Okuruga 13 - Ebibulia 2001

Emizigaijo y'Abaisiraeli

¹ Omukama agambira Musa ati,

² “Ompongere emizigaijo yona. Omuzigaijo gwona gwona omu Baisiraeli abe muntu anga kigunju, omuzigaijo ogwo gwange.”

Ekiro kikuru ky'emikate etatumbisiibwe

³ Musa agambira abantu ati, “Mwijukega ekiro eki ekyo mwarugiiremu Misiri, omu bwiru; Omukama akabaihya omu nsi egyo omu bushoborabwe, kityo mutalilya mukate gutumbisiibwe.

⁴ Kir'eki omu mwezi gwa Abibu nimuragirwa kuruga Misiri.

⁵ Orwo Omukama alibagobya omu nsi y'Abakanaani, Abahiti, Abaamori, Abahivi n'Abayebusi, eyo yanahiliire baisheinywe okwo aligibaha, ensi elikusheshekana amata n'obwoki, mwekomye omuchonchozo ogu omu mwezi ogu.

⁶ Ebiro mushanju mulye omukate gutatumbisiibwe, kandi aha kiro kya mushanju mushemeze ekiro kikuru ky'Omukama.

⁷ Ebiro mushanju ebyo mulye omukate gutatumbisiibwe. Mutalizoka mwina mukate gutumbisiibwe, n'eitumbyo omu nsi yanyu yona litalizokamu.

⁸ Aha kir'ekyo ogambire mutabani wawe oti, ‘Eki ninkikora aha rw'eby'Omukama yankoleire orwo narugiire Misiri.’

⁹ Okukora ekiro kikuru eki kurabaga kaijukiro nk'ekintu ekikukomirwe aha mukono anga aha buso. Kukwijukyega kwikara noshubamu Amateka g'Omukama, aha rw'okuba akakwihya Misiri n'obushobora bw'amani.

¹⁰ Aha rw'ekyo oyekomye kuhikya ekiragiro eki omu bukiro obutairweho omwaka aha gundi.

Emizigaijo y'Abaisiraeli

¹¹ “Omukama alikutahya omu nsi y'Abakanaani nk'okwo yakurahiliire iwe na basho, mara akagikuha,

¹² olishorolera Omukama ogwo emizigaijo yona. Emizigaijo emishaija y'ebitunganwa byawe byona eliba y'Omukama;

¹³ Buli muzigaijo gw'endogobe oliguchunguza akataama, anga k'oliba otenzire kuguchungura oguhende ebikya. Omuzigaijo gw'omuntu omuli batabani bawe oguchungure.

¹⁴ Omu biro ebilija mutabani wawe k'alikubaza ati, ‘Eki kina nshongaki?’ Omugambire oti, ‘Omukama akatwihya Misiri omu bwiru, yatwihisayo obushobora bw'amani.

¹⁵ Orwo Farao yagizire ekyejo akanga kututaishura, Omukama yaita emizigaijo yona omu nsi ya Misiri, emizigaijo yombili, ogw'omuntu n'ogw'ekitunganwa. Aha rw'ekyo nintambira Omukama ebishaija byona ebizigaijo; kyonkai batabani baitu bona emizigaijo tubachungura.’

¹⁶ Okushemeza ekiro kikuru kya Pasika kubega kaijukiro, nk'ekintu ekikomirwe aha mukono anga aha buso, aha rw'okuba Omukama akatwihisa Misiri obushobora bw'amani.”

Abaisiraeli nibaruga Misiri

¹⁷ Orwo Farao yataishwire abantu kugenda, Ruhanga tiyabarabize muhanda gwa nsi ya Bafilisiti, n'orwo gulinya gwabaire guli gwa haihi. Ahakuba akagamba ati, “K'abantu batakwija bakefuhya kabakubona endashana, bakagaruka Misiri.”

¹⁸ Akabazongesa yabarabya omuhanda gw'eirungu omu bwolekera bw'Enyanja Rutuku. Abaisiraeli bakaruga Misiri bekomeire endashana.

¹⁹ Musa akagenda n'amagufa ga Yozefu; Yozefu akaba anahize Abaisiraeli ati, “Ruhanga k'alibasingira muliragirwa kwihya amagufa gange munu.”

²⁰ Baruga Sukoti basisira Etamu aha rubibi rw'eirungu.

²¹ Nyemishana Omukama yabebemberaga omu nyomyo y'ekichwi kuboleka omuhanda kandi omu kiro abebembera omu nyomyo y'omuliro kubakiza, babone kugenda nyemishana n'ekiro.

²² Nyemishana enyomyo y'ekichwi tiyabarugiire mu maisho, kwakwo n'enyomyo y'omuliro mu kiro.