Nehemia 8 - Ebibulia 2001

Ezira nashomera abantu Amateka

¹ Abantu bona bahurura n'omutima gumoi omuli nyarubuga omu maisho g'Ekihigi ky'Amaizi. Bagambira omuhandiki Ezira mara omukuhani kuleta Ekitabo ky'Amateka ga Musa ag'Omukama yahaire Isiraeli.

² Ezira aleta Amateka omu maisho g'embaga, abashaija bona ababaire nibashobora kuhulira n'okushobokerwa. Kikaba kili kiro kya mbere ky'omwezi gwa mushanju.

³ Akishoma alebire nyarubuga ey'omu maisho g'Ekihigi ky'Amaizi, kwema bwankya karai kugoba omw'ihangwe. Kandi abantu bona bahuliliza kurungi ekitabo ekyo.

⁴ Ezira ayemelera omu kituti ky'embaho ekyabaire kikoleirwe omugendelero ogwo, aha bulyobwe ayemelerwaho Matitia, Shema, Anaya, Uria, Hilikia na Maaseya; aha bumoshobwe ayemelerwaho Pedaya, Mishaeli, Malakiya, Hashumu, Hashibadani, Zekaria na Meshulamu.

⁵ Ezira ashurura ekitabo omu maisho g'embaga yona, mara akaba ali eiguru y'abantu bona. Orwo yakishurwire abantu bona bemelera.

⁶ Ezira asingiza Omukama Ruhanga omukuru. Abantu bona bahorora bati, “Amina, Amina,” baimukize emikono yabo, bainika emitwe bafukamira Omukama obuso nibukanga aha itaka.

⁷ Yeshua kwakwo na Bani, Sherebia, Yamini, Akubu, Shabetai, Hodia, Maaseya, Kelita, Azaria, Yozabadi, Hanani, Pelaya n'Abalevita, bashoborora abantu, abantu bonene bali omu myanya yabo.

⁸ Bashomage Ekitabo ky'Amateka ga Ruhanga, mara bashoborora, aha rw'ekyo abantu bashobokerwa ebyashomwa.

⁹ Kandi Nehemia ayabaire ali gavana, na Ezira omukuhani mara omuhandiki n'Abalevita abayegesaga abantu, bagambira abantu bati, “Ekiro eki kitakatifu ky'Omukama Ruhanga wanyu, mutachura anga mutalira.” Aha rw'okuba abantu kabahuliire ebigambo by'Amateka balira.

¹⁰ Aho abagambira ati, “Iroko mutahe, mulye ebishaire, munywe edivai elikunura, mugemulire n'olinya ataina kantu; enshonga ekiro eki kitakatifu ky'Omukama waitu, mutajunara, manya ebyera by'Omukama alikubaha nigo mani ganyu.”

¹¹ Kityo Abalevita batebekanisa embaga yona bati, “Muchulere, ekiro eki kitakatifu; mutajunara.”

¹² Abantu bona bagya omuka, balya, banywa, bagemura, bashemelerwa muno, kuba bakashobokerwa ebigambo ebyo babagambiire.

Ekiro kikuru ky'Ensisira

¹³ Aha kiro kya kabili abakuru b'embaga yona ab'amahiga n'abakuhani n'Abalevita baija hamoi ahali Ezira omuhandiki kwega Amateka.

¹⁴ Bashanga kihandikire omu Mateka okwo Omukama yabaire ahangiire Musa, Abaisiraeli kwikara omu nsisira aha kiro kikuru ky'omwezi gwa mushanju;

¹⁵ kandi barange omu bigo byabo byona na Yerusalemu bati, “Mugende omu nshozi mulete amatagi g'emizeituni kibira, amatagi g'omuhadasi, ag'emikindo n'ag'emiti endijo ey'amababi kukoza ensisira nk'okwo kihandikirwe.”

¹⁶ Bagenda bagaleta, bakora ensisira zabo, buli omoi aha rushwi rw'enjuye, n'omu bibuga byabo, n'omuli nyakabuga za Rwensinga, n'omuli nyarubuga y'Ekihigi ky'Amaizi n'omuli nyarubuga y'Ekihigi kya Efraimu.

¹⁷ Embaga yona eyabaire erugire omu buzahe eyombeka ensisira eikara omwo, kuba kwema omu biro bya Yoshua eya Nuni kuhika kir'ekyo, Abaisiraeli bakaba batakakoraga batyo. Hakabaho amashemelerwa gangi muno.

¹⁸ Buli kiro, kwema aha kiro kya mbere kugoba aha kiro ky'enzindo, Ezira yashomaga Ekitabo ky'Amateka ga Ruhanga. Bagira obugenyi bw'ebiro mushanju, aha kiro kya munana habaho enteko, bashoma enshara nk'okw'omugenzo gulikuragira.