Nehemia 6 - Ebibulia 2001

Sanibalati n'aba wenene nibanama kwita Yeremia

¹ Sanibalati, Tobia na Geshemu Omuarabu n'ababisha baitu abandi bagambirwa okwo nyombekire eboma n'okwo hatasigairwemu kihuru (mara omu kanya ako nkaba ntakatairemu nyigi za mataho).

² Sanibalati na Geshemu bantumaho bati, “Oije tubuganganwe omu kyaro kimoiho omu muteleka gwa Ono.” Kyonkai bakaba bagendeleire kunyita.

³ Mbatumaho entumwa nti, “Ninkora omulimo guhango, tinakushobora kwija okwo. Kubaki omulimo gwemelere aha rw'enshonga ngu naija okwo?”

⁴ Bantumaho batyo emirundi enai nanye mbagarukamu ntyo.

⁵ Omu migilire yonene, Sanibalati antumaho omurundi gwa katanu omwiruwe aina ebarua etakomire.

⁶ Ekaba ehandikirwe eti, “Kyamanyikire omu mahanga, na Geshemu kwakwo nakigamba okwo iwe n'Abayahudi mulikwenda kushenga; nikyo mulikwombekera eboma; mara noyenda kuba mukama wabo nk'okwo kilikugambwa.

⁷ Kandi otaireho abarangi kukuranga omuli Yerusalemu bati, ‘Omuli Yuda halimu omukama.’ Mbwenu ebigambo ebi nibija kumanyika aha Mukama Aritashasita. Aha rw'ekyo oije tweme hamoi tutegeke.”

⁸ Aho mutumaho nti, “Ebi ebyo wagamba tibikabahoga, ahakuba iwe nobigunjagunja omu mutima gwawe.”

⁹ Nomanya bona bakaba nibenda kutukanga nibalenga bati, “Amani garabahwa n'eikora lyemelere tilikorwe.” Kyonkai mbwenu waitu Ruhanga bantunge amani.

¹⁰ Kanatahire omwa Shemaya eya Delaya, Delaya eya Mehetabeli, akaba afungiirwe omwe, agamba ati, “Tubuganganwe Rwensinga, mara tukinge enyigi zayo aha rw'okuba nibaija kukwita omu kiro.”

¹¹ Kyonkai ngamba nti, “Omushaija nkanye nyiruke? Mushaijaki nkanye ayakusingirwa Rwensinga ngu batamwita?”

¹² Nkashobokerwa nabona Ruhanga okwo yabaire atamutumire, shana akaba nabingambaho aha rw'enshonga Tobia na Sanibalati bakaba bamutilize.

¹³ Aha rw'enshonga egyo akaba atiziibwe ntine nkore ntyo nfakare, baije banyite eibara kunshesheza.

¹⁴ Waitu Ruhanga wange, oraijuka Tobia na Sanibalati aha rw'ebi ebyo bakozire, oshube oijuke n'eby'omurangi Noadia n'abarangi abandi ababaire nibenda kuntinisa.

¹⁵ Kityo aha kiro kya 52 makumi gabili na bitanu ky'omwezi gwa Eluli eboma ehwa, ehwera omu biro 52 bibili.

¹⁶ Orwo ababisha baitu bona bakihuliire, amahanga gona agatwataine gatina, gahwa eishaija aha rw'okuba gakamanya okw'omulimo ogwo gwahoire aha rw'obujuni bwa Ruhanga waitu.

¹⁷ Kandi omu biro ebyo abakungu ba Yuda bakatwekera Tobia ebarua zingi, na Tobia abahandikira.

¹⁸ Bangi omuli Yuda bakaba bakozire endagano nawe, aha rw'enshonga akaba ali mukoi wa Shekania eya Ara, kandi omutabani Yehohanani akaba ashweire muhara wa Meshulamu eya Berekia.

¹⁹ Bashuba bamutenda omu maisho gange mara bamugambira n'ebyange. Kandi Tobia yata nantwekera ebarua kuntinisa.