Obwijukiro 5 - Ebibulia 2001

Emihango ikumi

¹ Aho Musa ayeta Isiraeli yona abagambira ati, “Inywe bantu ba Isiraeli, muhulire ebiragiro n'emigenzo ebyo ndikubagambira kir'eki. Murabyega mara muraba begendeleza kubihikya.

² Omukama Ruhanga waitu akakora endagano naichwe omuli Horebu.

³ Tiyagikozire na batat'enkurw'ichwe, akagikora naichwe, ichwena abalikurora abali aha kir'eki.

⁴ Akagamba naichwe orubona aha ibanga, ayemire omu muliro.

⁵ Inye aho nkaba nyemeleire omugati y'Omukama nainywe aha kanya kalinya kubagambira ekigambokye. Aha rw'okuba omuliro gukabatinisa n'eibanga timwalitembire. Akagamba ati,

⁶ ‘Inye ndi Mukama Ruhanga wawe ayakwihire omu nsi ya Misiri omu bwiru.’

⁷ ‘Otaligira baruhanga abandi atali inye.

⁸ Otalibaija kishushani kya kintu kyona kyona eky'omw'iguru anga omu nsi anga omu maizi.

⁹ Otalibibandamira anga kubifukamira; aha rw'okuba inye Omukama Ruhanga wawe ndi Ruhanga omunyaibuba, mbonabonyia abana nimbatura entambara za baishebo abannoba, kugoba aha muzarwa gwa kashatu n'ogwa kanai.

¹⁰ Kyonkai enkumi abangonza bakahikya emihango yange mbagilira ekisha.’ ”

¹¹ “Otaligamba bushai ibara ly'Omukama Ruhanga wawe; aha rw'okuba aliligamba bushai tindimuganyira.”

¹² “Oyekomye ekiro kya Sabato, omanye okwo kili kitakatifu nk'okwo Omukama Ruhanga wawe yakuhangiire.

¹³ Omu biro mukaga okore emilimo yawe yona;

¹⁴ kyonkai ekiro kya mushanju ni Sabato y'Omukama Ruhanga wawe. Aha kir'ekyo otalikora mulimo gwona gwona; iwe anga mutabani wawe, anga muhara wawe, anga ente yawe, anga endogobe yawe, anga ekitunganwa kyawe kyona kyona, anga omunyamahanga atwire omwawe, anga omwiru wawe, anga omuzana wawe. Boshe, bahumure nka iwe.

¹⁵ Oijuke okwo wabaire oli mwiru omu nsi ya Misiri, mara okw'Omukama Ruhanga wawe yakwihire kulinya n'obushobora bungi muno. Nikyo yakuragiire kwoshera ekiro kya Sabato.”

¹⁶ “Okunire sho na nyoko, nk'okwo Omukama Ruhanga wawe yakuragiire; nirwo oligira oburora burai okagira n'emilembe omu nsi ey'Omukama Ruhanga wawe alikwija kukuha.

¹⁷ Otaliita.

¹⁸ Kandi otalisiyana.”

¹⁹ “Kandi otaliiba.

²⁰ Kandi otalijulira bishuba ahali mutahi wawe.

²¹ Kandi otalyegomba muka mutahi wawe, endimiroye, omwiruwe, omuzanawe, enteye, endogobeye, anga kyona kyona ekilikye.”

²² “Ebigambo ebi Omukama akabibagambira muhurwire inywena. Akabibagambira n'eiraka lihango aha ibanga, ayemire omu muliro, n'omu kichwi, n'omu mwilima elindindi. Mara tiyayongeireho kishagireho. Akabihandika aha mbengo ibili z'amabare yazimpa.”

Abantu nibatina

²³ “Orwo mwahuliire eiraka lyemire omu mwilima oku eibanga nilyaka omuliro, abakuru b'enganda bona n'abagurusi bakangoba

²⁴ bangambira bati, ‘Omukama Ruhanga waitu yatwoleka ekitinwakye n'obuhangobwe, mara twahulira eirakalye lyemire omu muliro. Kir'eki twabona Ruhanga nafumora n'omuntu ogwo akyarora.

²⁵ Mbwenu aha rw'ekyo kubaki tufe? Kuba omuliro ogu ogw'amani nigwija kutusosotora; katurahulira eiraka ly'Omukama Ruhanga waitu orundi, nitufa.

²⁶ Ni muntuki arahuliire eiraka lya Ruhanga nyamurora lyemire omu muliro, nk'okwo twahulira, akashuba akarora?

²⁷ Iwe obe niwe ogobayo, ohulire byona eby'Omukama Ruhanga waitu aragamba, mara obitugambire, turabihulira mara tubikore.’ ”

²⁸ “Ebyo mwangambiire Omukama akabihulira. Aho wenene Ruhanga yangambira ati, ‘Eby'abantu aba bakugambira nabihulira; byona by'amazima.

²⁹ Kabakugizire omutima nk'ogu ebiro byona, kuntina n'okukwata emihango yange yona, bakagira emilembe n'abana babo eirai lyona!’ ”

³⁰ Ogende obagambire oti, “Mushube omu mahema ganyu.

³¹ Kyonkai iwe onyemelere haihi aha, ndakugambira emihango yona n'ebiragiro n'emigenzo eby'orabegesa, baije babigobesheleze omu nsi eyo ndabaha!”

³² Aha rw'ekyo mube begendeleza kukora nk'okwo Omukama Ruhanga wanyu yabaragiire; mutatarambukanira bulyo anga bumosho.

³³ Mutambukire omu muhanda ogw'Omukama Ruhanga wanyu abaragiire murore, mugire emilembe, murore ebiro bingi omu nsi eyo muralya.