Obadia 1 - Ebibulia 2001

¹ Okubonekerwa kwa Obadia. Omukama Ruhanga nagamba ahali Edomu! Tuhuliire amakuru kuruga aha Mukama, orwo atumire entumwa aha mahanga negamba eti, “Mwimuke! Twimukye tutere Edomu.”

Omukama alibonabonyia Edomu

² Omukama nagambira Edomu ati, “Leba, ndikuhindura muke omu mahanga, bakugayire kimoi.

³ Eikuru lyawe likulembire. Iwe atura omu mpako z'amabare, otura aha mabanga eiguru, otekeleza oti, ‘N'ohai alimpananturayo akangarura ahansi?’

⁴ N'orwo oratungera eiguru nk'enkwaju, ekishunkuli kyawe okakiteka omu nyanyinyi, okwo nayo ndikuhananturayo nkugarure ahansi.” Alikugamba Mukama.

⁵ “Abashuma kabakukuzinda, abanyagi omu kiro bakakutahilira, wakusilik'otai! Tibakwiba okwo balikwenda? Abanogi b'ezabibu kabakwija omwawe, tibakukusigiramu ez'okurondaronda zonkai?

⁶ Munyagirwe mutai inywe baijukuru ba Esau! Ebyanyu babitwete byona.

⁷ Abo mwakozire nabo endagano babagobeize, ensi yanyu bagibabingamu. Abantu abo mutura naboge babateire, banywanyi banyu abo mwesiga babatega omutego; kyonkai ebyo timubishobokeirwe.”

⁸ Omukama nahanga ati, “Kir'ekyo ndiita abamanyi omuli Edomu mbamaremu, n'amagezi gahwe omw'Ibanga lya Esau.

⁹ Iwe Temani, abaisherukare bawe balihahanwa emyoyo, buli muntu aha Ibanga lya Esau bamwite.”

Entabuko y'ekibonabonyio kya Edomu

¹⁰ “Enshoni zilikubunda, oshube osilikire kimoi aha rw'obukatili obwo wakoleire Yakobo murumuna wawe.

¹¹ Kiro ekyo wayeshungushwire, orwo abanyamahanga batwete ebintubye, ebihigibye bakabihenda, Yerusalemu bakagitekera enshoga, naiwe okaba oli kumoi na bonene.

¹² Kyonkai murumuna wawe tiyakuteirwe naku iwe okashemelerwa. Aba Yuda tibakusilikire, iwe okanulirwa; tizakubaire naku okeshanda.

¹³ Abantu bange tibakuteirwe naku okataha mu kigo kyabo kubakoleeza; tibakukwetwe biyengo okashemelerwa; okashuba okatwara bintu byabo.

¹⁴ Tiwakwemeleire mu mihanda etana kubaita nibahunga. Tizakubaire naku iwe okakwata abaruhonokaho okabanaga omu mikono y'ababisha.”

Omukama aliramura amahanga

¹⁵ “Ekiro kili hagufi, orwo inye Omukama ndiramura amahanga gona. Edomu okwo okozire banu, nikwo naiwe balikukora. Ebikorwa byawe bilikushubaho.

¹⁶ Aha ibanga lyange elitakatifu, abantu bange baboneireho ekibonabonyio kibi, nikwo n'amahanga gona agabataine galibona ekibonabonyio nk'ekyo; mara balichweka limoi.”

Okurokoka kwa Isiraeli

¹⁷ “Kyonkai omw'Ibanga lya Sioni haliyo abalihunga, mara liliba ibanga litakatifu; kandi eka ya Yakobo elitwara ensi yayo eli yayo kwo.

¹⁸ Eka ya Yakobo elishusha omuliro, n'eka ya Yozefu elishusha orulimi rw'omuliro. Kyonkai eka ya Esau eliba nk'ekishagate. Aba Yakobo na Yozefu balyokya aba Esau babasosotore; mara omwa Esau taliho n'omoi alihonoka.” Alikugamba Mukama.

¹⁹ “Aba Negebu balilya Eibanga lya Esau, n'aba Shefela balilya ensi y'Abafilisiti; balilya n'eya Efuraimu n'eya Samaria, kandi aba Benjamini balilya Gileadi.

²⁰ Endore za Isiraeli omuli Hala zililya Fenisia kugoba Sareputa; endore za Yerusalemu ezili Sefaradi zililya ebigo bya Negebu.

²¹ Abarokozi balitemba Eibanga lya Sioni batware Eibanga lya Esau; kandi engoma eliba y'Omukama.”