Nehemia 9 - Ebibulia 2001

Abantu nibechuza amafu gabo

¹ Aha kiro kya makumi gabili na binai eky'omwezi ogwo, Abaisiraeli bahurura basiibire mara bajwete engunia, bekaabire eitaka omu mutwe.

² Abaisiraeli beshorora omu banyamahanga, bemelera bechuza amafu gabo n'entambara za baishebo.

³ Baimuka bemelera mbali bali, bashoma Ekitabo ky'Amateka g'Omukama Ruhanga wabo esaa ezindi ishatu, bechuza, bafukamira Omukama Ruhanga wabo.

⁴ Yeshua, Bani, Kadimieli, Shebania, Buni, Sherebia, Bani na Kenani bemelera aha matembero g'Abalevita, batakira Omukama Ruhanga wabo n'eiraka lihango.

⁵ Aho Abalevita na Yeshua, Kadimieli, Bani, Hashabineya, Sherebia, Hodia, Shebania na Petahia bagamba bati, “Mwemelere musingize Omukama Ruhanga wanyu ow'eirai n'eirai. Eibaralye ely'ekitinwa, ely'omuntu atakusingiza akamara, lisingizibwe.”

Enshara y'okwechuza amafu

⁶ Kandi Ezira agamba ati, “Iwe niiwe Mukama, iwe wenkai, okatonda eiguru nyakabara n'enyanyinyi zalyo zona. Okatonda ensi na byona ebikagilimu, enyanja na byona ebikazilimu, kandi obilinda byona; n'eihe ly'omw'iguru likufukamira.

⁷ Niiwe Mukama Ruhanga ayaronkire Aburamu okamwihya Uri ey'Abakalidayo, wamuruka eibara Aburahamu;

⁸ wabona omutimagwe guli gwesigwa, wamuraganisa kuha baijukurube ensi y'Abakanaani, Abahiti, Abaamori, Abaperizi, Abayebusi n'Abagirigashi, mara wahikya ebigambo byawe, aha rw'okuba oba murungi.”

⁹ “Kandi okabona obushasi bwa batataichwe omuli Misiri, wahulira okutaka kwabo aha Nyanja Rutuku

¹⁰ wakolera Farao n'abaramatabe bona n'abantu bona b'ensiye obubonero n'ebitangazo by'okubatinisa, ahakuba okamanya okwo bakozire kubi batataichwe n'ekyeju, wayehaisa ekitinwa na mambwenu.

¹¹ Okabeganisa enyanja habili omu maisho gabo, baraba omu nyanja omugati aha rukaru kandi ababaire bababingire wabanaga obuziba nk'eibare.

¹² Nyemishana okabebembera omu nyomyo y'ekichwi, n'omu kiro omu nyomyo y'omuliro kubakiza omuhanda ogwo balikuragirwa kurabamu.

¹³ Okasongoka waija aha Ibanga lya Sinai, mara wagamba nabo oyemire omw'iguru, wabaha emigenzo ehikire, Amateka ag'amazima, ebiragiro ebirungi n'emihango;

¹⁴ wabamanyisa na Sabato yawe entakatifu omu kanwa ka Musa omwiru wawe.

¹⁵ Kabarumirwe enjara wabaha omukate gw'omw'iguru, kabakwetwe eiliho wabaihira amaizi omu rwazi, wabaragira kutaha omu nsi eyo wabaire obaraganisize okwo baligilya.”

¹⁶ “Kyonkai bonene na batat'enkurw'ichwe bakagira eikuru, bagumangana emitima, tibahuliire mihango yawe,

¹⁷ bayanga kuhulira, tibaijukire na bitangazo ebyo wabakoleire, baronda n'omwebembezi w'okubagarura Misiri omu bwiru. Kyonkai iwe oba Ruhanga omwangu kugarulira, oba munyakisha mara muganyizi, torahuka kutamwa mara ogira ekisha kingi muno kandi tiwabanagiraine.

¹⁸ N'orwo bahesire enyana barogota muno bati, ‘Ogu niwe ruhanga waitu ayatwihire Misiri,’

¹⁹ iwe omu buganyizi bwawe obungi tiwabanagiraine mu irungu. Enyomyo y'ekichwi eyabebemberaga nyemishana tiyabarugagaho, nangu n'ey'omuliro omu kiro yabakizaga mbali bararaba.

²⁰ Okabatunga Mwoyo gwawe nyamurungi kubaragilira, tiwabaimire manu ya kulya, mara wabatunga amaizi kubatamba eiliho.

²¹ Okabalisa emyaka 40, okabamanya omw'irungu, tibabuzirwe kantu. Emyendo yabo tiyakuzire, tibazimbire na maguru.

²² Okabatunga engoma n'amahanga, wabaatira ensi yona kugigobya omu mbibi, kityo balya ensi ya Sihoni omukama wa Heshiboni n'ensi ya Ogi omukama wa Bashani.

²³ Wakanyisa baijukuru babo nk'enyanyinyi z'aha iguru, kandi wabatahya omu nsi eyo wabaire ogambire baishebo kubaha bakagilya.

²⁴ Kityo baijukuru babo bakataha omu nsi egyo bagilya, wamara abanyansi bamwo. Abakanaani wabajemurura, wabachwa eishaija omu maisho gabo; wabanaga omu mikono yabo, abakama babo n'abanyansi babakora okwo balikwenda.

²⁵ Bakwata ebigo by'eboma n'ensi y'einura. Bakwata amaju gaijwire ebintu birungi, amaziba g'amaizi, emizabibu, emizeituni n'emiti y'ebiraba nyingi muno. Kityo balya baiguta, bagomoka, bashemelerwa aha rw'obufura bwawe obungi.”

²⁶ “Kyonkai tibakuhuliire. Bakakushenga, nangu Amateka gawe bagashaima enyuma, baita abarangi bawe ababatatiraga kubagarura ahali iwe, mara bakarogota muno.

²⁷ Nikyo wabanagiire omu mikono y'ababisha babo bakabashasa. Omu kushasha kwabo bakutakira mara wayema omw'iguru wabahulira nk'okwo obuganyizi bwawe buba bungi, wabaha ab'okubarokora omu mikono y'ababisha babo.

²⁸ Kyonkai kababaire bagizire emilembe bakugokera, aho washuba wabanaga omu mikono y'ababisha babo babatwara. Nawe kabayechulize bakakutakira wayema omw'iguru wabahulira. Kuhonderana n'obuganyizi bwawe okabarokora emirundi nyingi.

²⁹ Okabatatira kubagarura aha Mateka gawe, kyonkai bagira eikuru tibahulira mihango yawe, bachwa emigenzo yawe ey'omuntu ahikya akarora, basika amabega mara bagumangana emitima tibahuliire.

³⁰ Okabegumisiliza emyaka nyingi, wabatwekera Mwoyo wawe omu kanwa k'abarangi kubatatira, kyonkai tibakunzire kuhulira. Nikwo kubanaga omu mikono y'abanyamahanga.

³¹ Kyonkai omu buganyizi bwawe obungi muno tiwabasilikize anga kubanagirana, aha rw'okuba iwe oba Ruhanga ow'ekisha mara omuganyizi.”

³² “Mbwenu aha rw'ekyo, Ruhanga, Ruhanga omukuru, ow'amani, ow'ekitinwa ekingi, ayekomya endagano n'ekisha, enaku zaitu ezatugwireho: Aha bakama baitu, aha batwazi baitu, aha bakuhani, aha barangi baitu, ahali batat'enkurw'ichwe n'aha bantu bawe bona, kwema omu makiro g'abakama ba Asiria kuhika kir'eki, otazigaya.

³³ Kyonkai omu bitugwireho byona obaire w'amazima, enshonga okatukorage ichwe twakukora kubi.

³⁴ Abakama baitu, abatwazi baitu, abakuhani baitu na batat'enkurw'ichwe tibahikize Mateka gawe, anga kwetaho mihango yawe n'okubatatira kwawe okwo wabatatiire.

³⁵ Kababaire bali omu bukama bwabo, omu birungi ebyo wabatungire, n'omu nsi mpango elikweza muno eyo wabahaire; tibakukoleire handiki kulekera mize yabo emibi.

³⁶ Leba tuli bairu na kir'eki omu nsi eyo watungire batat'enkurw'ichwe kulya ebiraba byamwo n'ebirungi byamwo byona.

³⁷ Eby'ensi eyeza bigya omu bakama abo wataireho kututwara nituzira amafu gaitu; kwakwo baina obushobora ahali ichwe n'aha bitunganwa byaitu nk'okwo balikwenda, tuli omu naku zingi!”

Embaga netaho endagano omukono

³⁸ Aha rw'enshonga y'ebi byona nitukora endagano ehamire mara nitugihandika, n'abatwazi baitu, Abalevita baitu n'abakuhani baitu bagiteho omuhuri.