Obwijukiro 8 - Ebibulia 2001

Ensi nungi

¹ “Mwegendeleze kukwata buli muhango ogwo inye ndikubaragira kir'eki nirwo inywe mulirora mukakanya, mukagya omu nsi ey'Omukama yanahire kuha baisheinywe mukagilya.

² Muraijukaga okwo Omukama Ruhanga wanyu yabahabwire omu rugendo oru rwona emyaka egi 40 omw'irungu nabatwekera ebiyengo kubalenga, amanye nimutekelezaki kandi amanye nka mwakukwete emihangoye anga chei.

³ Akabafutika yabaleka mwarumwa enjara, yabalisa na manu eyo mwabaire mutalikumanya; na baisheinywe tibagimanyire, abone kubamanyisa okwo omuntu atatungwa kyakulya kyonkai; atungwa buli kigambo eky'Omukama agamba.

⁴ Omu myaka egi 40 ebijwaro byanyu tibyabatemukiire aha mubili, n'amaguru ganyu tigazimbire.

⁵ Ahonu mumanyire aha mutima okwo nk'okw'omuntu agorora omwanawe nikwo Omukama Ruhanga wanyu alikubagorora.

⁶ Kityo mukwate emihangoye, mukore eby'alikwenda, mara mumutine.

⁷ Nabatahya omu nsi nungi, ensi ey'obwiga bw'amaizi, ey'enchuro zilikutabuka omu mpanga n'omu mabanga,

⁸ ey'engano n'eshayiri, ey'emizabibu n'emitini n'emikomamanga, ensi ey'emizeituni n'obwoki,

⁹ mbali mulilya ekyakulya kitabuzire, mbali mutaliburwa kantu, ensi ey'amabare g'ekyoma, ey'amabanga ago mulishokoramu omulinga.

¹⁰ Mulilya mwigute, mara musingize Omukama Ruhanga wanyu aha rw'ensi nungi ey'abahaire.”

Omukama mutalimwebwa

¹¹ “Mwelinde mutalyebwa Mukama Ruhanga wanyu. Mukwate emihangoye, n'ebiragirobye n'emigenzoye ebyo ndikubaragira kir'eki.

¹² Orwo muraba mwaliire mwaigusire, mwayombekire amaju garungi mwagatwiremu,

¹³ orwo amahyo ganyu g'ente n'entama galyeyongera, n'efeza n'ezahabu zanyu zikeyongera, n'ebyo mwinabyo byona bikeyongera,

¹⁴ mutalihindura mitima mukebwa Omukama Ruhanga wanyu ayabaihire Misiri omu bwiru,

¹⁵ ayabahabwire omw'irungu lihango mara ly'okutinisa, ely'enjoka z'omuliro n'obuminai n'ensi eyomire eyabaire etaina maizi, ayakwihire amaizi omu rwazi rw'enkangabuye,

¹⁶ ayabalisize manu omw'irungu eyo baisheinywe batamanyaga, abone kubafutika n'okubalenga, ahanyuma abakolere ebirungi.

¹⁷ Mulimanya mutalija mukatekeleza muti, ‘Obushobora bwaitu n'amani gaitu nibyo bitubonesize eitunga eli.’

¹⁸ Muraijukaga Omukama Ruhanga wanyu, aha rw'okuba niwe abaha obushobora bw'okubona eitunga; nirwo aliikara agumire aha ndaganoye eyo yanahiliire baisheinywe, nk'okwo bikyali na kir'eki.

¹⁹ Kamulyebwa Omukama Ruhanga wanyu, mukekwata baruhanga abandi mukabafukamira, kir'eki nimbatatira bwoli bwoli okwo obuzira kulengeshanyia mulisilika.

²⁰ Kamuliba mutahuliire eby'Omukama Ruhanga wanyu alikubagambira, mulisilika nk'amahanga ag'alikusilikya orwo olikutaha omu nsi yago.”