho Omukama agambira Musa ati,

² “Ogambire Abaisiraeli bagaruke basisiire omu maisho ga Piahahiroti omugati ya Migidoli n'Enyanja Rutuku, bwatana Baalizefoni.

³ Farao naija kutekeleza ati, ‘Abaisiraeli nibabumbulikwa omuli Misiri; eirungu lyabatangatanga.’

⁴ Inye ndamugumanganisa omutima ababinge, nyije musinge n'eihelye mbonereho ekitinwa. Abamisiri baramanya okwo Omukama aba inye.” Abaisiraeli baba nikwo bagira.

⁵ Orwo bagambire omukama wa Misiri okwo abantu abo bairuka, wenene n'abaramatabe befuhya bati, “Twakoraki eki, kutaishura Abaisiraeli bakagenda bakalekera kutukolera?”

⁶ Kityo atekateka egaliye y'endashana n'eihelye.

⁷ Agenda n'amagalige gona ga Misiri, hamoi n'amagali rukaga agarungi muno, gaina abakuru bago.

⁸ Omukama agumanganisa Farao omutima, omukama wa Misiri ogwo abinga Abaisiraeli ngu barugisamu eijeme.

⁹ Eihe ly'Abamisiri n'efarasi za Farao n'amagali, n'ab'efarasi n'eihelye, bababinga babashanga basisiire aha Nyanja Rutuku bwatana Piahahiroti, omu maisho ga Baalizefoni.

¹⁰ Orwo Farao yagobire haihi, Abaisiraeli kunaga amaisho, babona Abamisiri nibatambuka babahondeire; bagira obutini bungi. Batakira Omukama;

¹¹ bagambira Musa bati, “Misiri talimu iwe kutuleta kugwa omw'irungu? Watukoraki kutwihya Misiri?

¹² Eki tikyo twakugambiire tuli Misiri tuti, ‘Otuleke tukolere Abamisiri?’ Hakili twakukoleire Abamisiri kukira okugwa omw'irungu.”

¹³ Musa abagambira ati, “Mutatiina, mugume, mwije mubone okwo Omukama arabarokora kir'eki; enshonga Abamisiri abo mulikubona mbwenu, timulibabona rundi n'akati.

¹⁴ Omukama arabarashanira, ekyanyu mutebekane.”

¹⁵ Omukama agambira Musa ati, “Nka nondilira? Gambira Abaisiraeli bagendelere.

¹⁶ Imukya enkoni yawe ogyolekeize omu nyanja ogibeganise, Abaisiraeli barabe ahomire bagiguturane.

¹⁷ Inye ndagumanganisa Abamisiri emitima nangu batahemu babahondeire; Farao ninyija kumusinga n'eihelye, amagalige n'ab'efarasibe, mbabonereho ekitinwa.

¹⁸ Abamisiri baramanya okwo Omukama aba inye orwo ndaba nasingire Farao, amagalige n'ab'efarasibe, namuboneireho ekitinwa.”

¹⁹ Aho omumalaika wa Ruhanga ayabaire ayebembeire eihe lya Isiraeli aija agya enyuma yabo; n'enyomyo y'ekichwi eruga omu maisho gabo ebemelera enyuma;

²⁰ eija omugati y'eihe lya Misiri n'eihe lya Isiraeli. Habaho ekichwi n'omwilima; obwire bukya obuzira eihe kugoba linu ekiro kyona.

²¹ Musa aimukya omukono aha nyanja; n'Omukama asindika omuyaga gw'amani gw'oburugaizoba ekiro kyona, guchuma enyanja enyuma, amaizi gabeganuka enyanja agihindura nsi eyomire.

²² Abaisiraeli baraba omugati y'enyanja aha nsi eyomire, amaizi gaba rusiika aha bulyo bwabo n'aha bumosho bwabo.

²³ Abamisiri babahondera, bababinga, bataha omu nyanja bagigoba omugati n'efarasi za Farao zona, amagalige n'ab'efarasibe.

²⁴ Bwankya Omukama ayema omu nyomyo y'omuliro n'ey'ekichwi aleba eihe ly'Abamisiri,

²⁵ agumanganisa entaro z'amagali gabo bagenda kubikubi. Aho Abamisiri bagamba bati, “Katwiruke turuge omu maisho ga Isiraeli; kuba n'orwo tulikurashana nabo Omukama nabarashanira.”

²⁶ Omukama agambira Musa ati, “Imukya omukono aha nyanja, amaizi gagaruke gabunde Abamisiri abo, amagali gabo n'ab'efarasi babo.”

²⁷ Aho Musa aimukya omukono aha nyanja, orwo obwire bwakeire enyanja egaruka n'amani; Abamisiri bairuka, kyonkai Omukama abakinigiza omu nyanja omwo omugati.

²⁸ Amaizi gagaruka gabunda amagali n'ab'efarasi n'eihe lyona lya Farao ababaire babahondeire omu nyanja. Tibasigaireho muntu n'omoi.

²⁹ Kyonkai omu nyanja omwo Abaisiraeli bakaraba aha rukaru, obulyo bwabo n'obumosho amaizi gaba rusiika.

³⁰ Nikwo kir'ekyo Omukama yarokoire atyo Isiraeli omu mikono y'Abamisiri; bakabona emitumbi yabo aha mwaro.

³¹ Babona n'omulimo gw'amani ogw'Omukama yakozire aha Bamisiri abo; batina Omukama bamwesiga; besiga n'omwiruwe Musa.