Okuruga 1 - Ebibulia 2001

Enaku za Isiraeli omuli Misiri

¹ Aga nigo mabara ga batabani ba Isiraeli abaizire nawe Misiri, buli muntu n'omutungogwe:

² Rubeni, Simeoni, Levi na Yuda,

³ Isakari, Zabuloni na Benjamini,

⁴ Dani, Nafutali, Gadi na Asheri.

⁵ Oruzaro rwona rwa Yakobo bakaba bali bantu nshanju; Yozefu akaba yatwire Misiri.

⁶ Aho Yozefu afa, na barumunabe bona, n'omuzarwa gulinya gwona.

⁷ Kyonkai baijukuru ba Isiraeli bakagira oruzaro, bakanya muno; mara bayeyongera bagira amani gangi muno munonga; kityo ensi bagijura.

⁸ Aho agyaho omukama omuhya omuli Misiri ayabaire atalikumanya Yozefu.

⁹ Agambira abantube ati, “Lea, Abaisiraeli bangi muno mara nibatukiza muno amani.

¹⁰ Mwije tubarabe omu magezi bataija bakakanya, aha rw'okuba katwakugwerwa endashana bakwema n'ababisha baitu baturashanisa mara bairuka baruga omu nsi egi.”

¹¹ Aha rw'ekyo babateraho abanyampara babashase n'emijarabo esikiire; bombekera Farao ebigo by'esitoa, Pitomu na Ramesesi.

¹² Kyonkai orwo bashasibwaga okushagaho baba nirwo bakanya okushagaho n'okwemalira ensi yona. Abamisiri batina muno Abaisiraeli.

¹³ Kityo bakoza Abaisiraeli emilimo y'ensika,

¹⁴ babata aha kahangahango nibabakoza emilimo y'omujarabo, nibabajungisa eitaka n'okubabumbisa amatofari, n'engeli zona z'emilimo y'omu ndimiro; emilimo yabo na babakoza ey'ensika.

¹⁵ Aho omukama wa Misiri agambira abazaza Abaheburania, omoiho eibara akaba nayetwa Shifura n'ondijo nayetwa Pua.

¹⁶ Ati, “Orwo muraba nimuzaza Abaheburania, aha butebe bw'okuzaliraho, k'ali mwojo, mumwite; kyonkai k'araba ali mwisiki mutamwita.”

¹⁷ Kyonkai abazaza batina Ruhanga, tibakozire nk'okwo omukama wa Misiri yabaragiire, abana b'abojo tibabaisire.

¹⁸ Aho omukama wa Misiri ayeta abazaza, ababaza ati, “Kubaki mukozire eki, abaana bojo mutabaisire?”

¹⁹ Abazaza bagambira Farao bati, “Abaheburania tibalikushusha Bamisiri, aha rw'enshonga bonene baina amani gangi nibazara omuzaza atakabagobire.”

²⁰ Aho Ruhanga asingira abazaza; mara abantu abo bakanya bagira amani gangi muno.

²¹ Aha rw'okuba abazaza bakatina Ruhanga, yabaha omugisha gw'oruzaro.

²² Aho Farao aragira abantube bona ati, “Buli mwana mwojo arazarwa omu Baheburania mumutokye omuli Naili, kyonkai omwana mwisiki mutamwita.”